ಒಲಿಂಪಿಕ್‌ ಟಿಕೆಟ್‌ಗೆ ಇನ್ನೊಂದೇ ಮೆಟ್ಟಿಲು

ಡೆನ್‌ ಬಾಷ್‌ (ನೆದರ್ಲೆಂಡ್ಸ್‌) : ಗಮನಾರ್ಹ ಪ್ರದರ್ಶನ ತೋರಿದ ಭಾರತದ ಪುರುಷರ ರಿಕರ್ವ್‌ ತಂಡ ವಿಶ್ವ ಆರ್ಚರಿ ಚಾಂಪಿಯನ್‌ಷಿಪ್‌ನಲ್ಲಿ ಪ್ರಿಕ್ವಾರ್ಟರ್‌ಫೈನಲ್ಸ್‌ ಪ್ರವೇಶಿಸಿದೆ. ಇನ್ನೊಂದು ಗೆಲುವು ದಾಖಲಿಸಿದರೆ ಒಲಿಂಪಿಕ್‌ ಕೋಟಾ ಸ್ಥಾನ ಗಿಟ್ಟಿಸಲಿದೆ.

ಮಂಗಳವಾರ ನಡೆದ ಸ್ಪರ್ಧೆಯಲ್ಲಿ ಸ್ಫೂರ್ತಿದಾಯಕ ಪ್ರದರ್ಶನವಿತ್ತ ಭಾರತ ತಂಡ 5-1 ಅಂತರದಲ್ಲಿ ನಾರ್ವೆ ತಂಡವನ್ನು ಸೋಲಿಸಿ ಪ್ರಿಕ್ವಾರ್ಟರ್‌ಫೈನಲ್ಸ್‌ ತಲುಪಿದೆ. ತರುಣ್‌ದೀಪ್‌ ರಾಯ್‌, ಪ್ರವೀಣ್‌ ಜಾಧವ್‌ ಮತ್ತು ಅತನು ದಾಸ್‌ ಒಳಗೊಂಡ ತಂಡ ಮುಂದಿನ ಪಂದ್ಯದಲ್ಲಿ ಕೆನಡಾದ ಎರಿಕ್‌ ಪೀಟರ್ಸ್‌, ಕ್ರಿಸ್ಪಿನ್‌ ಡುಯೆನಾಸ್‌ ಮತ್ತು ಬ್ರಿಯಾನ್‌ ಮ್ಯಾಕ್ಸ್‌ವೆಲ್‌ ಒಳಗೊಂಡ ತಂಡವನ್ನು ಎದುರಿಸಲಿದೆ. ಆ ಪಂದ್ಯದಲ್ಲಿ ಗೆದ್ದಲ್ಲಿ 2020ರ ಟೋಕಿಯೊ ಒಲಿಂಪಿಕ್‌ ಗೇಮ್ಸ್‌ಗೆ ಭಾರತದ ಮೂವರು ಅಥ್ಲೀಟ್‌ಗಳು ಒಲಿಂಪಿಕ್‌ಗೆ ಅರ್ಹತೆ ಪಡೆಯಲಿದ್ದಾರೆ.
ಇನ್ನು ಮಹಿಳಾ ವಿಭಾಗದಲ್ಲಿ ಎಂಟು ಒಲಿಂಪಿಕ್‌ ಕೋಟಾ ಸ್ಥಾನ ಇರುವ ಈ ಟೂರ್ನಿಯಲ್ಲಿ 55 ದೇಶಗಳ ಪೈಕಿ ಭಾರತ ಮಹಿಳಾ ರಿಕರ್ವ್‌ ತಂಡ ಆರನೇ ಸ್ಥಾನಿಯಾಗಿ ಪ್ರಧಾನ ಸುತ್ತಿಗೆ ಅರ್ಹತೆ ಪಡೆದಿದೆ. ಭಾರತ ಮಹಿಳಾ ತಂಡ ಬುಧವಾರ 11ನೇ ಶ್ರೇಯಾಂಕಿತ ಬೆಲಾರಸ್‌ ತಂಡವನ್ನು ಎದುರಿಸಲಿದೆ.