ಏಷ್ಯನ್ ಗೇಮ್ಸ್ 2018 ದಿನ 10; ಭಾರತಕ್ಕೆ ಒಟ್ಟು 50 ಪದಕ

ಹೊಸದಿಲ್ಲಿ: ಇಂಡೋನೇಷ್ಯಾದ ಜಕಾರ್ತ ಹಾಗೂ ಪ್ಯಾಲೆಂಬಾಂಗ್‌ನಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ ಏಷ್ಯನ್ ಗೇಮ್ಸ್ 2018 ಕ್ರೀಡಾಕೂಟದಲ್ಲಿ ಹತ್ತನೇ ದಿನದ ಸ್ಪರ್ಧೆಗಳು ಕೊನೆಗೊಂಡಿರುವಂತೆಯೇ ಭಾರತದ ಒಟ್ಟು ಪದಕಗಳ ಸಂಖ್ಯೆ 50ಕ್ಕೆ ಏರಿಕೆಯಾಗಿದೆ.

ಒಂಬತ್ತು ಚಿನ್ನದ ಪದಕ ಸೇರಿದಂತೆ ಒಟ್ಟು 50 ಪದಕಗಳನ್ನು ಗೆದ್ದಿರುವ ಭಾರತ ಪದಕ ಬೇಟೆಯಲ್ಲಿ ಎಂಟನೇ ಸ್ಥಾನದಲ್ಲಿದೆ. ಇದರಲ್ಲಿ 19 ಬೆಳ್ಳಿ ಹಾಗೂ 22 ಕಂಚಿನ ಪದಕಗಳು ಸೇರಿವೆ.

ಪದಕಗಳ ಬೇಟೆಯಲ್ಲಿ ಅಗ್ರಸ್ಥಾನದಲ್ಲಿರುವ ಚೀನಾ 97 ಚಿನ್ನ ಸೇರಿದಂತೆ ಒಟ್ಟು 206 ಪದಕಗಳನ್ನು ಗೆದ್ದಿವೆ. ಎರಡು ಹಾಗೂ ಮೂರನೇ ಸ್ಥಾನದಲ್ಲಿರುವ ಜಪಾನ್ ಹಾಗೂ ರಿಪಬ್ಲಿಕ್ ಆಫ್ ಕೊರಿಯಾ ಅನುಕ್ರಮವಾಗಿ 43 ಹಾಗೂ 32 ಬಂಗಾರದ ಪದಕಗಳನ್ನು ಬಾಚಿಕೊಂಡಿದೆ.


10ನೇ ದಿನವಾದ ಮಂಗಳವಾರ ಮನ್‌ಜೀತ್ ಸಿಂಗ್ ಚಿನ್ನ ಹಾಗೂ ಪಿವಿ ಸಿಂಧೂ ಅವರ ಬೆಳ್ಳಿ ಪದಕಗಳು ಗಮನಾರ್ಹ ಸಾಧನೆಯೆನಿಸಿತ್ತು. ಇನ್ನು ಕುರಾಶ್‌ನಲ್ಲಿ ಅನಿರೀಕ್ಷಿತ ಬೆಳ್ಳಿ ಹಾಗೂ ಕಂಚಿನ ಪದಕಗಳು ಭಾರತದ ಐತಿಹಾಸಿಕ ಸಾಧನೆಗೆ ಕೈಗನ್ನಡಿಯಾಗಿತ್ತು.

ಅಥ್ಲೀಟಿಕ್ಸ್‌ನಲ್ಲಿ ಭಾರತ ಇದುವರೆಗೆ ಅತಿ ಹೆಚ್ಚು 11 ಪದಕಗಳನ್ನು ಗೆದ್ದಿದೆ. ಇನ್ನು ಶೂಟಿಂಗ್‌ನಲ್ಲಿ ಒಂಬತ್ತು, ವೂಶೂನಲ್ಲಿ ನಾಲ್ಕು ಮತ್ತು ರೆಸ್ಲಿಂಗ್, ರೋವಿಂಗ್ ಹಾಗೂ ಟೆನಿಸ್‌ನಲ್ಲಿ ತಲಾ ಮೂರು ಪದಕಗಳು ಬಂದಿವೆ.