ಹಿಮಾ ಕೊರಳಿಗೆ ಚಿನ್ನದ ಪದಕ

ಹೊಸದಿಲ್ಲಿ: ಪೋಲೆಂಡ್‌ನಲ್ಲಿ ನಡೆಯುತ್ತಿರುವ ಪೊಝ್ನಾನ್‌ ಅಥ್ಲೆಟಿಕ್‌ ಗ್ರ್ಯಾನ್‌ಪ್ರಿ ಕೂಟದಲ್ಲಿ ಭಾರತದ ಸ್ಟಾರ್‌ ಓಟಗಾರ್ತಿ ಹಿಮಾ ದಾಸ್‌ 200 ಮೀಟರ್‌ ವಿಭಾಗದಲ್ಲಿ ಚಿನ್ನದ ಬೇಟೆಯಾಡಿದ್ದಾರೆ. ಇದೇ ವೇಳೆ ಶಾಟ್‌ ಪುಟ್‌ ಸ್ಪರ್ಧೆಯಲ್ಲಿ ತಜಿಂದರ್‌ ಪಾಲ್‌ ಸಿಂಗ್‌ ಕಂಚಿನ ಪದಕ ಗೆದ್ದಿದ್ದಾರೆ.

ಕಳೆದ ವರ್ಷ ಜೂನಿಯರ್‌ ಐಎಎಎಫ್‌ ಅಥ್ಲೆಟಿಕ್ಸ್‌ ಚಾಂಪಿಯನ್‌ಷಿಪ್‌ನ 400 ಮೀಟರ್‌ ಓಟದ ಸ್ಪರ್ಧೆಯಲ್ಲಿ ಚಾಂಪಿಯನ್‌ ಆಗಿದ್ದ ಹಿಮಾ, ಇತ್ತೀಚೆಗೆ ಬೆನ್ನು ನೋವಿನ ಸಮಸ್ಯೆಗೆ ಒಳಗಾಗಿದ್ದರು. ಪ್ರಸ್ತುತ ನೋವಿನಿಂದ ಸಂಪೂರ್ಣವಾಗಿ ಹೊರಬಂದಿರುವ ಅವರು 23.62 ಸೆಕೆಂಡ್‌ಗಳಲ್ಲಿ ಓಟ ಪೂರ್ತಿಗೊಳಿಸಿ ಚಿನ್ನ ಗೆದ್ದಿದ್ದಾರೆ. ಕಳೆದ ವರ್ಷ ಹಿಮಾ 23.10 ಸೆಕೆಂಡ್‌ಗಳಲ್ಲಿ 200 ಮೀ. ಓಡಿ ರಾಷ್ಟ್ರೀಯ ದಾಖಲೆ ನಿರ್ಮಿಸಿದ್ದರು.

ಭಾರತದವರೇ ಆದ ವಿ.ಕೆ.ವಿಸ್ಮಯ 23.75 ಸೆಕೆಂಡ್‌ಗಳಲ್ಲಿ ಓಟ ಮುಗಿಸಿ ಮೂರನೇ ಸ್ಥಾನ ಪಡೆದಿದ್ದಾರೆ. ಇದು ಅವರ ವೈಯಕ್ತಿಕ ಶ್ರೇಷ್ಠ ಸಾಧನೆ.

ಏತನ್ಮಧ್ಯೆ, ಪುರುಷರ ವಿಭಾಗದ 200 ಮೀ. ಸ್ಪರ್ಧೆಯಲ್ಲಿ ಮಹಮ್ಮದ್‌ ಅನಾಸ್‌ (20.75 ಸೆ.) ಹಾಗೂ 400 ಮೀ. ಓಟದಲ್ಲಿ ಕೆ.ಎಸ್‌ ಜೀವನ್‌ ತಲಾ ಒಂದು ಕಂಚಿನ ಪದಕ ಜಯಿಸಿದ್ದಾರೆ.