ಏಷ್ಯನ್ ಚಾಂಪಿಯನ್ಸ್ ಟ್ರೋಫಿ; ಪಾಕ್ ಬಗ್ಗುಬಡಿದ ಭಾರತ

ಮಸ್ಕತ್: ಒಮಾನ್‌ನಲ್ಲಿ ನಡೆಯುತ್ತಿರುವ ಏಷ್ಯನ್ ಚಾಂಪಿಯನ್ಸ್ ಟ್ರೋಫಿ ಹಾಕಿ ಟೂರ್ನಮೆಂಟ್‌ನಲ್ಲಿ ತನ್ನ ಎರಡನೇ ಪಂದ್ಯದಲ್ಲಿ ಸಾಂಪ್ರದಾಯಿಕ ಬದ್ಧ ಎದುರಾಳಿ ಪಾಕಿಸ್ತಾನ ವಿರುದ್ಧ ಭಾರತ 3-1 ಗೋಲುಗಳ ಅಂತರದಿಂದ ಭರ್ಜರಿ ಗೆಲುವು ದಾಖಲಿಸಿದೆ.

ಇದರೊಂದಿಗೆ ಸತತ ಎರಡನೇ ಗೆಲುವಿನೊಂದಿಗೆ ಅಜೇಯ ಓಟ ಮುಂದುವರಿಸಿದೆ. ಈ ಮೊದಲು ನಡೆದ ಮೊದಲ ಪಂದ್ಯದಲ್ಲಿ ಆತಿಥೇಯ ಒಮಾನ್ ವಿರುದ್ಧ 11-0 ಗೋಲುಗಳ ಅಂತರದ ಅಮೋಘ ಗೆಲುವು ದಾಖಲಿಸಿತ್ತು.

ಪ್ರಶಸ್ತಿ ಫೇವರಿಟ್ ಎನಿಸಿಕೊಂಡಿರುವ ವಿಶ್ವ ನಂ.5 ಶ್ರೇಯಾಂಕದ ಭಾರತೀಯ ಪಡೆ, ಪಂದ್ಯದುದ್ದಕ್ಕೂ ಪಾಕ್ ಮೇಲೆ ಪ್ರಹಾರ ಮಾಡಿತ್ತು.

ವಿಶ್ವ ನಂ.13 ಶ್ರೇಯಾಂಕದ ಪಾಕಿಸ್ತಾನ ಮೊದಲ ನಿಮಿಷದಲ್ಲೇ ಗೋಲು ಬಾರಿಸಿ ಭಾರತಕ್ಕೆ ಆಘಾತ ನೀಡಿತ್ತು. ಆದರೆ 24ನೇ ನಿಮಿಷದಲ್ಲಿ ಮನ್‌ಪ್ರೀತ್ ಸಿಂಗ್ ಮೂಲಕ ಸಮಬಲದ ಗೋಲು ಮೂಡಿ ಬಂದಿತ್ತು.

ಬಳಿಕ ಪಂದ್ಯದ 32ನೇ ನಿಮಿಷದಲ್ಲಿ ಮಂದೀಪ್ ಸಿಂಗ್ ಮತ್ತು 42ನೇ ನಿಮಿಷದಲ್ಲಿ ದಿಲ್‌ಪ್ರೀತ್ ಪ್ರೀತ್ ವಿಜಯದ ಗೋಲುಗಳನ್ನು ಬಾರಿಸಿದರು.

ಭಾರತ ಮುಂದಿನ ಪಂದ್ಯದಲ್ಲಿ ಭಾನುವಾರದಂದು ಜಪಾನ್ ಸವಾಲನ್ನು ಎದುರಿಸಲಿದೆ.