ಇತಿಹಾಸ ರಚಿಸಿದ ಅಮಿತ್ ಫಂಗಲ್; ವಿಶ್ವ ಬಾಕ್ಸಿಂಗ್ ಚಾಂಪಿಯನ್‌ಶಿಪ್‌ ಫೈನಲ್ ತಲುಪಿದ ಭಾರತದ ಮೊದಲ ಪುರುಷ ಬಾಕ್ಸರ್!

ಎಕಟೆರಿನ್‌ಬರ್ಗ್ (ರಷ್ಯಾ): ಭಾರತದ ಯುವ ಪ್ರತಿಭಾವಂತ ಬಾಕ್ಸರ್ ಅಮಿತ್ ಫಂಗಲ್ ಎಐಬಿಎ ವಿಶ್ವ ಬಾಕ್ಸಿಂಗ್ ಚಾಂಪಿಯನ್‌ಶಿಪ್‌ನಲ್ಲಿ ಫೈನಲ್ ಪ್ರವೇಶಿಸಿದ ಭಾರತದ ಮೊತ್ತ ಮೊದಲ ಪುರುಷ ಬಾಕ್ಸರ್ ಎಂಬ ದಾಖಲೆಗೆ ಪಾತ್ರವಾಗಿದ್ದಾರೆ.

ರಷ್ಯಾದ ಎಕಟೆರಿನ್‌ಬರ್ಗ್‌ನಲ್ಲಿ ನಡೆದ ಪುರುಷ 52 ಕೆ.ಜಿ. ವಿಭಾಗದ ಸೆಮಿಫೈನಲ್ ಮುಖಾಮುಖಿಯಲ್ಲಿ ಖಜಕಸ್ತಾನದ ಸಕೆನ್ ಬಿಬೊಸಿನೋವ್ ವಿರುದ್ಧ 3-2ರ ಅಂತರದಲ್ಲಿ ಗೆದ್ದು ಇತಿಹಾಸ ರಚಿಸಿದರು.

ತನ್ನ ದೇಹ ತೂಕಕ್ಕಿಂತಲೂ ನಾಲ್ಕು ಪಟ್ಟು ಹೆಚ್ಚು ಭಾರ ಎತ್ತಿ ದಾಖಲೆ ಬರೆದ ಮೀರಾಬಾಯಿ ಚಾನು!

ಇದರೊಂದಿಗೆ ಅಮಿತ್ ಫಂಗಲ್ ಕನಿಷ್ಠ ಬೆಳ್ಳಿ ಪದಕವನ್ನುಖಚಿತಪಡಿಸಿದ್ದಾರೆ. ಒಟ್ಟಿನಲ್ಲಿ ಬಾಕ್ಸಿಂಗ್ ವಿಶ್ವ ಚಾಂಪಿಯನ್‌ಶಿಪ್‌‌ನಲ್ಲಿ ಚಿನ್ನ ಅಥವಾ ಬೆಳ್ಳಿ ಪದಕ ಗೆಲ್ಲಲಿರುವ ಭಾರತದ ಮೊದಲ ಪುರುಷ ಬಾಕ್ಸರ್ ಎಂಬ ಹಿರಿಮೆಗೆ ಪಾತ್ರವಾಗಲಿದ್ದಾರೆ.

ಏಷ್ಯಾ ಗೇಮ್ಸ್ ಚಿನ್ನದ ಪದಕಧಾರಿಯಾಗಿರುವ ಅಮಿತ್ ಫಂಗಲ್ ಬಾಕ್ಸಿಂಗ್ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಫೈನಲ್ ತಲುಪುವ ಮೂಲಕ ಭಾರತೀಯ ಬಾಕ್ಸರ್‌ಗಳಾದ ವಿಜೆಂದರ್ ಸಿಂಗ್, ವಿಕಾಸ್ ಕೃಷ್ಣನ್, ಶಿವ ತಾಪ ಹಾಗೂ ಗೌರವ್ ಬಿಧುರಿ ಸಾಧನೆಗಳನ್ನು ಮೀರಿಸಿದ್ದಾರೆ. ಈ ಎಲ್ಲ ಬಾಕ್ಸರ್‌ಗಳು ಕಂಚಿನ ಪದಕ ಗೆದ್ದ ಸಾಧನೆ ಮಾಡಿದ್ದರು.

ಚೀನಾ ಓಪನ್: ಕ್ವಾರ್ಟರ್‌ನಲ್ಲಿ ಮುಗ್ಗರಿಸಿದ ಸಾಯಿ ಪ್ರಣೀತ್; ಭಾರತದ ಹೋರಾಟ ಅಂತ್ಯ

ಈ ಮೊದಲು ಬಾಕ್ಸಿಂಗ್ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಅಮಿತ್ ಫಂಗಲ್ ಹಾಗೂ ಮನೀಶ್ ಕೌಶಿಕ್ ಸೆಮಿಫೈನಲ್ ಪ್ರವೇಶಿಸುವ ಮೂಲಕ ವಿಶಿಷ್ಟ ದಾಖಲೆ ಬರೆದಿದ್ದರು. ವಿಶ್ವ ಚಾಂಪಿಯನ್‌ಶಿಪ್ ಆವೃತ್ತಿಯೊಂದರಲ್ಲಿ ಭಾರತೀಯ ಬಾಕ್ಸರ್‌ಗಳು ಇದುವರೆಗೆ ಒಂದಕ್ಕಿಂತ ಹೆಚ್ಚು ಪದಕ ಗೆದ್ದಿರಲಿಲ್ಲ. ಆದರೆ ಈ ಬಾರಿ ಎರಡು ಪದಕಗಳು ಭಾರತವನ್ನು ಹರಸಿಕೊಂಡು ಬಂದಿದೆ.

ಇದೀಗ ಅಮಿತ್ ಫಂಗಲ್, ಶನಿವಾರ ನಡೆಯಲಿರುವ ಫೈನಲ್ ಮುಖಾಮುಖಿಯಲ್ಲಿ ಒಲಿಂಪಿಕ್ ಚಿನ್ನ ಪದಕಧಾರಿ ಉಜ್ಬೇಕಿಸ್ತಾನದ ಶಕೋಬಿದಿನ್ ಜೈರೋವ್ ಸವಾಲನ್ನು ಎದುರಿಸಲಿದ್ದಾರೆ.

ಕೌಶಿಕ್‌ಗೆ ಕಂಚು...
ಏತನ್ಮಧ್ಯೆ 63 ಕೆ.ಜಿ. ವಿಭಾಗದ ಸೆಮಿಫೈನಲ್‌ನಲ್ಲಿ ಕ್ಯೂಬಾದ ಆ್ಯಂಡಿ ಗೊಮೆಜ್ ಕ್ರೂಜ್ ವಿರುದ್ಧ 0-5ರ ಅಂತರದ ಸೋಲನುಭವಿಸಿರುವ ಮನೀಶ್ ಕೌಶಿಕ್ ಕಂಚಿನ ಪದಕಕ್ಕೆ ತೃಪ್ತಿಪಟ್ಟುಕೊಂಡಿದ್ದಾರೆ.

ಈ ಮೊದಲು ಬಾಕ್ಸಿಂಗ್ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಪುರುಷ ವಿಭಾಗದಲ್ಲಿ ಪದಕ ಗೆದ್ದ ಭಾರತದ ಆರನೇ ಬಾಕ್ಸರ್ ಎಂಬ ಖ್ಯಾತಿಗೆ ಕೌಶಿಕ್ ಪಾತ್ರವಾಗಿದ್ದರು.

ಒಲಿಂಪಿಕ್ ಕ್ವಾಲಿಫೈಯರ್‌ಗೆ ನೇರ ಟಿಕೆಟ್...
ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಪದಕ ಗೆಲ್ಲುವುದರೊಂದಿಗೆ ಅಮಿತ್ ಫಂಗಲ್ ಹಾಗೂ ಮನೀಶ್ ಕೌತಿಕ್ ,ಚೀನಾದಲ್ಲಿ ಫೆಬ್ರವರಿಯಲ್ಲಿ ನಡೆಯಲಿರುವ ಒಲಿಂಪಿಕ್ ಕ್ವಾಲಿಫೈಯರ್ ಸುತ್ತಿಗೆ ನೇರ ಅರ್ಹತೆಯನ್ನು ಗಿಟ್ಟಿಸಿಕೊಂಡಿದ್ದಾರೆ.