ಐಸಿಸಿಯನ್ನು ಟ್ರೋಲ್‌ ಮಾಡಿದ ಆಲ್‌ಬ್ಲ್ಯಾಕ್‌

ಹೊಸದಿಲ್ಲಿ: ಹನ್ನೆರಡನೇ ಐಸಿಸಿ ವಿಶ್ವಕಪ್‌ನ ರೋಚಕ ಫೈನಲ್‌ ಮುಕ್ತಾಯಗೊಂಡು ಎರಡು ವಾರಗಳೇ ಕಳೆದಿವೆ. ಆದರೆ, ತನಗಾದ ಆಘಾತ ಮರೆಯಲು ನ್ಯೂಜಿಲೆಂಡ್‌ ತಂಡಕ್ಕೆ ಸಾಧ್ಯವೇ ಆಗುತ್ತಿಲ್ಲ. ಅದರಲ್ಲೂ ಬೌಂಡರಿ ಲೆಕ್ಕಾಚಾರದಲ್ಲಿ ಇಂಗ್ಲೆಂಡ್‌ ತಂಡಕ್ಕೆ ವಿಶ್ವಕಪ್‌ ನೀಡಿರುವ ಐಸಿಸಿ ಕ್ರಮವನ್ನು ಅರಗಿಸಿಕೊಳ್ಳುವುದೇ ಬ್ಲ್ಯಾಕ್‌ ಕ್ಯಾಪ್‌ ಬಳಗಕ್ಕೆ ಕಷ್ಟವಾಗಿದೆ. ವಿಶ್ವಕಪ್‌ ಫೈನಲ್‌ ಪಂದ್ಯದ ಫಲಿತಾಂಶವನ್ನಿಟ್ಟುಕೊಂಡು ನ್ಯೂಜಿಲೆಂಡ್‌ನ ರಗ್ಬಿ ತಂಡ 'ಆಲ್‌ ಬ್ಲ್ಯಾಕ್‌' ಐಸಿಸಿಯನ್ನು ಟ್ವಿಟರ್‌ ಮೂಲಕ ಟ್ರೋಲ್‌ ಮಾಡಿದೆ.

ನ್ಯೂಜಿಲೆಂಡ್‌ನಲ್ಲಿ ನಡೆದ 'ದಿ ರಗ್ಬಿ ಚಾಂಪಿಯನ್‌ಷಿಪ್‌'ನಲ್ಲಿ ನ್ಯೂಜಿಲೆಂಡ್‌ನ ಆಲ್‌ ಬ್ಲ್ಯಾಕ್‌ ಹಾಗೂ ದಕ್ಷಿಣ ಆಫ್ರಿಕಾದ ಸ್ಟ್ರಿಂಗ್‌ಬಾಕ್ಸ್‌ ತಂಡವು ಸೆಣಸಿತ್ತು. ಈ ಪಂದ್ಯವು 16-16 ಅಂಕಗಳೊಂದಿಗೆ ಡ್ರಾ ಆಗಿತ್ತು. ಇದೇ ಫಲಿತಾಂಶವನ್ನು ಟ್ವೀಟರ್‌ನಲ್ಲಿ ಪ್ರಕಟಿಸಿದ ನ್ಯೂಜಿಲೆಂಡ್‌ ತಂಡ ''ಇಲ್ಲಿ ಯಾವುದೇ ಬೌಂಡರಿ ಲೆಕ್ಕಾಚಾರವಿಲ್ಲ. ಖಂಡಿತವಾಗಿಯೂ ಈ ಪಂದ್ಯ ಡ್ರಾ' ಎಂದು ಬರೆದು ಅಂತಾರಾಷ್ಟ್ರೀಯ ಕ್ರಿಕೆಟ್‌ ಸಂಸ್ಥೆಯನ್ನು ಗೇಲಿ ಮಾಡಿದೆ.