ಡೆನ್ಮಾರ್ಕ್‌ ಓಪನ್: ಪ್ರಶಸ್ತಿ ಸುತ್ತಿಗೆ ಲಗ್ಗೆಯಿಟ್ಟ ಸೈನಾ

ಹೊಸದಿಲ್ಲಿ: ದೇಶದ ಹಿರಿಯ ಅನುಭವಿ ಆಟಗಾರ್ತಿ ಸೈನಾ ನೆಹ್ವಾಲ್, ಪ್ರತಿಷ್ಠಿತ ಡೆನ್ಮಾರ್ಕ್ ಓಪನ್ ಸೂಪರ್ 750 ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ಫೈನಲ್‌ಗೆ ಪ್ರವೇಶಿಸಿದ್ದಾರೆ.

ಶನಿವಾರ ಮಹಿಳಾ ಸಿಂಗಲ್ಸ್ ವಿಭಾಗದಲ್ಲಿ ನಡೆದ ಹೋರಾಟದಲ್ಲಿ ಇಂಡೋನೇಷ್ಯಾದ ಜಾರ್ಜಿಯಾ ಮರಿಸ್ಕ ತಂಜುಂಗ್ ವಿರುದ್ಧ 21-11, 21-12ರ ಸುಲಭ ಗೆಲುವು ದಾಖಲಿಸಿದ ಸೈನಾ ಪ್ರಶಸ್ತಿ ಸುತ್ತಿಗೆ ಮುನ್ನುಗಿದರು.

ದೀರ್ಘ ಕಾಲದ ಬಳಿಕ ಹಳೆಯ ವೈಭವಕ್ಕೆ ಮರಳಿರುವ ಸೈನಾ, ಎದುರಾಳಿಗೆ ಯಾವುದೇ ಅವಕಾಶವನ್ನು ನೀಡಲಿಲ್ಲ. ಇದೀಗ ನಡೆಯಲಿರುವ ಫೈನಲ್ ಮುಖಾಮುಖಿಯಲ್ಲಿ ಚೈನೀಸ್ ತೈಪೆಯ ತೈ ತ್ಸು ಯಿಂಗ್ ಸವಾಲನ್ನು ಎದುರಿಸಲಿದ್ದಾರೆ.

2012ನೇ ಇಸವಿಯಲ್ಲಿ ಡೆನ್ಮಾರ್ಕ್ ಓಪನ್ ಮುಡಿಗೇರಿಸಿರುವ ಸೈನಾ ಇದೀಗ ಸುದೀರ್ಘ ಆರು ವರ್ಷಗಳ ಕಾಯುವಿಕೆಯ ನಂತರ ಎರಡನೇ ಬಾರಿಗೆ ಪ್ರತಿಷ್ಠಿತ ಕಿರೀಟದ ಮೇಲೆ ಕಣ್ಣಿಟ್ಟಿದ್ದಾರೆ.

ಕಾಮನ್‌ವೆಲ್ತ್ ಗೇಮ್ಸ್‌ ಚಿನ್ನದ ಪದಕ ವಿಜೇತೆಯಾಗಿರುವ ವಿಶ್ವ ನಂ. 10 ರ‍್ಯಾಂಕ್‌ನ ಸೈನಾ ಫೈನಲ್‌ನಲ್ಲೂ ಶ್ರೇಷ್ಠ ನಿರ್ವಹಣೆ ನೀಡುವ ಭರವಸೆಯಲ್ಲಿದ್ದಾರೆ.