ಫೈನಲ್‌ಗೆ ಪುರುಷರ ಆರ್ಚರಿ ತಂಡ

ಡೆನ್‌ ಬಾಷ್‌ (ದಿ ನೆದರ್ಲೆಂಡ್ಸ್‌): ಈಗಾಗಲೇ ಒಲಿಂಪಿಕ್‌ ಕೋಟಾ ಸ್ಥಾನ ಗಿಟ್ಟಿಸಿರುವ ಭಾರತ ಪುರುಷರ ರಿಕರ್ವ್‌ ತಂಡ ವಿಶ್ವ ಆರ್ಚರಿ ಚಾಂಪಿಯನ್‌ಷಿಪ್‌ನಲ್ಲಿ 2005ರ ತರುವಾಯ ಮೊದಲ ಬಾರಿ ಫೈನಲ್‌ ಪ್ರವೇಶಿಸಿದೆ.

ಇಲ್ಲಿ ಗುರುವಾರ ನಡೆದ ಸೆಮಿಫೈನಲ್‌ ಪಂದ್ಯದಲ್ಲಿ ಭಾರತ ತಂಡ ಪ್ರಬಲ ನೆದರ್ಲೆಂಡ್ಸ್‌ ತಂಡವನ್ನು ಪರಾಭವಗೊಳಿಸಿ ಪ್ರಶಸ್ತಿ ಸುತ್ತು ತಲುಪಿದೆ. ಭಾನುವಾರ ನಡೆಯಲಿರುವ ಫೈನಲ್‌ನಲ್ಲಿ ಭಾರತ ತಂಡ ಚೊಚ್ಚಲ ಪ್ರಶಸ್ತಿಗಾಗಿ ಚೀನಾ ತಂಡವನ್ನು ಎದುರಿಸಲಿದೆ. ಮತ್ತೊಂದು ಸೆಮಿಫೈನಲ್‌ ಪಂದ್ಯದಲ್ಲಿ ಚೀನಾ ತಂಡ 6-2 ಅಂತರದಲ್ಲಿ ಅಗ್ರ ಶ್ರೇಯಾಂಕಿತ ಕೊರಿಯಾ ತಂಡವನ್ನು ಸೋಲಿಸಿ ಫೈನಲ್‌ ತಲುಪಿದೆ.

ಕ್ವಾರ್ಟರ್‌ಫೈನಲ್ಸ್‌ ಪ್ರವೇಶಿಸುವ ಮೂಲಕ 2020ರ ಟೋಕಿಯೊ ಒಲಿಪಿಂಕ್ಸ್‌ಗೆ ಕೋಟಾ ಸ್ಥಾನ ಪಡೆದ ತರುಣ್‌ದೀಪ್‌ ರಾಯ್‌, ಅತನು ದಾಸ್‌ ಮತ್ತು ಪ್ರವೀಣ್‌ ಜಾಧವ್‌ ಒಳಗೊಂಡ ಭಾರತ ತಂಡ ಆರಂಭಿಕ ಹಿನ್ನಡೆಯ ಹೊರತಾಗಿಯೂ 5-4 ಅಂತರದಲ್ಲಿ ಗೆಲುವು ಸಾಧಿಸಿತು. ಈ ಮಧ್ಯೆ ಮಹಿಳಾ ಕಾಂಪೌಂಡ್‌ ತಂಡ ಕಂಚಿನ ಪದಕಕ್ಕಾಗಿ ಶನಿವಾರ ಟರ್ಕಿ ತಂಡವನ್ನು ಮುಖಾಮುಖಿಯಾಗಲಿದೆ.