ದ್ವಿತೀಯ ಸುತ್ತಿನಲ್ಲೂ ಫೆಡರರ್ ತ್ರಾಸದಾಯಕ ಗೆಲುವು

ನ್ಯೂಯಾರ್ಕ್: ಅಮೆರಿಕನ್ ಓಪನ್ ಟೆನಿಸ್ ಟೂರ್ನಮೆಂಟ್‌ನ ದ್ವಿತೀಯ ಸುತ್ತಿನಲ್ಲೂ ಸ್ವಿಜರ್ಲೆಂಡ್‌ನ ರೋಜರ್ ಫೆಡರರ್ ಪ್ರಯಾಸದ ಗೆಲುವು ದಾಖಲಿಸಿದ್ದಾರೆ.

ಪುರುಷ ಸಿಂಗಲ್ಸ್ ವಿಭಾಗದ ದ್ವಿತೀಯ ಸುತ್ತಿನ ಹೋರಾಟದಲ್ಲಿ ರಷ್ಯಾದ ಮಿಖೈಲ್ ಯೌಜ್ನಿ ವಿರುದ್ಧ ಫೆಡರರ್ 6-1, 6-7 (3/7), 4-6, 6-4, 6-2ರ ಕಠಿಣ ಅಂತರದಲ್ಲಿ ಗೆಲುವು ದಾಖಲಿಸಿದರು.

ಇದು 2000ನೇ ಇಸವಿಯಿಂದ ಯೌಜ್ನಿ ವಿರುದ್ಧ ದಾಖಲಿಸುತ್ತಿರುವ ಸತತ 17ನೇ ಗೆಲುವಾಗಿದೆ.

ಪ್ರಸಕ್ತ ಸಾಲಿನಲ್ಲಿ ಆಸ್ಟೇಲಿಯನ್ ಓಪನ್ ಹಾಗೂ ವಿಂಬಲ್ಡನ್ ಗ್ರ್ಯಾನ್ ಸ್ಲಾಮ್‌ನಲ್ಲಿ ಗೆಲುವು ದಾಖಲಿರುವ ವಿಶ್ವ ನಂ.2 ರೋಜರ್ ಫೆಡರರ್, ಇದೀಗ ನಡೆಯಲಿರುವ ಪ್ರಿ-ಕ್ವಾರ್ಟರ್‌ಗಾಗಿನ ಹೋರಾಟದಲ್ಲಿ ಸ್ಪೇನ್‌ನ ಫೆಲಿಸಿಯಾನ್ ಲೊಪೆಜ್ ಸವಾಲನ್ನು ಎದುರಿಸಲಿದ್ದಾರೆ.

36ರ ಹರೆಯದ ಫೆಡರರ್, ಐದು ಬಾರಿ ಯುಎಸ್ ಓಪನ್ ವಶಪಡಿಸಿಕೊಂಡಿದ್ದಾರೆ. ಅಲ್ಲದೆ ತಮ್ಮ ಗೆಲುವಿನ ಸಂಖ್ಯೆಯನ್ನು 80ಕ್ಕೆ ಏರಿಸಿದ್ದಾರೆ.