ಕೊನೆಗೂ ಗೆದ್ದ ಡೆಲ್ಲಿ

ಚೆನ್ನೈ : ಚೇತೋಹಾರಿ ಪ್ರದರ್ಶನ ನೀಡಿದ ಡೆಲ್ಲಿ ಡೈನಮೋಸ್‌ ತಂಡ ಪ್ರಸಕ್ತ ಸಾಲಿನ ಐಎಸ್‌ಎಲ್‌ನ 58ನೇ ಪಂದ್ಯದಲ್ಲಿ ಹಾಲಿ ಚಾಂಪಿಯನ್‌ ಚೆನ್ನೈಯಿನ್‌ ಎಫ್‌ಸಿ ವಿರುದ್ಧ ಜಯ ಗಳಿಸಿತು. ಡೆಲ್ಲಿ ಪಾಲಿಗೆ ಇದು ಮೊದಲ ಜಯ. ಪ್ರಸಕ್ತ ಲೀಗ್‌ನ ಮೊದಲ ಹಂತದಲ್ಲಿ ಗೆಲುವೇ ಕಾಣದೆ ವರ್ಷಾಂತ್ಯಗೊಳಿಸಿದ ಅಪಖ್ಯಾತಿಗೊಳಗಾಗುವುದರಿಂದ ತಂಡ ಸ್ವಲ್ಪದರಲ್ಲೇ ಪಾರಾಯಿತು.

ಇಲ್ಲಿನ ಜವಾಹಾರಲಾಲ್‌ ನೆಹರೂ ಕ್ರೀಡಾಂಗಣದಲ್ಲಿ ಶನಿವಾರ ನಡೆದ ಪಂದ್ಯದಲ್ಲಿ ಡೆಲ್ಲಿ 3-1 ಗೋಲ್‌ಗಳಿಂದ ಆತಿಥೇಯ ಚೆನ್ನೈಯಿನ್‌ಗೆ ಸೋಲುಣಿಸಿ ಇದೇ ಮೊದಲ ಬಾರಿ ಪೂರ್ಣ 3 ಅಂಕ ತನ್ನದಾಗಿಸಿಕೊಂಡಿತು. ಡೆಲ್ಲಿ ಪರ ಡೇನಿಯಲ್‌ ಲಾಲ್‌ಹ್ಲಿಂಪುಯಾ (16ನೇ ನಿ.), ಬಿಕ್ರಮ್‌ಜಿತ್‌ ಸಿಂಗ್‌ (78ನೇ ನಿ.) ಮತ್ತು ನಂದಕುಮಾರ್‌ ಸೆಕರ್‌ (82ನೇ ನಿ.) ತಲಾ ಒಂದು ಗೋಲ್‌ ಗಳಿಸಿ ಗೆಲುವಿನ ರೂವಾರಿಯೆನಿಸಿದರು. ಸೋತ ತಂಡದ ಪರ ರಾಫೀಲ್‌ ಆಗಸ್ಟೋ (39ನೇ ನಿ.) ಏಕೈಕ ಗೋಲ್‌ ದಾಖಲಿಸಿ ಸೋಲಿನ ಅಂತರ ತಗ್ಗಿಸಲಷ್ಟೇ ಶಕ್ತಗೊಂಡರು.