ಮತ್ತೆ ಪಾಕಿಸ್ತಾನ ಸದೆಬಡಿದ ಭಾರತೀಯ ಹಾಕಿ ತಂಡ

ಲಂಡನ್‌ : ಭಾರತ ಪುರುಷರ ಹಾಕಿ ತಂಡ, ಶನಿವಾರ ಹಾಕಿ ವಿಶ್ವ ಲೀಗ್‌ ಸೆಮಿಫೈನಲ್‌ ಟೂರ್ನಿಯ 5-8ನೇ ಕ್ಲಾಸಿಫಿಕೇಷನ್‌ ಪಂದ್ಯದಲ್ಲಿ ಸಾಂಪ್ರದಾಯಿಕ ಎದುರಾಳಿ ಪಾಕಿಸ್ತಾನ ವಿರುದ್ಧ 6-1 ಗೋಲುಗಳ ಅಂತರದ ಭರ್ಜರಿ ಗೆಲುವು ದಾಖಲಿಸಿದೆ.

ಲೀಗ್‌ ಹಂತದಲ್ಲಿ 7-1 ಗೋಲುಗಳ ಅಂತರದ ಜಯ ದಾಖಲಿಸಿದ ಭಾರತೀಯ ಹಾಕಿ ತಂಡವು ಮತ್ತದೇ ಅಮೋಘ ಪ್ರದರ್ಶನವನ್ನು ನೀಡುವ ಮೂಲಕ ಮೆಚ್ಚೆಗೆಗೆ ಪಾತ್ರವಾಗಿದ್ದಾರೆ.

ಭಾರತವೀಗ ಭಾನುವಾರ ನಡೆಯಲಿರುವ 5 ಹಾಗೂ 6ನೇ ಸ್ಥಾನಕ್ಕಾಗಿನ ಹೋರಾಟದಲ್ಲಿ ಕೆನಡಾ ವಿರುದ್ಧ ಸೆಣಸಲಿದೆ.

ಭಾರತದ ಪರ ಗೆಲುವಿನ ಗೋಲು ದಾಖಲಿಸಿದವರು:

ರಮನ್‌ದೀಪ್ ಸಿಂಗ್ (8 ಹಾಗೂ 28ನೇ ನಿಮಿಷ)
ಅಕಾಶ್‌ದೀಪ್ ಸಿಂಗ್ (12 ಹಾಗೂ 27ನೇ ನಿಮಿಷ)
ತಲ್‌ವಿಂದರ್ (25ನೇ ನಿಮಿಷ) ಮತ್ತು
ಹರ್ಮನ್‌ಪ್ರೀತ್ (36ನೇ ನಿಮಿಷ)

ಪಾಕ್ ಪರ 41ನೇ ನಿಮಿಷದಲ್ಲಿ ಗೋಲು ದಾಖಲಿಸಿದ ಅಜಝ್ ಅಹ್ಮದ್ ಸೋಲಿನ ಅಂತರವನ್ನು ತಗ್ಗಿಸಿದರು.

ಪಂದ್ಯದುದ್ಧಕ್ಕೂ ಅಮೋಘ ನಿರ್ವಹಣೆ ನೀಡಿದ ಭಾರತೀಯ ಹಾಕಿ ತಂಡ ಅರ್ಧ ತಾಸಿನ ವೇಳೆಗೆ 4-0 ಅಂತರದ ಮುನ್ನಡೆ ದಾಖಲಿಸಿತ್ತು. ದ್ವಿತಿಯಾರ್ಧದಲ್ಲೂ ಆಕ್ರಮಣದ ಜೊತೆಗೆ ರಕ್ಷಣೆಯ ಆಟಕ್ಕೆ ಒತ್ತು ನೀಡುವ ಮೂಲಕ ಗೆಲುವು ದಾಖಲಿಸಿದೆ.

ಇದಕ್ಕೂ ಮೊದಲು ವಿಶ್ವ ರ‍್ಯಾಂಕಿಂಗ್‌ನಲ್ಲಿ 6ನೇ ಸ್ಥಾನದಲ್ಲಿರುವ ಭಾರತ ಗುರುವಾರ ನಡೆದ ಕ್ವಾರ್ಟರ್‌ಫೈನಲ್‌ ಪಂದ್ಯದಲ್ಲಿ 14ನೇ ರಾಂಕಿನ ಮಲೇಷ್ಯಾ ವಿರುದ್ಧ 2-3 ಗೋಲ್‌ಗಳಿಂದ ಆಘಾತ ಅನುಭವಿಸಿ, ಪೋಡಿಯಂ ಸ್ಥಾನದಿಂದ ಹೊರಬಿದ್ದಿತ್ತು.

ಆದರೆ ಈ ಸೋಲು ಇದೇ ವರ್ಷ ನಡೆಯಲಿರುವ ಹಾಕಿ ವಿಶ್ವ ಲೀಗ್‌ ಫೈನಲ್‌ ಮತ್ತು ಮುಂದಿನ ವಿಶ್ವ ಕಪ್‌ನಲ್ಲಿ ಭಾರತ ಪಾಲ್ಗೊಳ್ಳುವುದರ ಮೇಲೆ ಯಾವುದೇ ರೀತಿಯ ಪರಿಣಾಮ ಬೀರಿಲ್ಲ. ಏಕೆಂದರೆ ಎರಡು ಕೂಟಗಳಿಗೂ ಆತಿಥ್ಯ ವಹಿಸಿರುವ ಕಾರಣ ಭಾರತ ಎರಡು ಟೂರ್ನಿಯಲ್ಲಿ ಭಾಗಿಯಾಗುವುದನ್ನು ಖಚಿತ ಪಡಿಸಿದೆ. ಎರಡೂ ಟೂರ್ನಿಗಳು ಒಡಿಶಾದ ಭುವನೇಶ್ವರದಲ್ಲಿ ಜರುಗಲಿವೆ.