ಐರ್ಲೆಂಡ್‌ ಎದುರು ಭಾರತ ಭರ್ಜರಿ ಜಯ

ಮುರ್ಸಿಯಾ (ಸ್ಪೇನ್‌) : ಸ್ಫೂರ್ತಿಯುತ ಪ್ರದರ್ಶನ ತೋರಿದ ಭಾರತದ ಮಹಿಳಾ ಹಾಕಿ ತಂಡ ಸ್ಪೇನ್‌ ಟೂರ್‌ನ ಕೊನೆಯ ಪಂದ್ಯದಲ್ಲಿ ಐರ್ಲೆಂಡ್‌ ವಿರುದ್ಧ ಭರ್ಜರಿ ಜಯ ದಾಖಲಿಸಿ ಫಲಪ್ರದವಾಗಿ ಪ್ರವಾಸ ಅಂತ್ಯಗೊಳಿಸಿದೆ.

ಐರ್ಲೆಂಡ್‌ ವಿರುದ್ಧ ಭಾನುವಾರ ನಡೆದ ದ್ವಿತೀಯ ಹಾಗೂ ಕೊನೆಯ ಪಂದ್ಯದಲ್ಲಿ ಭಾರತ 3-0 ಗೋಲ್‌ಗಳ ಅಂತರದಲ್ಲಿ 2018ರ ವಿಶ್ವ ಕಪ್‌ ಬೆಳ್ಳಿ ಪದಕ ವಿಜೇತ ಐರ್ಲೆಂಡ್‌ ಎದುರು ಅಧಿಕಾರಯುತ ಜಯ ದಾಖಲಿಸಿತು. ಭಾರತ ಪರ ನವ್‌ಜೋತ್‌ ಕೌರ್‌, ರೀನಾ ಖೋಕರ್‌ ಮತ್ತು ಗುರ್ಜಿತ್‌ ಕೌರ್‌ ತಲಾ ಒಂದು ಗೋಲ್‌ ಬಾರಿಸಿದರು. ಪಂದ್ಯದ ಆರಂಭದಿಂದಲೇ ಆಕ್ರಮಣಕಾರಿ ಆಟಕ್ಕಿಳಿದ ಭಾರತೀಯ ಆಟಗಾರ್ತಿಯರು ಪದೇಪದೇ ಐರಿಷ್‌ ರಕ್ಷ ಣಾ ಪಡೆಯ ಮೇಲೆ ಒತ್ತಡ ಹೇರಿದರು. 13ನೇ ನಿಮಿಷದಲ್ಲಿ ನವ್‌ಜೋತ್‌ ಕೌರ್‌ ಮೂಲಕ 1-0 ಅಂತರದ ಮುನ್ನಡೆ ಗಳಿಸಿದ ಭಾರತ, ದ್ವಿತೀಯ ಕ್ವಾರ್ಟರ್‌ ಮುಕ್ತಾಯಕ್ಕೆ ಮುಂಚೆಯೇ ರೀನಾ ನೆರವಿನಿಂದ ಮುನ್ನಡೆಯನ್ನು 2-0ಗೆ ಹಿಗ್ಗಿಸಿಕೊಂಡಿತು. ಕೊನೆಯಲ್ಲಿ ಗುರ್ಜಿತ್‌ ಕೌರ್‌ ಗೋಲ್‌ ಬಾರಿಸಿ ಜಯದ ಅಂತರವನ್ನು 3-0ಗೆ ವಿಸ್ತರಿಸಿದರು.