ಕಿಂಗ್‌ಸ್ಟನ್‌ (ಜಮೈಕಾ): ತವರಿನಂಗಳದಲ್ಲಿ ವೃತ್ತಿ ಬದುಕಿನ ತಮ್ಮ ಕೊನೆಯ ರೇಸ್‌ ಓಡಿದ ವಿಶ್ವದ ಅತಿ ವೇಗದ ಓಟಗಾರ ಉಸೇನ್‌ ಬೋಲ್ಟ್‌ ಅವರಿಗೆ ಇಲ್ಲಿನ ರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಸಾವಿರಾರು ಅಭಿಮಾನಿಗಳು ಭಾವನಾತ್ಮಕ ಬೀಳ್ಕೊಡುಗೆ ನೀಡಿದರು.
2002ರಲ್ಲಿ ವಿಶ್ವ ಜೂನಿಯರ್‌ ರೇಸ್‌ ಗೆಲ್ಲುವ ಮೂಲಕ ಅಂತಾರಾಷ್ಟ್ರೀಯ ವೃತ್ತಿ ಬದುಕು ಆರಂಭಿಸಿದ ಬೋಲ್ಟ್‌ ಸುಮಾರು 30 ಸಾವಿರಕ್ಕೂ ಅಧಿಕ ಪ್ರೇಕ್ಷ ಕರೆದುರು ''ಸೆಲ್ಯೂಟ್‌ ಟು ಎ ಲೆಜೆಂಡ್‌'' ರೇಸ್‌ನ 100 ಮೀ. ಓಟದಲ್ಲಿ ಸ್ವರ್ಣ ಪದಕ ಜಯಿಸಿದರು. 30 ವರ್ಷದ ಉಸೇನ್‌ ಬೋಲ್ಟ್‌ 10.03 ಸೆಕೆಂಡ್‌ಗಳಲ್ಲಿ ಗುರಿ ಮುಟ್ಟಿದರು. ''100 ಮೀಟರ್‌ ಓಟದಲ್ಲಿ ಮಾನಸಿಕ ಒತ್ತಡ ಎದುರಿಸುತ್ತೇನೆ ಎಂದು ನಾನು ಎಂದಿಗೂ ಯೋಚಿಸಿರಲಿಲ್ಲ,'' ಎಂದು ಮುಂಬರುವ ವಿಶ್ವ ಚಾಂಪಿಯನ್‌ಷಿಪ್‌ ಬಳಿಕ ಆಗಸ್ಟ್‌ನಲ್ಲಿ ನಿವೃತ್ತಿ ಹೇಳಲಿರುವ ಬೋಲ್ಟ್‌ ನುಡಿದರು.
ನಂತರ ಬೋಲ್ಟ್‌, ಕ್ರೀಡಾಂಗಣದಲ್ಲಿ ನೆರೆದಿದ್ದ ಅಭಿಮಾನಿಗಳು ಮತ್ತು ಬೆಂಬಲವನ್ನು ಕಂಡು ನಿಜವಾಗಿಯೂ ನಾನು ಮಾನಸಿಕ ಒತ್ತಡ ಎದುರಿಸಿದೆ ಎಂದರು. ಹಸಿರು ಮತ್ತು ಹಳದಿ ಧರಿಸಿ ತೊಟ್ಟಿದ್ದ ಜಮೈಕಾದ ಅಭಿಮಾನಿಗಳ ಎದುರು ಉಸೇನ್‌ ಬೋಲ್ಟ್‌ 100ಮೀ.ಓಡುವ ಮೂಲಕ ಅಭಿಮಾನಿಗಳ ಮನ ಗೆದ್ದರು. ಇದಕ್ಕೂ ಮುನ್ನ ಅವರಿಗೆ ಸಾವಿರಾರು ಅಭಿಮಾನಿಗಳು ಅದ್ಧೂರಿ ಸ್ವಾಗತ ಕೋರಿದರು.