ಕ್ವಾರ್ಟರ್‌ಫೈನಲ್‌ ಸನಿಹ ಜರ್ಮನಿ

ಭುವನೇಶ್ವರ : ಎರಡು ಬಾರಿಯ ಚಾಂಪಿಯನ್ಸ್‌ ಜರ್ಮನಿ ಇಲ್ಲಿ ನಡೆಯುತ್ತಿರುವ ಪುರುಷರ ಹಾಕಿ ವಿಶ್ವಕಪ್‌ನ 'ಡಿ' ಗುಂಪಿನ ತನ್ನ ದ್ವಿತೀಯ ಪಂದ್ಯದಲ್ಲಿ ಕಳೆದ ಬಾರಿಯ ಬೆಳ್ಳಿ ಪದಕ ವಿಜೇತ ನೆದರ್ಲೆಂಡ್ಸ್‌ ತಂಡವನ್ನು ಸೋಲಿಸಿ ಕ್ವಾರ್ಟರ್‌ಫೈನಲ್‌ಗೆ ಮತ್ತಷ್ಟು ಹತ್ತಿರವಾಗಿದೆ.

ಕಳಿಂಗ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಮೊದಲ ಪಂದ್ಯದಲ್ಲಿ ಆರಂಭಿಕ ಹಿನ್ನಡೆ ಅನುಭವಿಸಿಯೂ ನಂತರ ಪುಟಿದೆದ್ದ ಜರ್ಮನಿ 4-1 ಗೋಲ್‌ಗಳಿಂದ ನೆದರ್ಲೆಂಡ್ಸ್‌ಗೆ ಸೋಲುಣಿಸಿತು. ಇದರೊಂದಿಗೆ ಒಟ್ಟು 6 ಅಂಕ ಕಲೆಹಾಕಿ ಗುಂಪಿನಲ್ಲಿ ಮೊದಲ ಸ್ಥಾನ ಕಾಯ್ದುಕೊಂಡಿದೆ.

ದಿನದ 2ನೇ ಪಂದ್ಯದಲ್ಲಿ ಪಾಕಿಸ್ತಾನ ಮತ್ತು ಮಲೇಷ್ಯಾ ತಂಡಗಳು 1-1 ಗೋಲ್‌ಗಳಿಂದ ಡ್ರಾಗೆ ಸಮಾಧಾನಪಟ್ಟುಕೊಂಡಿವೆ. ಗುರುವಾರ ನಡೆಯಲಿರುವ 'ಎ' ಗುಂಪಿನ ಹಣಾಹಣಿಗಳಲ್ಲಿ ಸ್ಪೇನ್‌ ಮತ್ತು ನ್ಯೂಜಿಲೆಂಡ್‌ ಹಾಗೂ ಅರ್ಜೆಂಟೀನಾ ಮತ್ತು ಫ್ರಾನ್ಸ್‌ ತಂಡಗಳು ಮುಖಾಮುಖಿಯಾಗಲಿವೆ.