ವಿಂಬಲ್ಡನ್ ಸೆಂಟರ್ ಕೋರ್ಟ್‌ನಲ್ಲಿ ಫೆಡರರ್‌ಗೆ ಚಿಯರ್ ಹೇಳಿದ ಸಚಿನ್

ಹೊಸದಿಲ್ಲಿ: ಎಂದಿನಂತೆ ಈ ಬಾರಿಯೂ ವಿಂಬಲ್ಡನ್ ಸೆಂಟರ್ ಕೋರ್ಟ್‌ನಲ್ಲಿ ಟೆನಿಸ್ ಲೋಕದ ದಿಗ್ಗಜ ರೋಜರ್ ಫೆಡರರ್ ಅವರಿಗೆ ಚಿಯರ್ ಹೇಳಲು ಕ್ರಿಕೆಟ್‌ನ ಮಹಾನ್ ಆಟಗಾರನೊಬ್ಬ ಸಾಕ್ಷ್ಯ ವಹಿಸಿದ್ದರು. ಅವರು ಬೇರೆ ಯಾರು ಅಲ್ಲ. ಭಾರತದಲ್ಲಿ ಕ್ರಿಕೆಟ್ ಧರ್ಮವನ್ನು ಹುಟ್ಟು ಹಾಕಿರುವ ಸಚಿನ್ ತೆಂಡೂಲ್ಕರ್.

ಸಮಕಾಲೀನ ಟೆನಿಸ್ ರಂಗದಲ್ಲಿ ಅತ್ಯಂತ ಪ್ರಭಾವಿ ಆಟಗಾರನಾಗಿರುವ ರೋಜರ್ ಫೆಡರರ್ ಅವರ ಕಟ್ಟಾ ಅಭಿಮಾನಿಯಾಗಿರುವ ಸಚಿನ್ ವಿಂಬಲ್ಡನ್ ಪಂದ್ಯವನ್ನು ವೀಕ್ಷಿಸುವುದಕ್ಕಾಗಿ ಆಲ್ ಇಂಗ್ಲೆಂಡ್ ಕ್ಲಬ್ ಪ್ರವೇಶಿಸಿದ್ದರು.

ಕ್ರಿಕೆಟ್ ಲೋಕದಲ್ಲಿ 24 ವರ್ಷಗಳಷ್ಟು ಕಾಲ ಆಡಿರುವ ಸಚಿನ್ ಮಗದೊಬ್ಬ ದಿಗ್ಗಜ ಕ್ರೀಡಾಪಟುವನ್ನು ಬೆಂಬಲಿಸುವ ಮೂಲಕ ನಿಜಕ್ಕೂ ಕ್ರೀಡಾ ಸ್ಪೂರ್ತಿಯನ್ನು ಮೆರೆದಿದ್ದಾರೆ.

"I've been watching Roger for the last 10 years. Here I am to support Roger."@sachin_rt is back at #Wimbledon. pic.twitter.com/NBWm7pugfG — Wimbledon (@Wimbledon) July 14, 2017 ಶನಿವಾರ ಸೆಮಿಫೈನಲ್‌ನಲ್ಲಿ ರೋಜರ್ ಹಾಗೂ ಥಾಮಸ್ ಬೆರ್ಡಿಚ್ ನಡುವಣ ಪಂದ್ಯವನ್ನು ಸಚಿನ್ ಕಣ್ಣಾರೆ ವೀಕ್ಷಿಸಿದ್ದರು. ಹಾಗೆಯೇ ವೈಯಕ್ತಿಕವಾಗಿಯೂ ರೋಜರ್ ಅವರ ಜೊತೆ ಉತ್ತಮ ಬಾಂಧವ್ಯ ಕಾಪಾಡಿಕೊಂಡಿರುವ ಸಚಿನ್ ತಮ್ಮ ಗೆಳೆಯನಿಗಾಗಿ ಚಪ್ಪಾಳೆ ತಟ್ಟಿದ್ದಾರೆ.

ಕಳೆದ 10 ವರ್ಷಗಳಿಂದ ನಾನು ರೋಜರ್ ಆಟವನ್ನು ವೀಕ್ಷಿಸುತ್ತಿದ್ದು, ರೋಜರ್ ಬೆಂಬಲಿಸುವುದಕ್ಕಾಗಿ ಇಲ್ಲಿಗೆ ಆಗಮಿಸಿದ್ದೇನೆ ಎಂದು ಸಚಿನ್ ಪ್ರತಿಕ್ರಿಯಿಸಿದ್ದಾರೆ.

ಅಂದ ಹಾಗೆ ಭಾನುವಾರ ನಡೆಯಲಿರುವ ಪ್ರಶಸ್ತಿಗಾಗಿನ ಹೋರಾಟದಲ್ಲಿ ಫೆಡರರ್ ಅವರು ಕ್ರೋವೇಶಿಯಾದ ಮರಿನ್ ಸಿಲಿಕ್ ಸವಾಲನ್ನು ಎದುರಿಸಲಿದ್ದಾರೆ. ಈ ಮೂಲಕ 35ರ ಹರೆಯದ ಫೆಡರರ್ ಅವರ 8ನೇ ವಿಂಬಲ್ಡನ್ ಹಾಗೂ ಒಟ್ಟಾರೆ 19ನೇ ಗ್ರ್ಯಾನ್ ಸ್ಲಾಮ್ ಪ್ರಶಸ್ತಿ ಮೇಲೆ ಕಣ್ಣಿಟ್ಟಿದ್ದಾರೆ.