ಎಟಿಪಿ ರಾ0ಕಿಂಗ್‌: ಜೀವನ್‌ ಶ್ರೇಷ್ಠ ಸಾಧನೆ

ಹೊಸದಿಲ್ಲಿ: ದುಬೈನಲ್ಲಿ ಇತ್ತೀಚೆಗೆ ನಡೆದ ಎಟಿಪಿ 500 ಟೆನಿಸ್‌ ಟೂರ್ನಿಯಲ್ಲಿ ಸೆಮಿಫೈನಲ್‌ ಪ್ರವೇಶಿಸಿದ್ದ ಭಾರತದ ಜೀವನ್‌ ನೆಡುಂಚುಳಿಯನ್‌ ಸೋಮವಾರ ಬಿಡುಗಡೆಯಾದ ಎಟಿಪಿ ಡಬಲ್ಸ್‌ ರಾರ‍ಯಂಕಿಂಗ್‌ನಲ್ಲಿ ಇದೇ ಮೊದಲ ಬಾರಿ ವೃತ್ತಿ ಬದುಕಿನಲ್ಲಿ 68ನೇ ಸ್ಥಾನಕ್ಕೇರಿದ್ದಾರೆ. ಆದರೆ ಅನುಭವಿ ಆಟಗಾರ ಲಿಯಾಂಡರ್‌ ಪೇಸ್‌ 23 ಸ್ಥಾನ ಹಿಂಬಡ್ತಿ ಪಡೆದು 96ನೇ ಸ್ಥಾನಕ್ಕೆ ಜಾರಿದ್ದಾರೆ.

ಅರ್ಹತಾ ಸುತ್ತಿನ ಮೂಲಕ ಪ್ರಧಾನ ಘಟ್ಟ ಪ್ರವೇಶಿಸಿದ್ದ ಎಡಗೈ ಆಟಗಾರ ಜೀವನ್‌ ಮತ್ತು ಸಹ ಆಟಗಾರ ಪೂರವ್‌ ರಾಜಾ ಅಂತಿಮ ನಾಲ್ಕರ ಘಟ್ಟ ತಲುಪಿದ್ದರು. ಹೀಗಾಗಿ 225 ಅಂಕಗಳನ್ನು ತಮ್ಮದಾಗಿಸಿಕೊಂಡಿದ್ದರು. 17 ಸ್ಥಾನ ಜಿಗಿತ ಕಂಡಿರುವ ಪೂರವ್‌ ರಾಜಾ 79ನೇ ಸ್ಥಾನಕ್ಕೇರಿದ್ದಾರೆ. 38ನೇ ಸ್ಥಾನದಲ್ಲಿ ಅಬಾಧಿತರಾಗಿರುವ ರೋಹನ್‌ ಬೋಪಣ್ಣ ದೇಶದ ಅಗ್ರಮಾನ್ಯ ಡಬಲ್ಸ್‌ ಆಟಗಾರ ಎನಿಸಿದ್ದು, ಜೊತೆಗಾರ ದಿವಿಜ್‌ ಶರಣ್‌ 40ನೇ ಸ್ಥಾನದಲ್ಲಿದ್ದಾರೆ.

ಪುರುಷರ ಸಿಂಗಲ್ಸ್‌ ವಿಭಾಗದಲ್ಲಿ ಪ್ರಜ್ಞೇಶ್‌ ಗುಣೇಶ್ವರನ್‌ 3 ಸ್ಥಾನ ಜಾರಿದ್ದು, 97ನೇ ಸ್ಥಾನದಲ್ಲಿದ್ದರೆ, ರಾಮ್‌ಕುಮಾರ್‌ ರಾಮನಾಥನ್‌ (136), ಯೂಕಿ ಭಾಂಬ್ರಿ (171), ಸಾಕೇತ್‌ ಮೈನೇನಿ (246) ಮತ್ತು ಶಶಿ ಕುಮಾರ್‌ ಮುಕುಂದ್‌ (270) ನಂತರದ ಸ್ಥಾನಲ್ಲಿದ್ದಾರೆ.