ಕಿರಿಯರ ಫುಟ್ಬಾಲ್‌: ಭಾರತ ತಂಡಕ್ಕೆ ಜಯ

ಹೊಸದಿಲ್ಲಿ: ಥಾಯ್ಲೆಂಡ್‌ ಪ್ರವಾಸದಲ್ಲಿರುವ ಹದಿನಾರು ವರ್ಷದೊಳಗಿನವರ ಭಾರತ ಫುಟ್ಬಾಲ್‌ ತಂಡ, ಶುಕ್ರವಾರ ನಡೆದ ಪ್ರದರ್ಶನ ಪಂದ್ಯದಲ್ಲಿ 17 ವರ್ಷದೊಳಗಿನವರ ಬುರಿರಾಮ್‌ ಯುನೈಟೆಡ್‌ ಎಫ್‌ಸಿ ವಿರುದ್ಧ 2-0 ಅಂತರದ ಗೆಲುವು ದಾಖಲಿಸಿದೆ.

ಪಂದ್ಯದ ಉಭಯ ಅವಧಿಗಳಲ್ಲಿ ಪ್ರಾಬಲ್ಯ ಮೆರೆದ ಭಾರತ ತಂಡದ ಪರ ಭುವನೇಶ್‌ 3ನೇ ನಿಮಿಷದಲ್ಲಿ ಗೋಲ್‌ ಗಳಿಸಿದರೆ, ರೋಹಿತ್‌ ದನು 83ನೇ ನಿಮಿಷದಲ್ಲಿ ತಂಡದ ಎರಡನೇ ಗೋಲ್‌ ಗಳಿಸಿ ಭಾರತಕ್ಕೆ ಸುಲಭ ಜಯ ತಂದುಕೊಟ್ಟರು.

ಪ್ರಥಮಾರ್ಧಕ್ಕೆ ಭಾರತ 1-0 ಅಂತರದ ಮುನ್ನಡೆ ಗಳಿಸಿ ಮೇಲುಗೈ ಸಾಧಿಸಿದರಲ್ಲದೆ ದ್ವಿತೀಯಾರ್ಧದಲ್ಲೂ ತಮ್ಮ ಹಿಡಿತ ಕಾಯ್ದುಕೊಂಡರು. ಭಾರತ ಇದೇ 17ರಂದು 17 ವರ್ಷದೊಳಗಿನವರ ಬ್ಯಾಂಕಾಕ್‌ ಗ್ಲಾಸ್‌ ಎಫ್‌ಸಿ ತಂಡದ ವಿರುದ್ಧ ಕಣಕ್ಕಿಳಿಯಲಿದೆ.