ಏಷ್ಯನ್ ಗೇಮ್ಸ್ 2018; ಮಹಿಳೆಯರ 4x400m ರಿಲೇಯಲ್ಲಿ ಭಾರತಕ್ಕೆ ಚಿನ್ನ

ಹೊಸದಿಲ್ಲಿ: ಇಂಡೋನೇಷ್ಯಾದ ಜಕಾರ್ತ ಹಾಗೂ ಪ್ಯಾಲೆಂಬಾಂಗ್‌ನಲ್ಲಿ ನಡೆಯುತ್ತಿರುವ ಏಷ್ಯನ್ ಗೇಮ್ಸ್ 2018 ಕ್ರೀಡಾಕೂಟದಲ್ಲಿ ಭಾರತೀಯ ಅಥ್ಲೀಟ್‌ಗಳು ಭರ್ಜರಿ ಪ್ರದರ್ಶನವನ್ನು ಮುಂದುವರಿಸಿದ್ದಾರೆ.

ಕ್ರೀಡಾಕೂಟದ 12ನೇ ದಿನವಾದ ಗುರುವಾರದಂದು ಮಹಿಳೆಯರ 4x400 ಮೀಟರ್ ರಿಲೇ ಸ್ಪರ್ಧೆಯಲ್ಲಿ ಭಾರತ ಚಿನ್ನ ಗೆದ್ದುಕೊಂಡಿದೆ.

ಭಾರತದ ಪರ ಓಟಕ್ಕಿಳಿದ ಹಿಮಾ ದಾಸ್, ಎಂಆರ್ ಪೂವಮ್ಮ, ಎಸ್ ಗಾಯಕ್‌ವಾಡ್ ಮತ್ತು ಮಿಸ್ಮಯ ಕೊರೊತ್ ಚಿನ್ನದ ಮಾಲೆಯನ್ನು ಕೊರಳಿಗೆ ಹಾಕಿಕೊಂಡರು.

ಇದರೊಂದಿಗೆ ಭಾರತದ ಚಿನ್ನದ ಪದಕಗಳ ಸಂಖ್ಯೆ 13ಕ್ಕೆ ಏರಿಕೆಯಾಗಿದೆ.

ತಮ್ಮ ಪ್ರತಿಸ್ಪರ್ಧಿಗಳೆನ್ನೆಲ್ಲ ಹಿಂದಿಕ್ಕಿದ ಭಾರತೀಯ ತಂಡ 3:28.72 ನಿಮಿಷಗಳಲ್ಲಿ ಗುರಿ ಮುಟ್ಟುವ ಮೂಲಕ ದೇಶದ ಕೀರ್ತಿ ಪತಾಕೆಯನ್ನು ಹಾರಿಸಿದರು.

ಇದರೊಂದಿಗೆ ಸತತವಾಗಿ ಐದನೇ ಬಾರಿಗೆ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತೀಯ ಮಹಿಳಾ ತಂಡವು ಚಿನ್ನದ ಪದಕವನ್ನು ಬಾಚಿಕೊಂಡಿದೆ.


ಪುರುಷ 4x400m ರಿಲೇಯಲ್ಲಿ ಬೆಳ್ಳಿ
ಈ ನಡುವೆ ಪುರುಷರ 4x400m ರಿಲೇಯಲ್ಲಿ ಭಾರತ ಬೆಳ್ಳಿ ಪದಕ ಗೆದ್ದುಕೊಂಡಿದೆ. ಭಾರತದ ಎಂಡಿ ಕುನ್ಹು, ಧರುಣ್ ಅಯ್ಯಸಾಮಿ, ಮೊಹಮ್ಮದ್ ಅನಾಸ್ ಹಾಗೂ ಅರೋಕಿಯಾ ರಾಜೀವ್ 3:01.85 ನಿಮಿಷಗಳಲ್ಲಿ ಗುರಿ ಮುಟ್ಟಿದರು.