ಭಾರತ-ಐರ್ಲೆಂಡ್‌ ಪಂದ್ಯ ಡ್ರಾ

ಮುರ್ಸಿಯಾ (ಸ್ಪೇನ್‌) : ಆತಿಥೇಯ ಸ್ಪೇನ್‌ ವಿರುದ್ಧ ನಾಲ್ಕು ಪಂದ್ಯಗಳ ಸರಣಿಯಲ್ಲಿ 2-2ರ ಸಮಬಲ ಸಾಧಿಸಿದ ಭಾರತ ಮಹಿಳಾ ಹಾಕಿ ತಂಡ, ಶನಿವಾರ 2018ರ ಮಹಿಳಾ ವಿಶ್ವಕಪ್‌ ಬೆಳ್ಳಿ ಪದಕ ವಿಜೇತ ಐರ್ಲೆಂಡ್‌ ತಂಡದ ವಿರುದ್ಧದ ಸರಣಿಯ ಮೊದಲ ಹಣಾಹಣಿಯಲ್ಲಿ ಡ್ರಾಗೆ ಸಮಾಧಾನಪಟ್ಟುಕೊಂಡಿದೆ.

ಮೊದಲ ಕ್ವಾರ್ಟರ್‌ನ 4ನೇ ನಿಮಿಷದಲ್ಲಿ ಪೆನಾಲ್ಟಿ ಕಾರ್ನರ್‌ ಅವಕಾಶ ಸೃಷ್ಟಿಸುವ ಮೂಲಕ ಭಾರತ ಉತ್ತಮ ಆರಂಭ ಕಂಡರೂ ಆತಿಥೇಯ ತಂಡದ ದಿಟ್ಟ ರಕ್ಷ ಣೆಯಿಂದಾಗಿ ಮುನ್ನಡೆ ಗಳಿಸುವಲ್ಲಿ ವಿಫಲಗೊಂಡಿತು. ದ್ವಿತೀಯ ಕ್ವಾರ್ಟರ್‌ನ ಆರಂಭದಲ್ಲೇ ದೊರೆತ ಪೆನಾಲ್ಟಿ ಕಾರ್ನರ್‌ ಅವಕಾಶವನ್ನು ಭಾರತ ಮತ್ತೆ ಕೈಚೆಲ್ಲಿತು. ಕೊನೆಗೂ 18ನೇ ನಿಮಿಷದಲ್ಲಿ ಡ್ರ್ಯಾಗ್‌ಫ್ಲಿಕ್ಕರ್‌ ಗುರ್ಜಿತ್‌ ಕೌರ್‌ ನೆರವಿನಿಂದ ಭಾರತ 1-0 ಮುನ್ನಡೆ ಕಂಡುಕೊಂಡಿತು. ಆದರೆ, 45ನೇ ನಿಮಿಷದಲ್ಲಿ ಐರ್ಲೆಂಡ್‌ 1-1ರ ಸಮಬಲ ಸ್ಥಾಪಿಸಿತು. ಆ ಬಳಿಕ ಪಂದ್ಯದ ಕೊನೆಯ ತನಕ ಗೋಲ್‌ ದಾಖಲಾಗಲಿಲ್ಲ. ಭಾನುವಾರ 2ನೇ ಪಂದ್ಯ ನಡೆಯಲಿದೆ. ಇದು ಸ್ಪೇನ್‌ ಪ್ರವಾಸದಲ್ಲಿ ಭಾರತದ ಕೊನೇ ಪಂದ್ಯ.