ವಿಯೆಟ್ನಾಂ ಓಪನ್; ಫೈನಲ್‌ಗೆ ಲಗ್ಗೆಯಿಟ್ಟ ಅಜಯ್ ಜಯರಾಮ್

ಹೊಸದಿಲ್ಲಿ: ವಿಯೆಟ್ನಾ ಓಪನ್ ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ಅಮೋಘ ನಿರ್ವಹಣೆ ನೀಡುತ್ತಿರುವ ಭಾರತದ ಅಜಯ್ ಜಯರಾಮ್ ಫೈನಲ್‌ಗೆ ಪ್ರವೇಶಿಸಿದ್ದಾರೆ.

ಶನಿವಾರ ನಡೆದ ಪುರುಷ ಸಿಂಗಲ್ಸ್ ಸೆಮಿಫೈನಲ್ ಮುಖಾಮುಖಿಯಲ್ಲಿ ಜಪಾನ್‌ನ ಯೂ ಇಗರಾಶಿ ಅವರನ್ನು 21-14 21-19ರ ಅಂತರದಲ್ಲಿ ಮಣಿಸಿ ಪ್ರಶಸ್ತಿ ಸುತ್ತಿಗೆ ಮುನ್ನಡೆದರು.

ಟೂರ್ನಿಯುದ್ಧಕ್ಕೂ ಪ್ರಭಾವಿ ಪ್ರದರ್ಶನ ನೀಡುತ್ತಿರುವ 30ರ ಹರೆಯದ ಜಯರಾಮ್ 34 ನಿಮಿಷಗಳ ಹೋರಾಟದಲ್ಲಿ ಎದುರಾಳಿ ವಿರುದ್ಧ ಸವಾರಿಗೈದರು.

ಕಳೆದ ತಿಂಗಳು ವೈಟ್ ನೈಟ್ಸ್ ಟೂರ್ನಿಯಲ್ಲಿ ರನ್ನರ್ ಅಪ್ ಪ್ರಶಸ್ತಿ ಗೆದ್ದಿರುವ ಜಯರಾಂ ಇದೀಗ ನಡೆಯಲಿರುವ ಪ್ರಶಸ್ತಿಗಾಗಿನ ಮುಖಾಮುಖಿಯಲ್ಲಿ ವಿಶ್ವ ನಂ. 79ನೇ ರ‍್ಯಾಂಕ್‌ನ ಇಂಡೋನೇಷ್ಯಾದ ಶೇಸರ್ ಹೈರನ್ ರುಸ್ತವಿಟೊ ಸವಾಲನ್ನು ಎದುರಿಸಲಿದ್ದಾರೆ.

ಮಗದೊಂದು ಫೈನಲ್‌ನಲ್ಲಿ ನಾಲ್ಕು ಬಾರಿ ಇಂಡೋನೇಷ್ಯಾ ಇಂಟರ್‌ನ್ಯಾಷನಲ್ ಟೂರ್ನಮೆಂಟ್ ವಿಜೇತ ಶೆಸರ್ ಅವರು ಭಾರತದ ಮಿಥುನ್ ಮಂಜುನಾಥ್ ವಿರುದ್ಧ 21-17 19-21 21-14ರ ಕಠಿಣ ಅಂತರದಲ್ಲಿ ಗೆಲುವು ದಾಖಲಿಸಿದ್ದರು.

ಸದ್ಯ ವಿಶ್ವ ರ‍್ಯಾಂಕ್‌‌ನಲ್ಲಿರುವ ಅಜಯ್‌ಗೆ 75000 ಅಮೆರಿಕನ್ ಡಾಲರ್ ಪ್ರಶಸ್ತಿ ಮೊತ್ತ ಹೊಂದಿರುವ ಬಿಎಂಡ್ಲ್ಯುಎಫ್ ಟೂರ್ ಸೂಪರ್ 100 ಟೂರ್ನಿಯಲ್ಲಿ ಗೆಲುವು ದಾಖಲಿಸಲು ಸಾಧ್ಯವೇ ಎಂಬುದನ್ನು ಕಾದು ನೋಡಬೇಕಿದೆ.