ಆಶೀಶ್‌ ಕೊರಳಿಗೆ ಚಿನ್ನದ ಪದಕ

ಹೊಸದಿಲ್ಲಿ: ಬ್ಯಾಂಕಾಕ್‌ನಲ್ಲಿ ನಡೆದ ಥಾಯ್ಲೆಂಡ್‌ ಓಪನ್‌ ಬಾಕ್ಸಿಂಗ್‌ ಚಾಂಪಿಯನ್‌ಷಿಪ್‌ನ 70 ಕೆ.ಜಿ ವಿಭಾಗದಲ್ಲಿ ಭಾರತದ ಆಶೀಶ್‌ ಚಿನ್ನದ ಪದಕ ಗೆದ್ದಿದ್ದಾರೆ. ಇದು ಅವರ ಚೊಚ್ಚಲ ಅಂತಾರಾಷ್ಟ್ರೀಯ ಪದಕ. ಈ ಚಾಂಪಿಯನ್‌ಷಿಪ್‌ನಲ್ಲಿ ಭಾರತದ ಬಾಕ್ಸರ್‌ಗಳು ನಾಲ್ಕು ಬೆಳ್ಳಿ ಹಾಗೂ ಮೂರು ಕಂಚು ಸೇರಿ ಎಂಟು ಪದಕಗಳನ್ನು ಬಾಚಿಕೊಂಡಿದ್ದಾರೆ.
ಏಷ್ಯನ್‌ ಚಾಂಪಿಯನ್‌ಶಿಪ್‌ನ ಬೆಳ್ಳಿ ಪದಕ ವಿಜೇತರಾಗಿರುವ ಆಶೀಶ್‌, ಶನಿವಾರ ನಡೆದ 70 ಕೆ. ಜಿ ವಿಭಾಗದ ಫೈನಲ್‌ ಸ್ಪರ್ಧೆಯಲ್ಲಿ ಕೊರಿಯಾದ ಕಿಮ್‌ ಜಿಂಜೆ ಅವರನ್ನು 5-0 ಅಂಕಗಳಿಂದ ಸೋಲಿಸಿ ಚಿನ್ನದ ಪದಕಕ್ಕೆ ಮುತ್ತಿಕ್ಕಿದರು.
ಅದೆ ರೀತಿ ನಿಖತ್‌ ಝರೀನ್‌(51 ಕೆ.ಜಿ) ದೀಪಕ್‌ (41 ಕೆ.ಜಿ), ಮೊಹಮ್ಮದ್‌ ಹಸ್ಸಮುದ್ದಿನ್‌ (56 ಕೆ.ಜಿ) ಹಾಗೂ ಬ್ರಿಜೇಶ್‌ ಯಾದವ್‌ (81 ಕೆ.ಜಿ) ಬೆಳ್ಳಿ ಪದಕಗಳನ್ನು ಗೆದ್ದರೆ, ಮಂಜು ರಾಣಿ (48 ಕೆ.ಜಿ) ಆಶಿಶ್‌ (69 ಕೆ.ಜಿ) ಹಾಗೂ ಕಚಾರಿ (75 ಕೆ.ಜಿ) ಕಂಚಿನ ಪದಕಗಳನ್ನು ತಮ್ಮದಾಗಿಸಿಕೊಂಡರು.