ಕಣ್ಣೀರಿನೊಂದಿಗೆ ಸ್ಪರ್ಧೆಯಿಂದ ಹಿಂದೆ ಸರಿದ ತೃತೀಯ ಲಿಂಗಿ

ಗೋಲ್ಡ್‌ ಕೋಸ್ಟ್‌: ಕಾಮನ್‌ವೆಲ್ತ್‌ ಕ್ರೀಡಾಕೂಟದ ಇತಿಹಾಸದಲ್ಲೇ ಮೊದಲ ಬಾರಿಗೆ ಸ್ಪರ್ಧಿಸಿದ್ದ ನ್ಯೂಜಿಲೆಂಡ್‌ನ ತೃತೀಯ ಲಿಂಗಿ, ವೇಟ್‌ಲಿಫ್ಟರ್‌ ಲೌರೆಲ್‌ ಹಬ್ಬಾರ್ಡ್‌ ಭುಜದ ಮೂಳೆ ಜಾರಿದ ಕಾರಣ ಕಣ್ಣೀರಿಟ್ಟು ಸ್ಪರ್ಧೆಯಿಂದ ಹಿಂದೆ ಸರಿದರು.

ಹಿಂದೆ ಗೆವಿನ್‌ ಹಬ್ಬಾರ್ಡ್‌ ಆಗಿದ್ದ ಲೌರೆಲ್‌ 30ನೇ ವಯಸ್ಸಿನಲ್ಲಿ ಸ್ತ್ರೀ ಆಗಿ ಪರಿವರ್ತನೆಗೊಂಡರು. 40 ವರ್ಷದ ಹಬ್ಬಾರ್ಡ್‌ ಕಾಮನ್ವೆಲ್ತ್‌ನಲ್ಲಿ ಎಲ್ಲರ ಚರ್ಚೆಯ ವಿಷಯವಾಗಿದ್ದರು.

ಮಹಿಳೆಯರ ಜತೆಯಲ್ಲಿ ಹಬ್ಬಾರ್ಡ್‌ಗೆ ಸ್ಪರ್ಧಿಸಲು ಅವಕಾಶ ಮಾಡಿಕೊಟ್ಟಿರುವುದು ತಪ್ಪು ಎಂದು ಸಮೋವ್‌ನ ವೇಟ್‌ಲಿಫ್ಟಿಂಗ್‌ ಕೋಚ್‌ ಜೆರ್ರಿ ವಾಲ್‌ವರ್ಕ್‌ ಆರೋಪಿಸಿದ್ದಾರೆ. ಲಿಂಗ ಬದಲಾವಣೆ ಮಾಡಿಕೊಂಡರೂ ಪುರುಷರಲ್ಲಿರುವ ಶಸ್ತಿ ಅವರಲ್ಲಿದೆ ಎಂದಿದ್ದಾರೆ.

''ಕಾಮನ್‌ವೆಲ್ತ್‌ ಕ್ರೀಡಾಕೂಟದಲ್ಲಿ ನಾನು ಪಾಲ್ಗೊಳ್ಳುವ ಬಗ್ಗೆ ಬಂದಿರುವ ಟೀಕೆಗಳು ಅಥವಾ ಸಲಹೆಗಳ ಬಗ್ಗೆ ಕೇಳಿಲ್ಲ. ಆದ್ದರಿಂದ ಈ ಬಗ್ಗೆ ನನ್ನ ಅಭಿಪ್ರಾಯ ಹೇಳುವ ಅಗತ್ಯ ಇಲ್ಲ,'' ಎಂದು ವಿವಾದದ ಬಗ್ಗೆ ಹಬ್ಬಾರ್ಡ್‌ ಪ್ರತಿಕ್ರಿಯೆ ನೀಡಿದರು.

90+ ಕೆಜಿ ವಿಭಾಗದಲ್ಲಿ ಸ್ಪರ್ಧಿಸಿದ ಹಬ್ಬಾರ್ಡ್‌ ಅಂತಿಮ ಸುತ್ತಿನ ಸ್ನ್ಯಾಚ್‌ ವೇಳೆ ಭುಜದ ಮೂಳೆ ಜಾರಿದ ಕಾರಣ ಸ್ಪರ್ಧೆಯಿಂದ ಹಿಂದೆ ಸರಿದರು. ವೇಟ್‌ಲಿಫ್ಟಿಂಗ್‌ ಬಾರ್‌ ತಮ್ಮ ಹಿಂದಿನಿಂದ ನೆಲಕ್ಕೆ ಜಾರುವಂತೆ ಮಾಡಿದರು.