PKL 2019: ರೋಹಿತ್ 'ಗೂಳಿ'ಯ ಹಾರಾಟಕ್ಕೆ ಶರಣಾದ ಯೋಧಾ

ಹೈದರಾಬಾದ್: ಪ್ರೊ ಕಬಡ್ಡಿ ಏಳನೇ ಆವೃತ್ತಿಯ ಪಂದ್ಯಾವಳಿಯಲ್ಲಿ ಯುಪಿ ಯೋಧಾ ವಿರುದ್ಧ ಗುಜರಾತ್ ಫಾರ್ಚ್ಯುನ್‌ಜೈಂಟ್ಸ್ 44-19ರ ಅಂತರದ ಭರ್ಜರಿ ಗೆಲುವು ದಾಖಲಿಸಿದೆ.

ಇದರೊಂದಿಗೆ ಗುಜರಾತ್ ಫಾರ್ಚ್ಯುನ್‌ಜೈಂಟ್ಸ್ ಸತತ ಎರಡನೇ ಗೆಲುವನ್ನು ದಾಖಲಿಸಿದೆ. ಅತ್ತ ಯುಪಿ ಯೋಧಾ ಸತತ ಎರಡನೇ ಸೋಲಿಗೆ ಶರಣಾಗಿದೆ.

ಪಟನಾ ಪೈರೇಟ್ಸ್ ವಿರುದ್ಧ ಪಲ್ಟಿ ಹೊಡೆದ ತೆಲುಗು ಟೈಟಾನ್ಸ್

ಹೈದರಾಬಾದ್‌ನ ಗಚ್ಚಿಬೌಲಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಅದ್ಭುತ ಪ್ರದರ್ಶನ ಮೆರೆದ ಗುಜರಾತ್ ತಂಡವು ಎದುರಾಳಿಗಳ ಮೇಲೆ ಸವಾರಿ ಮಾಡಿದರು.

ಪಂದ್ಯದ ಆರಂಭದಿಂದಲೇ ಹಿಡಿತ ಸಾಧಿಸಿದ ಫಾರ್ಚ್ಯುನ್‌ಜೈಂಟ್ಸ್ ಪ್ರಥಮಾರ್ಧದಲ್ಲಿ 19-9ರ ಅಂತರದ ಮುನ್ನಡೆ ಕಾಯ್ದುಕೊಂಡಿತು. ಬಳಿಕ ದ್ವಿತಿಯಾರ್ಧದಲ್ಲೂ ಅಧಿಪತ್ಯವನ್ನು ಮುಂದುವರಿಸಿದರು.

ಗುಜರಾತ್ ಫಾರ್ಚ್ಯುನ್‌ಜೈಂಟ್ಸ್ ಗೆಲುವಿನ ಹೀರೊ ಎನಿಸಿಕೊಂಡ ರೈಡರ್ ರೋಹಿತ್ ಗೂಳಿಯ 11 ಅಂಕಗಳನ್ನು ಕಲೆ ಹಾಕಿದರು. ಇವರಿಗೆ ತಕ್ಕ ಸಾಥ್ ನೀಡಿದ ಸಚಿನ್ ಆರು ಅಂಕಗಳನ್ನು ಪಡೆದರು.

ರಕ್ಷಣೆಯಲ್ಲೂ ಫಾರ್ಚ್ಯುನ್‌ಜೈಂಟ್ಸ್ ಪಡೆ ಅಚ್ಚುಕಟ್ಟಾದ ಪ್ರದರ್ಶನ ನೀಡಿದರು. ಪರ್ವೆಶ್ ಬೈನ್‌ಸ್ವಾಲ್ ಆರು ಅಂಕಗಳನ್ನು ಪಡೆದು ಮಿಂಚಿದರು. ಇನ್ನೊಂದೆಡೆ ಯುಪಿ ಯೋಧಾ ಪರ ಶ್ರೀಕಾಂತ್ ಜಾಧವ್ ಐದು ಅಂಕಗಳನ್ನಷ್ಟೇ ಪಡೆದರು.