‘ಎ’ ಡಿವಿಜನ್‌ಗೆ ಭಾರತ ಬಡ್ತಿ

'ಬಿ' ಡಿವಿಜನ್‌ನ 'ಎ' ಗುಂಪಿನ ಫೈನಲ್‌ನಲ್ಲಿ ಕಜಕ್‌ಸ್ತಾನ್‌ ವಿರುದ್ಧ ಭಾರತಕ್ಕೆ ಜಯ

Vijaya Karnataka Web

ಬೆಂಗಳೂರು : ಉತ್ತಮ ಪ್ರದರ್ಶನ ತೋರಿದ ಭಾರತ ತಂಡ 'ಬಿ' ಡಿವಿಜನ್‌ನ 'ಎ' ಗುಂಪಿನ ಫೈನಲ್‌ ಹಣಾಹಣಿಯಲ್ಲಿ ಕಜಕ್‌ಸ್ತಾನ್‌ ತಂಡವನ್ನು ಸೋಲಿಸಿ 2020ರ ಫಿಬಾ ಏಷ್ಯಾ ಮಹಿಳಾ 18 ವಯೋಮಿತಿ ಬಾಸ್ಕೆಟ್‌ಬಾಲ್‌ ಚಾಂಪಿಯನ್‌ಷಿಪ್‌ನ 'ಎ' ಡಿವಿಜನ್‌ಗೆ ಬಡ್ತಿ ಪಡೆದಿದೆ.

ಇಲ್ಲಿನ ಶ್ರೀಕಂಠೀರವ ಒಳಾಂಗಣ ಕ್ರೀಡಾಂಗಣದಲ್ಲಿ ಶನಿವಾರ ನಡೆದ ಫೈನಲ್‌ ಪಂದ್ಯದಲ್ಲಿ ಆತಿಥೇಯ ಭಾರತ 68-45 ಅಂಕಗಳಿಂದ ಕಜಕ್‌ಸ್ತಾನ್‌ ತಂಡವನ್ನು ಪರಾಭವಗೊಳಿಸಿ ಅರ್ಹತೆ ಗಳಿಸುವಲ್ಲಿ ಯಶಸ್ವಿಯಾಯಿತು. ವಿದ್ಯಾನಗರದ ಹರ್ಷಿತಾ ಬೋಪಿಯನ್‌ ಮತ್ತೊಮ್ಮೆ ಶ್ರೇಷ್ಠ ಪ್ರದರ್ಶನ ಹೊರಹಾಕುವ ಮೂಲಕ ತಂಡದ ಗೆಲುವಿನ ರೂವಾರಿಯಾಗಿ ಕಂಗೊಳಿಸಿದರು. ಇವರ ಜತೆಗೆ ಪುಷ್ಪಾ ಸೆಂಥಿಲ್‌ ಕುಮಾರ್‌ ಮತ್ತು ದರ್ಶಿನಿ ಸಹ ಹರ್ಷಿತಾಗೆ ಸಾಥ್‌ ನೀಡಿದರು.

ಪಂದ್ಯದ ಮೊದಲ ಮೂರೂ ಅವಧಿಗಳಲ್ಲಿ ಕ್ರಮವಾಗಿ 18-9, 16-7, 22-12ರಲ್ಲಿ ಮೇಲುಗೈ ಸಾಧಿಸಿದ ಭಾರತೀಯರು ಅಂತಿಮ ಹಾಗೂ ನಿರ್ಣಾಯಕ ಅವಧಿಯಲ್ಲಿ 14-17ರಲ್ಲಿ ಹಿನ್ನಡೆ ಕಂಡರು. ಆದರೆ, ಇದು ಆತಿಥೇಯರ ಜಯದ ಮೇಲೆ ಯಾವುದೇ ಪರಿಣಾಮ ಬೀರಲಿಲ್ಲ.

ಇದೇ ಡಿವಿಜನ್‌ನಲ್ಲಿ 3ನೇ ಸ್ಥಾನಕ್ಕಾಗಿ ನಡೆದ ಪಂದ್ಯದಲ್ಲಿ ಹಾಂಕಾಂಗ್‌ ತಂಡ 68-75 ಅಂಕಗಳಿಂದ ಸಿರಿಯಾ ವಿರುದ್ಧ ಸೋತು 4ನೇ ಸ್ಥಾನಕ್ಕೆ ತೃಪ್ತಿಪಟ್ಟಿತು.