ಬ್ಯಾಡ್ಮಿಂಟನ್ ವಿಶ್ವ ಚಾಂಪಿಯನ್‌ಶಿಪ್; ಪದಕ ಖಚಿತಪಡಿಸಿದ ಸಾಯ್ ಪ್ರಣೀತ್ ಸೆಮೀಸ್‌ಗೆ ಲಗ್ಗೆ

ಬಾಸೆಲ್‌ (ಸ್ವಿಜರ್ಲೆಂಡ್‌): ಭಾರತದ ಯುವ ಭರವಸೆಯ ಆಟಗಾರ ಸಾಯಿ ಪ್ರಣೀತ್, ಇಲ್ಲಿ ಸಾಗುತ್ತಿರುವ 2019ನೇ ಸಾಲಿನ ಬಿಡಬ್ಲ್ಯುಎಫ್‌ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಸೆಮಿಫೈನಲ್‌ಗೇರಿದ ಸಾಧನೆ ಮಾಡಿದ್ದಾರೆ.

ಮಹಿಳೆಯರ ಸಿಂಗಲ್ಸ್‌ ವಿಭಾಗದಲ್ಲಿ ಪಿವಿ ಸಿಂಧೂ ಅಂತಿಮ ನಾಲ್ಕರ ಘಟ್ಟ ಪ್ರವೇಶಿಸಿದ ಬೆನ್ನಲ್ಲೇ ಪುರುಷರ ಸಿಂಗಲ್ಸ್‌ ವಿಭಾಗದಲ್ಲಿ ಸಾಯ್ ಸೆಮಿಫೈನಲ್‌ಗೆ ಲಗ್ಗೆಯಿಟ್ಟಿದ್ದಾರೆ.

ಇದರೊಂದಿಗೆ ಪಿವಿ ಸಿಂಧೂ ಹಾಗೂ ಸಾಯ್ ಪ್ರಣೀತ್ ಪದಕವೊಂದನ್ನು ಖಚಿತಪಡಿಸಿದ್ದಾರೆ. ಸಿಂಧೂ ಐದನೇ ಬಾರಿಗೆ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಪದಕ ಗೆಲ್ಲಲಿದ್ದಾರೆ.

ಶುಕ್ರವಾರ ನಡೆದ ಪುರುಷರ ಸಿಂಗಲ್ಸ್‌ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಸಾಯ್‌ ಪ್ರಣೀತ್‌ ಅವರು ಇಂಡೋನೇಷ್ಯಾದ ಜೋನಾಥನ್ ಕ್ರಿಸ್ಟಿ ವಿರುದ್ದ 24-22, 21-14 ರ ಅಂತರದಲ್ಲಿ ಗೆದ್ದು ಬೀಗಿದರು.

ಇದರೊಂದಿಗೆ ಸಿಂಧೂ ಬೆನ್ನಲ್ಲೇ ಸಾಯ್ ಭಾರತದ ಪದಕದ ನಿರೀಕ್ಷೆಯಾಗಿ ಹೊರಹೊಮ್ಮಿದ್ದಾರೆ. ಈ ಮೊದಲು 5ನೇ ಶ್ರೇಯಾಂಕದ ಸಿಂಧೂ, ಚೈನೀಸ್ ತೈಪೆಯ ತಾಯಿ ತ್ಸು ಯಿಂಗ್ ವಿರುದ್ಧ 12-21, 23-21, 21-19ರ ಅಂತರದ ಕಠಿಣ ಗೆಲುವು ದಾಖಲಿಸಿದರು.