ಕೌಲೂನ್:ರಾಷ್ಟ್ರೀಯ ಚಾಂಪಿಯನ್ ಸಮೀರ್ ವರ್ಮಾ ಮತ್ತು ಭರವಸೆಯ ಆಟಗಾರ್ತಿ ಪಿ. ಸಿಂಧೂ ಇಲ್ಲಿ ನಡೆಯುತ್ತಿರುವ ಹಾಂಕಾಂಗ್ ಓಪನ್ ಸೂಪರ್ ಸೀರೀಸ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಫೈನಲ್ಗೆ ಲಗ್ಗೆಯಿಟ್ಟಿದ್ದಾರೆ.
ಶನಿವಾರ ನಡೆದ ಪುರುಷರ ಸಿಂಗಲ್ಸ್ ಸೆಮಿಫೈನಲ್ ಕದನದಲ್ಲಿ ಮಿಂಚಿದ ಸಮೀರ್ 21-19, 24-22 ನೇರ ಗೇಮ್ಗಳಿಂದ ವಿಶ್ವದ ಮೂರನೇ ರಾರಯಂಕಿನ ಆಟಗಾರ ಜಾನ್ ಓ ಜೊರ್ಗೆನ್ಸೆನ್ಗೆ ಅಚ್ಚರಿಯ ಆಘಾತ ನೀಡಿ ಪ್ರಶಸ್ತಿ ಸುತ್ತು ತಲುಪಿದರು. ಮಹಿಳಾ ಸಿಂಗಲ್ಸ್ ಸೆಮಿಫೈನಲ್ನಲ್ಲಿ ಒಲಿಂಪಿಕ್ ಪದಕ ವಿಜೇತೆ ಹಾಗೂ ವಿಶ್ವದ 9ನೇ ರಾರಯಂಕಿನ ಸಿಂಧೂ 21-14, 21-16 ನೇರ ಗೇಮ್ಗಳಿಂದ ಹಾಂಕಾಂಗ್ನ ನ್ಗಾನ್ ಯಿ ಚೆವುಂಗ್ ವಿರುದ್ಧ ಸುಲಭವಾಗಿ ಗೆದ್ದು ಮುನ್ನಡೆದಿದ್ದಾರೆ.
ಹಿಂದಿನ ವಾರವಷ್ಟೇ ಚೀನಾ ಓಪನ್ ಸೂಪರ್ ಸೀರೀಸ್ ಕಿರೀಟ ಎತ್ತಿ ಹಿಡಿದಿರುವ ಸಿಂಧೂ, ಪ್ರಶಸ್ತಿ ಸುತ್ತಿನಲ್ಲಿ ತೈವಾನ್ನ ತಾಯ್ ಟ್ಜು ಯಿಂಗ್ ವಿರುದ್ಧ ಕಣಕ್ಕಿಳಿಯಲಿದ್ದಾರೆ. ಮತ್ತೊಂದು ಸೆಮೀಸ್ ಕದನದಲ್ಲಿ ತಾಯ್ ವಿಶ್ವದ ಅಗ್ರಮಾನ್ಯ ಆಟಗಾರ್ತಿ ಸ್ಪೇನ್ನ ಕ್ಯಾರೊಲಿನಾ ಮರಿನ್ ಅವರನ್ನು ಸೋಲಿಸಿ ಫೈನಲ್ ತಲುಪಿದ್ದಾರೆ. ಒಲಿಂಪಿಕ್ ಚಿನ್ನದ ಪದಕ ವಿಜೇತ ಮರಿನ್ 17-21, 21-14, 16-21 ಗೇಮ್ಗಳಿಂದ ತಾಯ್ ಜ್ಟು ವಿರುದ್ಧ ಪರಾಭವಗೊಂಡರು.
ಕಳೆದ ವಾರ ಪ್ರತಿಷ್ಠಿತ ಚೀನಾ ಸೂಪರ್ ಸೀರೀಸ್ ಪ್ರೀಮಿಯರ್ ಮುಡಿಗೇರಿಸಿಕೊಂಡಿದ್ದ ಡೆನ್ಮಾರ್ಕ್ನ ಜೊರ್ಗೆನ್ಸೆನ್ ವಿರುದ್ಧ ಅದ್ಭುತ ಪ್ರದರ್ಶನ ನೀಡಿದ 22 ವರ್ಷದ ಸಮೀರ್, ಎರಡು ಗೇಮ್ಗಳಲ್ಲೂ ಕೆಚ್ಚೆದೆಯ ಪ್ರದರ್ಶನ ತೋರಿ ಇದೇ ಮೊದಲ ಬಾರಿ ಸೂಪರ್ ಸೀರೀಸ್ ಟೂರ್ನಿಯಲ್ಲಿ ಅಂತಿಮ ಘಟ್ಟಕೇರಿದ ಸಾಧನೆ ಮಾಡಿದರು.
ಅರ್ಹತಾ ಸುತ್ತಿನ ವಿಜೇತನ ವಿರುದ್ಧ ಗೆಲ್ಲುವ ಮೂಲಕ ಟೂರ್ನಿಯಲ್ಲಿ ಅಭಿಯಾನ ಆರಂಭಿಸಿ ಫೈನಲ್ ಪ್ರವೇಶಿಸಿರುವ ಸಮೀರ್, ಪ್ರಶಸ್ತಿಗಾಗಿ ಸ್ಥಳೀಯ ಫೇವರಿಟ್ ನ್ಗಾ ಕಾ ಲಾಂಗ್ ಅಂಗಸ್ ವಿರುದ್ಧ ಸೆಣಸಲಿದ್ದಾರೆ.
ವಿಶ್ವ ರಾರಯಂಕಿಂಗ್ನಲ್ಲಿ ಸಮೀರ್ 43ನೇ ಸ್ಥಾನದಲ್ಲಿದ್ದರೆ, ಜೊರ್ಗೆನ್ಸೆನ್ ಮೂರನೇ ಸ್ಥಾನದಲ್ಲಿದ್ದಾರೆ. ಆದರೆ ಶನಿವಾರದ ಪಂದ್ಯದಲ್ಲಿ ಇದ್ಯಾವುದೂ ಪರಿಗಣನೆಗೆ ಬರಲಿಲ್ಲ. 46 ನಿಮಿಷಗಳಜಿದ್ದಾಜಿದ್ದಿನ ಹಣಾಹಣಿಯಲ್ಲಿ ಬಲ ಪ್ರದರ್ಶಿಸಿದ ಸೌರಭ್ ವರ್ಮಾ ಸಹೋದರ ಸಮೀರ್ ಎದುರಾಳಿಯ ಎಲ್ಲಾ ಸವಾಲಗಳನ್ನು ದಿಟ್ಟವಾಗಿ ಮೆಟ್ಟಿ ನಿಂತರು.
ವೃತ್ತಿ ಬದುಕಿನ ಸ್ಮರಣೀಯ ಜಯ
ತಮ್ಮ ವೃತ್ತಿ ಬದುಕಿನ ಸ್ಮರಣೀಯ ಜಯಗಳಲ್ಲೊಂದಾದ ಈ ಪಂದ್ಯದಲ್ಲಿ ಸಮೀರ್ ಮೊದಲ ಗೇಮ್ನಲ್ಲಿ 12-7ರಲ್ಲಿ ಮುನ್ನಡೆ ಗಳಿಸಿದರು. ಆದರೆ ತಿರುಗೇಟು ನೀಡಿದ ಜೊರ್ಗೆನ್ಸೆನ್ ವಿರಾಮದ ವೇಳೆಗೆ 10-11ರಲ್ಲಿ ಹಿನ್ನಡೆ ತಗ್ಗಿಸಿದರು. ಸಾಕಷ್ಟು ಅನುಭವ ಹೊಂದಿರುವ ಜೊರ್ಗೆನ್ಸೆನ್, ಇಡೀ ಅಂಗಳದಲ್ಲಿ ಸಮೀರ್ ಓಡಾಡುವಂತೆ ಮಾಡಿದರೂ ಗೊಂದಲಕ್ಕೀಡಾಗದ ಸಮೀರ್ 17-17ರಲ್ಲಿ ಪ್ರಬಲ ಸವಾಲು ನೀಡಿದರಲ್ಲದೆ ಗೇಮ್ ಗೆದ್ದು ನೆರದಿದ್ದವರಲ್ಲಿ ಅಚ್ಚರಿ ಮೂಡಿಸಿದರು.
ದ್ವಿತೀಯ ಗೇಮ್ನಲ್ಲಿ ಡೆನ್ಮಾರ್ಕ್ ಆಟಗಾರ ಆಕ್ರಮಣಕಾರಿ ಆಟವಾಡಿ 11-5ರಲ್ಲಿ ಮುನ್ನಡೆ ಪಡೆದರಾದರೂ ಸಮೀರ್ ಮರು ಹೋರಾಟ ತೋರಿ 12-12 ಮತ್ತು 13-12ರಲ್ಲಿ ಅಂತರ ಕಾಯ್ದುಕೊಂಡರು. ಮತ್ತೆ ಜೊರ್ಗೆನ್ಸೆನ್ 20-17ರಲ್ಲಿ ಮೇಲುಗೈ ಸಾಧಿಸಿದರು. ಈ ಹಂತದಲ್ಲಿ ಸಮೀರ್ ಬಲಿಷ್ಠ ಸ್ಮ್ಯಾಷ್ಗಳನ್ನು ಸಿಡಿಸಿ 21-20ರಲ್ಲಿ ಮುನ್ನಡೆ ಗಳಿಸಿದ್ದಲ್ಲದೆ 24-22 ರಲ್ಲಿ ಗೇಮ್ ಗೆದ್ದು ನಿಟ್ಟುಸಿರು ಬಿಟ್ಟರು.