ಡೋಪಿಂಗ್‌: ಕಿರ್ವಾಗೆ ನಿಷೇಧ

ಪ್ಯಾರಿಸ್‌: ಡೋಪಿಂಗ್‌ ನಿಯಮ ಉಲ್ಲಂಘಿಸಿದ ಪರಿಣಾಮ 2016ರ ರಿಯೊ ಒಲಿಂಪಿಕ್‌ ಮ್ಯಾರಥಾನ್‌ನ ಬೆಳ್ಳಿ ಪದಕ ವಿಜೇತೆ ಕೀನ್ಯಾ ಮೂಲದ ಬಹ್ರೇನ್‌ನ ಯುನೈಸಿ ಜೆಪ್ಕಿರುಯಿ ಕಿರ್ವಾ ನಾಲ್ಕು ವರ್ಷಗಳ ತಾತ್ಕಾಲಿಕ ಅಮಾನತು ಶಿಕ್ಷೆಗೆ ಒಳಗಾಗಿದ್ದಾರೆ ಎಂದು ಅಥ್ಲೆಟಿಕ್ಸ್‌ ಇಂಟಿಗ್ರಿಟಿ ಯೂನಿಟ್‌(ಎಐಯು) ಸೋಮವಾರ ಪ್ರಕಟಿಸಿದೆ. ಕಿರ್ವಾ ಅವರ ರಕ್ತದ ಮಾದರಿಯಲ್ಲಿ ನಿಷೇಧಿತ ಪದಾರ್ಥ ಸೇವಿಸಿರುವುದು ಪತ್ತೆಯಾದ ಕಾರಣ ಕಳೆದ ಮೇ ನಿಂದಲೇ ಕಿರ್ವಾ ತಾತ್ಕಾಲಿಕ ಅಮಾನತು ಶಿಕ್ಷೆಯಲ್ಲಿದ್ದರು. ಹೀಗಾಗಿ 2019ರ ಮೇ 7ರಿಂದಲೇ ಈ ಶಿಕ್ಷೆ ಅನ್ವಯವಾಗಲಿದೆ. 35 ವರ್ಷದ ಕಿರ್ವಾ ರಿಯೊ ಮ್ಯಾರಥಾನ್‌ನಲ್ಲಿ ಕೀನ್ಯಾದ ಜೆಮಿಮಾ ಸುಮ್ಗಾಂಗ್‌ ನಂತರ ದ್ವಿತೀಯ ಸ್ಥಾನಿಯಾಗಿ ಸ್ಪರ್ಧೆ ಪೂರ್ಣಗೊಳಿಸಿದ್ದರು.