ನೊವಾಕ್‌ ಜೊಕೊವಿಕ್‌ ಸೆಮಿಫೈನಲ್‌ಗೆ

ಲಂಡನ್‌: ವಿಶ್ವದ ಮಾಜಿ ನಂ.1 ಆಟಗಾರ ಹಾಗೂ ಮೂರು ಬಾರಿಯ ಚಾಂಪಿಯನ್‌ ಸರ್ಬಿಯಾದ ನೊವಾಕ್‌ ಜೊಕೊವಿಕ್‌, ವಿಂಬಲ್ಡನ್‌ ಗ್ರ್ಯಾನ್‌ ಸ್ಲ್ಯಾಮ್ ಟೂರ್ನಿಯ ಪುರುಷರ ಸಿಂಗಲ್ಸ್‌ನಲ್ಲಿ ಸೆಮಿಫೈನಲ್‌ ತಲುಪಿದ್ದಾರೆ.

ಇಲ್ಲಿನ ಆಲ್‌ ಇಂಗ್ಲೆಂಡ್‌ ಕ್ಲಬ್‌ ಅಂಗಣದಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಅನುಭವದ ಆಟ ಪ್ರದರ್ಶಿಸಿದ 12ನೇ ಶ್ರೇಯಾಂಕಿತ ಅಟಗಾರ ನೊವಾಕ್‌, 6-3, 3-6, 6-2, 6-2 ಅಂತರದ ನೇರ ಸೆಟ್‌ಗಳಿಂದ ಜಪಾನ್‌ನ ನಂ.1 ಆಟಗಾರ ಹಾಗೂ 24ನೇ ಶ್ರೇಯಾಂಕ ಹೊಂದಿದ್ದ ಕೀ ನಿಶಿಕೊರಿ ಅವರನ್ನು ಮಣಿಸಿದರು.

ಮೊಣಕೈ ನೋವಿನ ಸಮಸ್ಯೆಯಿಂದ ಚೇತರಿಸಿದ ಬಳಿಕ ಎಂದಿನ ಲಯಕ್ಕೆ ಮರಳಲು ಪರದಾಡುತ್ತಿರುವ ನೊವಾಕ್‌, ಸತತ ವೈಫಲ್ಯಗಳ ನಡುವೆ ವಿಂಬಲ್ಡನ್‌ ಸೆಮಿಫೈನಲ್‌ ಪ್ರವೇಶಿಸಿದ್ದಾರೆ. 2 ಗಂಟೆ 35 ನಿಮಿಷಗಳ ಕಾಲ ನಡೆದ ಪಂದ್ಯದಲ್ಲಿ 3 ಡಬಲ್‌ ಫಾಲ್ಟ್‌ ಎಸಗಿದರೂ 6 ಏಸ್‌ಗಳೊಂದಿಗೆ ಎದುರಾಳಿ ಮೇಲೆ ಒತ್ತಡ ಹೇರಿದ ನೊವಾಕ್‌, 2017ರ ವಿಂಬಲ್ಡನ್‌ ಬಳಿಕ ಮೊದಲ ಬಾರಿ ಗ್ರ್ಯಾನ್‌ ಸ್ಲ್ಯಾಮ್‌ ಟೂರ್ನಿಯ ಸೆಮಿಫೈನಲ್‌ ಹಂತಕ್ಕೇರುವಲ್ಲಿ ಯಶಸ್ವಿಯಾಗಿದ್ದಾರೆ.

ಇದೀಗ ವೃತ್ತಿ ಜೀವನದ 32ನೇ ಗ್ರ್ಯಾನ್‌ ಸ್ಲ್ಯಾಮ್‌ ಸೆಮಿಫೈನಲ್‌ನಲ್ಲಿ ವಿಶ್ವದ ನಂ.1 ಆಟಗಾರ ಸ್ಪೇನ್‌ನ ರಾಫೆಲ್‌ ನಡಾಲ್‌ ಅಥವಾ 4ನೇ ರ‍್ಯಾಂಕ್‌ನ ಆಟಗಾರ ಅರ್ಜೆಂಟಿನಾದ ಜುವಾನ್‌ ಮಾರ್ಟಿನ್‌ ಡೆಲ್‌ಪೋಟ್ರೊ ವಿರುದ್ಧ ಪೈಪೋಟಿ ನಡೆಸಲಿದ್ದಾರೆ. 12 ಗ್ರ್ಯಾನ್‌ ಸ್ಲ್ಯಾಮ್‌ ಸಿಂಗಲ್ಸ್‌ ಪ್ರಶಸ್ತಿಗಳ ಒಡೆಯ ನೊವಾಕ್‌, ಕ್ವಾರ್ಟರ್‌ ಫೈನಲ್‌ ಪಂದ್ಯದ ವೇಳೆ ಚೇರ್‌ ಅಂಪೈರ್‌ಗೆ ಕಳಪೆ ಗುಣಮಟ್ಟದ ರೆಫ್ರಿ ಎಂದು ಬೈದು ಅನಗತ್ಯ ವಿವಾದ ಮೈಮೇಲೆ ಎಳೆದುಕೊಂಡಿದ್ದಾರೆ.

''ರ‍್ಯಾಕೆಟ್‌ ಅನ್ನು ನೆಲಕ್ಕೆ ಬಡಿದರಿಂದ ರೆಫ್ರಿ ಎಚ್ಚರಿಕೆ ನೀಡಿದ್ದು ಅನಗತ್ಯವಾಗಿತ್ತು. ಏಕೆಂದರೆ 4ನೇ ಸೆಟ್‌ನಲ್ಲಿ ನಿಶಿಕೊರಿ ಕೂಡ ಇದೇ ರೀತಿ ಮಾಡಿದ್ದರು. ಆದರೆ ರೆಫ್ರಿ ಯಾವುದೇ ಎಚ್ಚರಿಕೆ ನೀಡಲಿಲ್ಲ. ಬದಲಾಗಿ ತಾನು ನೋಡಲಿಲ್ಲ ಎಂದರು. ಇದು ಸರಿಯಲ್ಲ,'' ಎಂದು ಪಂದ್ಯದ ಬಳಿಕ ಮಾತನಾಡಿದ ನೊವಾಕ್‌ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.