ರಾಮ್‌ಕುಮಾರ್‌, ಪೇಸ್‌ಗೆ ಸೋಲು

ಹೊಸದಿಲ್ಲಿ: ಇತ್ತೀಚೆಗೆ ಮುಕ್ತಾಯಗೊಂಡ ಹಾಲ್‌ ಆಫ್‌ ಫೇಮ್‌ ಓಪನ್‌ ಟೂರ್ನಿಯಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದ ಭಾರತದ ರಾಮ್‌ಕುಮಾರ್‌ ರಾಮನಾಥನ್‌, ಅಮೆರಿಕದ ಅಟ್ಲಾಂಟಾ ಓಪನ್‌ ಟೆನಿಸ್‌ ಟೂರ್ನಿಯ ಪುರುಷರ ಸಿಂಗಲ್ಸ್‌ ವಿಭಾಗದ ಆರಂಭಿಕ ಸುತ್ತಿನಲ್ಲಿ ಸೋತು ಹೋರಾಟ ಕೊನೆಗೊಳಿಸಿದ್ದಾರೆ.

ಇವರಲ್ಲದೆ ಅನುಭವಿ ಆಟಗಾರ ಲಿಯಾಂಡರ್‌ ಪೇಸ್‌ ಸಹ ಮೊದಲ ಸುತ್ತಿನಲ್ಲಿಯೇ ಆಘಾತ ಅನುಭವಿಸಿ ನಿರ್ಗಮಿಸಿದ್ದಾರೆ.

ಕಳೆದ ವಾರ ನ್ಯೂಪೋರ್ಟ್‌ ಟೂರ್ನಿಯಲ್ಲಿ ರನ್ನರ್‌ ಅಪ್‌ ಸ್ಥಾನ ಗಳಿಸಿದ್ದ ರಾಮ್‌ಕುಮಾರ್‌, ಬುಧವಾರ ನಡೆದ ಮೊದಲ ಸುತ್ತಿನಲ್ಲಿ 4-6, 4-6 ನೇರ ಸೆಟ್‌ಗಳಿಂದ ಅಮೆರಿಕದ ಟೇಲರ್‌ ಫ್ರಿಟ್ಜ್‌ ವಿರುದ್ಧ ಸೋಲುಂಡರು.

ಲಿಯಾಂಡರ್‌ ಪೇಸ್‌ ಮತ್ತು ಅಮೆರಿಕ ಜತೆಗಾರ ಜೇಮ್ಸ್‌ ಸೆರೆಟಾನಿ ಜೋಡಿ ಮೊದಲ ಸುತ್ತಿನಲ್ಲಿ 5-7, 1-6ನೇರ ಸೆಟ್‌ಗಳಿಂದ ಅಮೆರಿಕದ ಮೈಕ್‌ ಬ್ರಯಾನ್‌ ಮತ್ತು ಫ್ರಾನ್ಸ್‌ನ ತಿಯಾಫೊ ಜೋಡಿ ವಿರುದ್ಧ ಪರಾಭವಗೊಂಡಿದ್ದಾರೆ.

ಇವರಲ್ಲದೆ ಭಾರತದ ಪ್ರಜ್ಞೇಶ್‌ ಗುಣೇಶ್ವರನ್‌ ಸಹ ಮೊದಲ ಸುತ್ತಿನಲ್ಲಿ ಸ್ಲೊವಾಕಿಯಾದ ಲೂಕಾಸ್‌ ಲಾಕೊ ವಿರುದ್ಧ ಸೋಲುಂಡಿದ್ದರು. ಇದರೊಂದಿಗೆ ಟೂರ್ನಿಯಲ್ಲಿ ಭಾರತದ ಹೋರಾಟ ಕೊನೆಗೊಂಡಂತಾಗಿದೆ.