ಬ್ಯಾಡ್ಮಿಂಟನ್ ವಿಶ್ವ ಚಾಂಪಿಯನ್‌ಶಿಪ್: ಸಾಯಿ, ಪ್ರಣೋಯ್ 3ನೇ ಸುತ್ತಿಗೆ ಲಗ್ಗೆ

ಹೊಸದಿಲ್ಲಿ: ಭಾರತದ ಮುಂಚೂಣಿಯ ಬ್ಯಾಡ್ಮಿಂಟನ್‌ ಆಟಗಾರ ಎಚ್‌ ಎಸ್‌ ಪ್ರಣೋಯ್‌ ಹಾಗೂ ಸಾಯಿ ಪ್ರಣೀತ್ ಬ್ಯಾಡ್ಮಿಂಟನ್ ವಿಶ್ವಚಾಂಪಿಯನ್‌ಷಿಪ್‌ ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಮೂರನೇ ಸುತ್ತಿಗೆ ಪ್ರವೇಶಿಸಿದ ಸಾಧನೆ ಮಾಡಿದ್ದಾರೆ.

ಈ ಪೈಕಿ ಪ್ರಣೋಯ್ ಅತಿ ದೊಡ್ಡ ಯಶಸ್ಸು ಪಡೆದಿದ್ದು, ಐದು ಬಾರಿಯ ಚಾಂಪಿಯನ್‌ ಚೀನಾದ ಲಿನ್‌ ಡಾನ್‌ ಅವರನ್ನು ಮಣಿಸಿ ಮೂರನೇ ಸುತ್ತಿಗೇರಿದ್ದಾರೆ.

ಈ ಟೂರ್ನಿಯಲ್ಲಿ 30ನೇ ಶ್ರೇಯಾಂಕ ಹೊಂದಿರುವ ಪ್ರಣೋಯ್‌, 21-11, 13-21, 21-7 ಗೇಮ್‌ಗಳಿಂದ 11ನೇ ಶ್ರೇಯಾಂಕದ ಲಿನ್‌ ಡಾನ್‌ಗೆ ಸೋಲುಣಿಸಿದರು. 62 ನಿಮಿಷ ನಡೆದ ಈ ಪಂದ್ಯದಲ್ಲಿ ಮೂರು ಗೇಮ್‌ಗಳು ನಡೆದರೂ ಪ್ರಣೋಯ್‌ಗೆ ಸುಲಭ ಜಯ ದೊರೆಯಿತು.

ಮೊದಲ ಗೇಮ್‌ನಲ್ಲಿ ಪ್ರಣೋಯ್‌ ಕಷ್ಟಪಡದೇ ಮುನ್ನಡೆ ಸಾಧಿಸಿದರು. ಆದರೆ, ಎರಡನೇ ಗೇಮ್‌ನಲ್ಲಿ ಲಿನ್‌ ಡಾನ್‌ ಸುಧಾರಿಸಿಕೊಂಡು ಗೆದ್ದರಲ್ಲದೆ, ಮುನ್ನಡೆಯನ್ನು ಸರಿಗಟ್ಟಿದರು. ಆದರೆ, ಮೂರನೇ ಹಾಗೂ ನಿರ್ಣಾಯಕ ಗೇಮ್‌ನಲ್ಲಿ ಪ್ರಣಯ್‌ ನಿರಾಯಾಸವಾಗಿ ಗೆಲುವು ಕಂಡರು.

ಪ್ರಣೋಯ್‌ 2018ರ ಇಂಡೋನೇಷ್ಯಾ ಓಪನ್‌ ಹಾಗೂ 2015ರ ಫ್ರೆಂಚ್‌ ಓಪನ್‌ ಟೂರ್ನಿಯಲ್ಲಿ ಲಿನ್‌ ಡಾನ್‌ಗೆ ಆಘಾತ ನೀಡಿದ್ದರು.

ಇನ್ನೊಂದೆಡೆ ಸಾಯಿ ಪ್ರಣೀಯ್ ಕೊರಿಯಾದ ಲೀ ಡಾನ್ ಕ್ಯೂನ್ ವಿರುದ್ದ 21-16, 21-15ರ ಸುಲಭ ಗೆಲುವು ದಾಖಲಿಸಿ ಮುನ್ನಡೆದರು.

ಇನ್ನೊಂದೆಡೆ ಮಹಿಳಾ ಸಿಂಗಲ್ಸ್ ವಿಭಾಗದಲ್ಲಿ ಭಾರತದ ಪಿವಿ ಸಿಂಧೂ ಹಾಗೂ ಸೈನಾ ನೆಹ್ವಾಲ್ ಬುಧವಾರದಂದು ಕಣಕ್ಕಿಳಿಯಲಿದ್ದಾರೆ.