ವಿಶ್ವ ಚಾಂಪಿಯನ್‌ಶಿಪ್; ಸೆಮೀಸ್‌ಗೆ ಸಿಂಧೂ, ಪದಕ ಖಚಿತ

ಹೊಸದಿಲ್ಲಿ: ಚೀನಾದ ನಾಂಜಿಂಗ್‌ನಲ್ಲಿ ನಡೆಯುತ್ತಿರುವ ಬಿಡಬ್ಲ್ಯುಎಫ್ ವಿಶ್ವ ಚಾಂಪಿಯನ್‌ಶಿಪ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಭಾರತದ ಅಗ್ರ ತಾರೆ ಪಿವಿ ಸಿಂಧೂ ಸೆಮಿಫೈನಲ್‌ಗೆ ಪ್ರವೇಶಿಸುವ ಮೂಲಕ ಕನಿಷ್ಠ ಕಂಚಿನ ಪದಕವನ್ನು ಖಚಿತಪಡಿಸಿಕೊಂಡಿದ್ದಾರೆ.

ಶುಕ್ರವಾರ ನಡೆದ ಮಹಿಳಾ ಸಿಂಗಲ್ಸ್ ವಿಭಾಗದ ಕ್ವಾರ್ಟರ್ ಫೈನಲ್ ಹೋರಾಟದಲ್ಲಿ ತಮ್ಮ ಬದ್ದ ವೈರಿ ಹಾಗೂ ಹಾಲಿ ಚಾಂಪಿಯನ್‌ ಜಪಾನ್‌ನ ನೊಝೊಮಿ ಓಕುಹಾರ ವಿರುದ್ಧ ಸಿಂಧೂ 21-17, 21-19ರ ಅಂತರದ ಗೆಲುವು ದಾಖಲಿಸಿದರು.

58 ನಿಮಿಷಗಳ ವರೆಗೂ ಸಾಗಿದ ಜಿದ್ದಾಜಿದ್ದಿನ ಹೋರಾಟದ ಅಂತಿಮದಲ್ಲಿ ಸಿಂಧೂ ಗೆಲುವಿನ ನಗೆ ಬೀರಿದರು.

ಮೂರನೇ ಶ್ರೇಯಾಂಕಿತೆಯಾಗಿರುವ ಸಿಂಧೂ ಇದೀಗ ನಡೆಯಲಿರುವ ಫೈನಲ್‌ಗಾಗಿನ ಹೋರಾಟದಲ್ಲಿ ಎರಡನೇ ಶ್ರೇಯಾಂಕಿತೆ ಜಪಾನ್‌ನವರೇ ಆಗಿರುವ ಅಕೇನ್ ಯಮಗುಚಿ ಸವಾಲನ್ನು ಎದುರಿಸಲಿದ್ದಾರೆ.

ಇನ್ನೊಂದೆಡೆ ಮಹಿಳಾ ಸಿಂಗಲ್ಸ್ ಕ್ವಾರ್ಟರ್‌ನಲ್ಲಿ ಅನುಭವಿ ಸೈನಾ ನೆಹ್ವಾಲ್, ಪುರುಷ ಸಿಂಗಲ್ಸ್ ಕ್ವಾರ್ಟರ್‌ನಲ್ಲಿ ಸಾಯ್ ಪ್ರಣೀತ್ ಮತ್ತು ಮಿಶ್ರ ಡಬಲ್ಸ್ ಎಂಟರ ಘಟ್ಟದಲ್ಲಿ ಸೋಲನುಭವಿಸಿರುವ ಅಶ್ವಿನಿ ಪೊನ್ನಪ್ಪ ಹಾಗೂ ಸಾತ್ವಿಕ್‌ಸಾಯ್‌ರಾಜ್ ರಾಂಕಿರೆಡ್ಡಿ ಜೋಡಿಯು ಕೂಟದಿಂದಲೇ ಹೊರ ನಡೆದಿದ್ದಾರೆ.