ಬೆಂಗಳೂರು : ಮಂಗೋಲಿಯಾದ ಉಲಾನ್ಬಾತರ್‌ನಲ್ಲಿ ಇದೇ 27ರಿಂದ 29ರವರೆಗೆ ನಡೆಯಲಿರುವ ಫಿಬಾ 3*3 ಏಷ್ಯಾ ಕಪ್‌ ಬಾಸ್ಕೆಟ್‌ಬಾಲ್‌ ಟೂರ್ನಿಗೆ ಭಾರತೀಯ ಬಾಸ್ಕೆಟ್‌ ಬಾಲ್‌ ಸಂಸ್ಥೆ ಗುರುವಾರ ಭಾರತ ಮಹಿಳಾ ಪುರುಷರ ತಂಡಗಳನ್ನು ಪ್ರಕಟಿಸಿದೆ.
ಈ ಹಿಂದೆ ನಡೆದಿದ್ದ ಮೊದಲ ಆವೃತ್ತಿಯಲ್ಲಿ ಭಾರತ ಮಹಿಳಾ ತಂಡ ಚಾಂಪಿಯನ್ಸ್‌ ಪಟ್ಟ ಗೆದ್ದಿದೆ. ಏಷ್ಯಾದ ಮಹತ್ವದ 3*3 ಟೂರ್ನಿಯ ಎರಡನೇ ಆವೃತ್ತಿಗೆ ಮಂಗೋಲಿಯಾ ಆತಿಥ್ಯವಹಿಸುತ್ತಿದೆ. ಈ ಹಿಂದೆ ಓಷಿಯಾನಿಯಾ ಆತಿಥ್ಯವಹಿಸಿತ್ತು. ಹಿಂದಿನ ಅವತರಣಿಕೆಯಲ್ಲಿ ಪ್ರಶಸ್ತಿ ಗೆದ್ದಿರುವ ಭಾರತ ಮಹಿಳಾ ತಂಡ ಈ ಬಾರಿಯೂ ಪ್ರಶಸ್ತಿ ಉಳಿಸಿಕೊಳ್ಳುವ ವಿಶ್ವಾಸದಲ್ಲಿದೆ. ಕಿರ್ಗಿಸ್ತಾನ್‌ ಮತ್ತು ನ್ಯೂಜಿಲೆಂಡ್‌ ತಂಡಗಳೊಂದಿಗೆ 'ಡಿ' ಗುಂಪಿನಲ್ಲಿ ಸ್ಥಾನ ಪಡೆದಿರುವ ಭಾರತ ಮಹಿಳಾ ತಂಡ 27ರಂದು ಕಿರ್ಗಿಸ್ತಾನ್‌ ವಿರುದ್ಧ ಅಭಿಯಾನ ಆರಂಭಿಸಲಿದೆ.
ಲೆಬನಾನ್‌ ಮತ್ತು ಚೈನೀಸ್‌ ತೈಪೆ ತಂಡಗಳೊಂದಿಗೆ ಸ್ಥಾನ ಪಡೆದಿರುವ ಭಾರತ ಪುರುಷರ ತಂಡ ಇದೇ 27ರಂದು ಚೈನೀಸ್‌ ತೈಪೆ ಎದುರು ಮೊದಲ ಪಂದ್ಯ ಆಡಲಿದೆ.
ಭಾರತ ಮಹಿಳಾ ತಂಡ: ಶಿರೀನ್‌ ವಿಜಯ್‌ ಲಿಮಯೀ, ರಸ್ಟ್ರೀತ್‌ ಸಿಧು, ಜೀನಾ ಪಳನಿ ಕುಮ್ಕಾಲಾಯಿಲ್‌ ಸ್ಕಾರಿಯಾ, ಗಿಯಾ ಮೆರ್ಲಿನ್‌ ವರ್ಗೀಸ್‌. ಪುರುಷರ ತಂಡ: ರವಿ ಭಾರದ್ವಾಜ್‌, ಅನಿಲ್‌ ಕುಮಾರ್‌ (ಬೂಕನಕೆರೆ)ಗುರ್ವಿಂದರ್‌ ಸಿಂಗ್‌ ಗಿಲ್‌, ಜೀವನಾಂಥಮ್‌ ಪಾಂಡಿ.