ತೆಂಗಿನ ಕಾಯಿ ಎಸೆದು ಕಾಮನ್‌ವೆಲ್ತ್‌ಗೆ ಬಂದಳು!

ಗೋಲ್ಡ್‌ ಕೋಸ್ಟ್‌: ದಕ್ಷಿಣ ಫೆಸಿಪಿಕ್‌ನ ಕೂಕ್‌ ದ್ವೀಪದ ಸ್ಪರ್ಧಿ ತೆಂಗಿನ ಕಾಯಿಯನ್ನು ಎಸೆದು ಈಗ ಡಿಸ್ಕಸ್‌ ಹಾಗೂ ಶಾಟ್‌ಪಟ್‌ನಲ್ಲಿ ಪಾಲ್ಗೊಳ್ಳಲು ಗೋಲ್ಡ್‌ ಕೋಸ್ಟ್‌ಗೆ ಆಗಮಿಸಿದ್ದಾಳೆ.

ಶಾಟ್‌ಪಟ್‌ ಹಾಗೂ ಡಿಸ್ಕಸ್‌ ಎಸೆಯಲು ಯಾವುದೇ ಉಪಕರಣ ಸಿಗದ ಕಾರಣ ತೆರೇಪಿ ತಪೋಕಿ ತೆಂಗಿನ ಕಾಯಿಯನ್ನೇ ಎಸೆದು ಅಭ್ಯಾಸ ಮಾಡಿ ಕಾಮನ್‌ವೆಲ್ತ್‌ ಗೇಮ್ಸ್‌ಗೆ ಅರ್ಹತೆ ಪಡೆದಿರುತ್ತಾರೆ. ರರೋತೋಂಗಾ ವಲಯದ ಪೊಲೀಸ್‌ ಅಧಿಕಾರಿಯಾಗಿರುವ ತಪೋಕಿ, ''ನಮ್ಮಲ್ಲಿ ಡಿಸ್ಕಸ್‌ ಹಾಗೂ ಶಾಟ್‌ಪಟ್‌ ಇರಲಿಲ್ಲ. ಅದಕ್ಕಾಗಿ ತೆಂಗಿನ ಕಾಯಿಯನ್ನೇ ಎಸೆಯುವ ಅಭ್ಯಾಸ ಮಾಡಿಕೊಂಡೆವು,'' ಎಂದು ಗೋಲ್ಡ್‌ಕೋಸ್ಟ್‌ನಲ್ಲಿ ಸುದ್ದಿಗಾರರಿಗೆ ತಿಳಿಸಿದರು. ''ಇದೊಂದು ಹೊಸ ಅನುಭವ, ಡಿಸ್ಕಸ್‌ ತಟ್ಟೆಯಾಕಾರದಲ್ಲಿರುತ್ತದೆ, ಆದರೆ ತೆಂಗಿನ ಕಾಯಿ ವೃತ್ತಾಕಾರದಲ್ಲಿರುತ್ತದೆ,'' ಎಂದು 33 ವರ್ಷದ ತಪೋಕಿ ನಗುತ್ತ ನುಡಿದರು.

2004ರ ಅಥೆನ್ಸ್‌ ಹಾಗೂ 2008 ಬೀಜಿಂಗ್‌ ಒಲಿಂಪಿಕ್ಸ್‌ನಲ್ಲಿ ಸ್ಪರ್ಧಿಸಿರುವ ತಪೋಕಿ ಈ ಬಾರಿಯ ಕಾಮನ್‌ವೆಲ್ತ್‌ ಗೇಮ್ಸ್‌ನಲ್ಲಿ ಡಿಸ್ಕಸ್‌ ಹಾಗೂ ಶಾಟ್‌ಪಟ್‌ನಲ್ಲಿ ಸ್ಪರ್ಧಿಸುತ್ತಿದ್ದಾರೆ.

2006ರ ಮೆಲ್ಬೋರ್ನ್‌ ಗೇಮ್ಸ್‌ನಲ್ಲಿ 11ನೇ ಸ್ಥಾನ ಪಡೆದಿದ್ದ ತಪೋಕಿ, ಗರ್ಭಿಣಿಯಾಗಿದ್ದ ಕಾರಣ 2010ರ ದಿಲ್ಲಿ , 2014ರ ಗ್ಲಾಸ್ಗೋ ಕಾಮನ್‌ವೆಲ್ತ್‌ ಕೂಟಗಳಲ್ಲಿ ಪಾಲ್ಗೊಂಡಿರಲಿಲ್ಲ. ತಪೋಕಿ ಎರಡು ಮಕ್ಕಳ ತಾಯಿಯಾಗಿದ್ದರೂ ಸ್ಪರ್ಧೆಯಲ್ಲಿ ಮಾತ್ರ ಪಾಲ್ಗೊಳ್ಳುತ್ತಲೇ ಇದ್ದಾರೆ.