India vs Ireland: ಮಹಿಳಾ ಹಾಕಿ ವಿಶ್ವಕಪ್; ಭಾರತ ಶೂಟ್'ಔಟ್'

ಹೊಸದಿಲ್ಲಿ: ಲಂಡನ್‌ನಲ್ಲಿ ಸಾಗುತ್ತಿರುವ ಪ್ರತಿಷ್ಠಿತ ಮಹಿಳಾ ಹಾಕಿ ವಿಶ್ವಕಪ್‌ನಿಂದ ಭಾರತೀಯ ಮಹಿಳಾ ಹಾಕಿ ತಂಡವು ಹೊರಬಿದ್ದಿದೆ.

ಗುರುವಾರ ನಡೆದ ಕ್ವಾರ್ಟರ್ ಫೈನಲ್ ಮುಖಾಮುಖಿಯಲ್ಲಿ ಮತ್ತದೇ ಐರ್ಲೆಂಡ್ ವಿರುದ್ದ ಶೂಟೌಟ್‌ನಲ್ಲಿ 1-3 ಗೋಲುಗಳ ಅಂತರದ ಸೋಲನುಭವಿಸಿದ ಭಾರತೀಯ ಮಹಿಳಾ ತಂಡವು ಕೂಟದಿಂದಲೇ ಹೊರಬಿದ್ದಿದೆ.

ಲೀಗ್ ಹಂತದ ಹಣಾಹಣಿಯಲ್ಲೂ ಐರ್ಲೆಂಡ್‌ಗೆ ಭಾರತ ಶರಣಾಗಿತ್ತು. ಇದರೊಂದಿಗೆ 40 ವರ್ಷಗಳ ಬಳಿಕ ಮಹಿಳಾ ಹಾಕಿ ವಿಶ್ವಕಪ್ ಟೂರ್ನಿಯಲ್ಲಿ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ ಸಾಧನೆ ಮಾಡಿರುವ ಭಾರತೀಯ ಮಹಿಳಾ ಹಾಕಿ ತಂಡವು ಬರಿಗೈಯಲ್ಲಿ ಮರಳಬೇಕಾಯಿತು.

ಪಂದ್ಯದುದ್ಧಕ್ಕೂ ಭಾರತೀಯ ತಂಡ ಪ್ರಭಾವಿ ಪ್ರದರ್ಶನವನ್ನು ನೀಡಿತು. ಪರಿಣಾಮ ಕೊನೆಯ ಸೀಟಿ ಬೀಳುವ ವರೆಗೂ ಇತ್ತಂಡಗಳು ಗೋಲು ರಹಿತ ಸಮಬಲವನ್ನು ಸಾಧಿಸಿತ್ತು. ಆದರೆ ಶೂಟೌಟ್‌ನಲ್ಲಿ ಭಾರತದ ಕನಸು ನೂಚ್ಚುನೂರಾಯಿತು.

ಪೆನಾಲ್ಟಿ ಶೂಟೌಟ್‌ನಲ್ಲಿ ನಾಯಕಿ ರಾಣಿ ರಾಂಪಾಲ್, ಮೊನಿಕಾ ಹಾಗೂ ನವಜೋತ್ ಕೌರ್ ಗೋಲು ಬಾರಿಸುವಲ್ಲಿ ವಿಫಲವಾದರು. ಭಾರತದ ಪರ ಏಕೈಕ ಕೋಲನ್ನು ಸವಿತಾ ಬಾರಿಸಿದರು.

ಈ ಹಿಂದೆ 1974ರಲ್ಲಿ ಭಾರತೀಯ ತಂಡ ನಾಲ್ಕು ಹಾಗೂ 1978ರ ವಿಶ್ವಕಪ್‌ನಲ್ಲಿ ಏಳನೇ ಸ್ಥಾನಕ್ಕೆ ಅರ್ಹವಾಗಿತ್ತು.

ಅತ್ತ ಸೆಮಿಫೈನಲ್‌ಗೇರುವ ಮೂಲಕ ಇತಿಹಾಸ ಬರೆದಿರುವ ವಿಶ್ವ ನಂ.16 ರ‍್ಯಾಂಕ್‌ನ ಐರ್ಲೆಂಡ್ ತಂಡವೀಗ ಅಂತಿಮ ನಾಲ್ಕರ ಘಟ್ಟದಲ್ಲಿ ವಿಶ್ವ ನಂ.11ನೇ ರ‍್ಯಾಂಕ್‌ನ ಸ್ಪೇನ್ ಸವಾಲನ್ನು ಎದುರಿಸಲಿದೆ.