ಪ್ರಶಸ್ತಿ ಮೇಲೆ ಕಣ್ಣಿಟ್ಟ ಫೆಡರರ್ ಸೆಮೀಸ್‌ಗೆ ಲಗ್ಗೆ

ಮೆಲ್ಬರ್ನ್: ಪ್ರತಿಷ್ಠಿತ ಆಸ್ಟ್ರೇಲಿಯನ್ ಓಪನ್ ಟೆನಿಸ್ ಟೂರ್ನಮೆಂಟ್ನಲ್ಲಿ ಅಮೋಘ ನಿರ್ವಹಣೆ ಮುಂದುವರಿಸಿರುವ ಸ್ವಿಜರ್ಲೆಂಡ್ನ ಹಿರಿಯ ಅನುಭವಿ ಆಟಗಾರ ರೋಜರ್ ಫೆಡರರ್, ಸೆಮಿಫೈನಲ್ ಹಂತಕ್ಕೆ ಪ್ರವೇಶಿಸಿದ್ದಾರೆ.

ಬುಧವಾರ ಪುರುಷ ಸಿಂಗಲ್ಸ್ ವಿಭಾಗದಲ್ಲಿ ನಡೆದ ಜಿದ್ದಾಜಿದ್ದಿನ ಕ್ವಾರ್ಟರ್ ಫೈನಲ್ ಮುಖಾಮುಖಿಯಲ್ಲಿ 19ನೇ ಶ್ರೇಯಾಂಕಿತ ಚೆಕ್ ಗಣರಾಜ್ಯದ ಥಾಮಸ್ ಬೆರ್ಡಿಚ್ ಅವರನ್ನು 7-6(1), 6-3, 6-4ರ ಕಠಣ ಅಂತರದಲ್ಲಿ ಮಣಿಸಿದ ಎರಡನೇ ಶ್ರೇಯಾಂಕಿತರಾಗಿರುವ ಫೆಡರರ್, ಅಂತಿಮ ನಾಲ್ಕರ ಘಟ್ಟಕ್ಕೆ ಮುನ್ನಡೆದರು.

ಈ ಮೂಲಕ ತಮ್ಮ ವೃತ್ತಿ ಜೀವನದಲ್ಲಿ ಒಂಬತ್ತನೇ ಬಾರಿಗೆ ಆಸ್ಟ್ರೇಲಿಯನ್ ಓಪನ್ ಸೆಮಿಫೈನಲ್ ಹಂತಕ್ಕೆ ಪ್ರವೇಶಿಸಿದ ಸಾಧನೆ ಮಾಡಿದರು. ಒಟ್ಟಿನಲ್ಲಿ 43ನೇ ಬಾರಿಗೆ ಗ್ರ್ಯಾನ್ ಸ್ಲಾಮ್ ಸೆಮಿಫೈನಲ್ ಹಾಗೂ 22ನೇ ಬಾರಿಗೆ ಸೆಟ್ವೊಂದನ್ನು ಕಳೆದುಕೊಳ್ಳದೇ ಸೆಮಿಫೈನಲ್ ಪ್ರವೇಶಿಸಿದ ದಾಖಲೆಗೆ ಅರ್ಹವಾದರು.

ಆಗಲೇ ಐದು ಬಾರಿ ಆಸ್ಟ್ರೇಲಿಯನ್ ಓಪನ್ ಗ್ರ್ಯಾನ್ ಸ್ಲಾಮ್ ಕಿರೀಟ ಗೆದ್ದುಕೊಂಡಿರುವ ವಿಶ್ವ ನಂ.2 ರ್ಯಾಂಕ್ನ ರೋಜರ್ ಫೆಡರರ್, ಆರನೇ ಆಸ್ಟ್ರೇಲಿಯನ್ ಓಪನ್ ಹಾಗೂ ಒಟ್ಟಾರೆಯಾಗಿ ದಾಖಲೆಯ 20ನೇ ಗ್ರ್ಯಾನ್ ಸ್ಲಾಮ್ ಕಿರೀಟದ ಮೇಲೆ ಕಣ್ಣಿಟ್ಟಿದ್ದಾರೆ.

36ರ ಹರೆಯದ ಫೆಡರರ್ ಇದೀಗ ನಡೆಯಲಿರುವ ಫೈನಲ್ಗಾಗಿನ ಹೋರಾಟದಲ್ಲಿ ದಕ್ಷಿಣ ಕೊರಿಯಾದ ಚಂಗ್ ಹ್ಯೂಯಾನ್ ಸವಾಲನ್ನು ಎದುರಿಸಲಿದ್ದಾರೆ. ಮಗದೊಂದು ಸೆಮಿ ಮುಖಾಮುಖಿಯಲ್ಲಿ ಚಂಗ್ ಅವರು ಅಮೆರಿಕದ ಟೆನ್ನಿಸ್ ಸ್ಯಾಂಡ್ಗ್ರೆನ್ ವಿರುದ್ಧ 6-4, 7-6(1), 6-3ರ ಅಂತರದ ಗೆಲುವು ದಾಖಲಿಸಿದರು.

ಮಗದೊಂದು ಸೆಮಿ ಹೋರಾಟದಲ್ಲಿ ಆರನೇ ಶ್ರೇಯಾಂಕಿತರಾದ ಮರಿನ್ ಸಿಲಿಚ್ ಅವರು ಬ್ರಿಟನ್ನ ಕೈಲ್ ಎಡ್ಮಂಡ್ ಅವರನ್ನು ಎದುರಿಸಲಿದ್ದಾರೆ. ಇದಕ್ಕೂ ಮೊದಲು ಅಂತಿಮ ಎಂಟರ ಘಟ್ಟದ ಹೋರಾಟದಲ್ಲಿ ವಿಶ್ವ ನಂ.1 ಆಟಗಾರ ಸ್ಪೇನ್ನ ರಾಫೆಲ್ ನಡಾಲ್ ಗಾಯದಿಂದಾಗಿ ಹಿಂದೆ ಸರಿದಿರುವ ಹಿನ್ನಲೆಯಲ್ಲಿ ಸಿಲಿಚ್ ಮುನ್ನಡೆದಿದ್ದರು.