ನಾನು ಪತ್ರ ಬರೆದಿಲ್ಲ: ಚೌಧರಿ

ಮುಂಬಯಿ: ಐಸಿಸಿಗೆ ತಾವು ಪತ್ರ ಬರೆದಿಲ್ಲ ಎಂದು ಹೇಳುವ ಮೂಲಕ ಭಯೋತ್ಪಾದನೆಗೆ ನೀರೆರೆಯುತ್ತಿರುವ ದೇಶಗಳೊಂದಿಗೆ ಕ್ರಿಕೆಟ್‌ ಬಾಂಧವ್ಯವನ್ನು ತ್ಯಜಿಸಬೇಕು ಎಂದು ಬಿಸಿಸಿಐ ಐಸಿಸಿಗೆ ಬರೆದ ಪತ್ರ ಕುರಿತು ಬಿಸಿಸಿಐ ಹಂಗಾಮಿ ಕಾರ್ಯದರ್ಶಿ ಅಮಿತಾಭ್‌ ಚೌಧರಿ ಸೋಮವಾರ ಕೈತೊಳೆದುಕೊಂಡಿದ್ದಾರೆ.

ಭಯೋತ್ಪಾದನೆ ವಿಷಯವನ್ನು ಕೇಂದ್ರವಾಗಿಸಿಕೊಂಡು ಯಾವುದೇ ದೇಶದ ತಂಡವನ್ನು ವಿಶ್ವಕಪ್‌ನಲ್ಲಿ ಬಹಿಷ್ಕರಿಸುವ ತೀರ್ಮಾನ ನಮ್ಮ ವ್ಯಾಪ್ತಿಗೆ ಬರುವುದಿಲ್ಲ. ಅಂತಹ ತೀರ್ಮಾನಗಳೇನಿದ್ದರೂ ಸರಕಾರದ ಮಟ್ಟದಲ್ಲಿ ನಡೆಯಬೇಕು ಎಂದು ಐಸಿಸಿ ಹೇಳುವ ಮೂಲಕ ಬಿಸಿಸಿಐ ಮನವಿಯನ್ನು ತಳ್ಳಿ ಹಾಕಿತ್ತು. ಐಸಿಸಿಗೆ ಬರೆಯಲಾದ ಪತ್ರದಲ್ಲಿ ನಿರ್ದಿಷ್ಟವಾಗಿ ಪಾಕಿಸ್ತಾನ ಹೆಸರನ್ನು ನಮೂದಿಸದಿರುವ ಬಗ್ಗೆ ಕೇಳಿದ ಪ್ರಶ್ನೆಗೆ ಉತ್ತರಿಸಿರುವ ಚೌಧರಿ, ''ಐಸಿಸಿಗೆ ನಾನು ಪತ್ರ ಬರೆದಿಲ್ಲ,'' ಎಂದಿದ್ದಾರೆ.

ಕಳೆದ ಫೆಬ್ರವರಿ 14ರಂದು ಪುಲ್ವಾಮಾದಲ್ಲಿ ಸಿಆರ್‌ಪಿಎಫ್‌ ಯೋಧರ ಮೇಲೆ ನಡೆದ ಜೈಷ್‌-ಎ-ಮೊಹಮ್ಮದ್‌ ಉಗ್ರರ ದಾಳಿಯ ಹಿನ್ನೆಲೆಯಲ್ಲಿ, ಕ್ರಿಕೆಟ್‌ ಆಡಳಿತಾತ್ಮಕ ಸಮಿತಿ ಜತೆ ಚರ್ಚಿಸಿ ಬಿಸಿಸಿಐ ಮುಖ್ಯಕಾರ್ಯನಿರ್ವಹಣಾಧಿಕಾರಿ ರಾಹುಲ್‌ ಜೊಹ್ರಿ ಉಗ್ರರಿಗೆ ನೆಲೆ ನೀಡಿರುವ ರಾಷ್ಟ್ರಗಳನ್ನು ಕ್ರಿಕೆಟಿನಿಂದ ಬಹಿಷ್ಕರಿಸುವಂತೆ ಐಸಿಸಿಗೆ ಪತ್ರ ಬರೆದಿದ್ದರು. ಆದರೆ ಪಾಕಿಸ್ತಾನವನ್ನು ಹೊರಗಿಡಬೇಕು ಎಂದು ನಿರ್ದಿಷ್ಟವಾಗಿ ಹೆಸರಿಸದ ಕಾರಣ ಐಸಿಸಿ ಭಾರತದ ಕೋರಿಕೆಯನ್ನು ತಿರಸ್ಕರಿಸಿದೆ.