ಎಎಫ್‌ಸಿ ಕಪ್‌: ಮಿನರ್ವಗೆ ಮಾಡು ಇಲ್ಲ ಮಡಿ ಪಂದ್ಯ

ಕಾಠ್ಮಂಡು: ಗೆಲುವಿನ ಖಾತೆ ತೆರೆಯುವಲ್ಲಿ ವಿಫಲವಾಗಿರುವ ಮಾಜಿ ಐ-ಲೀಗ್‌ ಚಾಂಪಿಯನ್ಸ್‌ ಮಿನರ್ವ ಪಂಜಾಬ್‌ ತಂಡ ಬುಧವಾರ ನಡೆಯಲಿರುವ ಎಎಫ್‌ಸಿ ಕಪ್‌ ಗ್ರೂಪ್‌ ಪಂದ್ಯದಲ್ಲಿ ನೇಪಾಳ ಮೂಲದ ಮನಾಂಗ್‌ ಮರ್ಷಾ್ಯಂಗ್ಡಿ ಕ್ಲಬ್‌ ವಿರುದ್ಧ ಶತಾಯ ಗತಾಯ ಗೆಲ್ಲಲೇ ಬೇಕಾದ ಅನಿವಾರ್ಯ ಸ್ಥಿತಿಯಲ್ಲಿದೆ.

ಎಎಫ್‌ಸಿ ಕಪ್‌ನಲ್ಲಿ ಮಿನರ್ವ ತಂಡ ಈವರೆಗೂ ಜಯ ಗಳಿಸಿಲ್ಲ. ಮೂರು ಪಂದ್ಯಗಳನ್ನಾಡಿರುವ ಮಿನರ್ವ ತಂಡ ಸತತ ಡ್ರಾಗೆ ತೃಪ್ತಿಪಟ್ಟಿದೆ. 2017-18ರ ಐ-ಲೀಗ್‌ ಚಾಂಪಿಯನ್ಸ್‌ ಮಿನರ್ವ 'ಇ' ಗುಂಪಿನಲ್ಲಿ ಮೂರು ಅಂಕಗಳೊಂದಿಗೆ ಮೂರನೇ ಸ್ಥಾನದಲ್ಲಿದ್ದು ಇನ್ನೊಂದು ಪಂದ್ಯ ಸೋತರೆ ಅಥವಾ ಡ್ರಾ ಮಾಡಿಕೊಂಡರೆ ಮುಂದಿನ ಸುತ್ತಿಗೆ ಅರ್ಹತೆ ಗಳಿಸುವುದು ಕಷ್ಟವಾಗಲಿದೆ. ಹೀಗಾಗಿ ಮನಾಂಗ್‌ ವಿರುದ್ಧದ ಪಂದ್ಯದ ಮಿನರ್ವ ಪಾಲಿಗೆ 'ಮಾಡು ಇಲ್ಲವೇ ಮಡಿ' ಪಂದ್ಯ ಎನಿಸಿದೆ.

ಏಳು ಅಂಕ ಹೊಂದಿರುವ ಚೆನ್ನೈಯಿನ್‌ ಎಫ್‌ಸಿ ಸದ್ಯ ಗುಂಪಿನಲ್ಲಿ ಮುಂಚೂಣಿಯಲ್ಲಿದ್ದರೆ, ಅಬಾಹನಿ ಢಾಕಾ ನಾಲ್ಕು ಅಂಕಗಳೊಂದಿಗೆ ದ್ವಿತೀಯ ಸ್ಥಾನದಲ್ಲಿದೆ. ಈ ಮಧ್ಯೆ ನಾಲ್ಕು ತಂಡಗಳನ್ನೊಳಗೊಂಡಿರುವ ಗುಂಪಿನಲ್ಲಿ ಮನಾಂಗ್‌ ಕೇವಲ ಒಂದು ಅಂಕದೊಂದಿಗೆ ಕೆಳ ಸ್ಥಾನದಲ್ಲಿದೆ. ಗುಂಪಿನಲ್ಲಿ ಅಗ್ರಸ್ಥಾನ ಪಡೆಯುವ ಒಂದು ತಂಡ ಮಾತ್ರ ಅಂತರ ವಲಯ ಪ್ಲೇ-ಆಫ್‌ ಸೆಮಿಫೈನಲ್ಸ್‌ಗೆ ಅರ್ಹತೆ ಗಳಿಸಲಿದೆ.