Asian Boxing Championships: ಭಾರತದ ಪ್ರಾಬಲ್ಯ

ಬ್ಯಾಂಕಾಕ್‌: ಸ್ಥಿರ ಪ್ರದರ್ಶನ ಕಾಯ್ದುಕೊಂಡಿರುವ ಭಾರತದ ಮಹಿಳಾ ಬಾಕ್ಸರ್‌ಗಳು ಇಲ್ಲಿ ನಡೆಯುತ್ತಿರುವ ಏಷ್ಯನ್‌ ಬಾಕ್ಸಿಂಗ್‌ ಚಾಂಪಿಯನ್‌ಷಿಪ್‌ನಲ್ಲಿ ಸೆಮಿಫೈನಲ್‌ ಪ್ರವೇಶಿಸುವ ಮೂಲಕ ಪದಕ ಖಾತ್ರಿಪಡಿಸಿದ್ದಾರೆ. ಇದಕ್ಕೂ ಮುನ್ನ, ಪುರುಷರ ವಿಭಾಗದಲ್ಲೂ ಭಾರತೀಯರು ಪ್ರಾಬಲ್ಯ ಮೆರೆದಿದ್ದರು.

ಏಳು ಪುರುಷರು ಮತ್ತು ಆರು ಮಹಿಳಾ ಬಾಕ್ಸರ್‌ಗಳು ಸೇರಿ ಭಾರತದ 13 ಬಾಕ್ಸರ್‌ಗಳು ನಾಲ್ಕರ ಘಟ್ಟಕ್ಕೆ ಮುನ್ನಡೆಯುವ ಮೂಲಕ ಕನಿಷ್ಠಪಕ್ಷ ಕಂಚಿನ ಪದಕಗಳನ್ನು ಖಾತ್ರಿಪಡಿಸಿದ್ದಾರೆ.

ಪುರುಷರ ವಿಭಾಗದಲ್ಲಿ ದೀಪಕ್‌ ಸಿಂಗ್‌ (49 ಕೆಜಿ), ಅಮಿತ್‌ ಪೊಂಗಲ್‌ (52 ಕೆಜಿ), ಕವೀಂದರ್‌ ಬಿಷ್ಟ್‌ (56 ಕೆಜಿ), ಶಿವ ಥಾಪ (60 ಕೆಜಿ), ಆಶಿಶ್‌ (69 ಕೆಜಿ) ಮತ್ತು ಆಶಿಶ್‌ ಕುಮಾರ್‌ (75 ಕೆಜಿ) ಮತ್ತು ಸತೀಶ್‌ ಕುಮಾರ್‌ (+91 ಕೆಜಿ) ಈಗಾಗಲೇ ಉಪಾಂತ್ಯ ತಲುಪಿದರೆ, ಮಹಿಳಾ ವಿಭಾಗದಲ್ಲಿ ನಿಖತ್‌ ಝರೀನ್‌ (51 ಕೆಜಿ), ಮನಿಶಾ (54 ಕೆಜಿ), ಸೋನಿಯಾ ಚಹಲ್‌ (57 ಕೆಜಿ), ಎಲ್‌. ಸರಿತಾ ದೇವಿ (60 ಕೆಜಿ), ಸಿಮ್ರನ್‌ಜೀತ್‌ ಕೌರ್‌ (64 ಕೆಜಿ) ಮತ್ತು ಪೂಜಾ ರಾಣಿ (75 ಕೆಜಿ) ಸೆಮಿಫೈನಲ್‌ ಪ್ರವೇಶಿಸಿದ್ದಾರೆ.

ಟೂರ್ನಿಯಲ್ಲಿ ಬುಧವಾರ ವಿಶ್ರಾಂತಿ ದಿನವಾಗಿದ್ದು, ಗುರುವಾರ ಭಾರತೀಯರ ಹೋರಾಟ ಮುಂದುವರಿಯಲಿದೆ.