ಇಂಡೋನೇಷ್ಯಾ ಮಾಸ್ಟರ್ಸ್; ಫೈನಲ್‌ನಲ್ಲಿ ಮುಗ್ಗರಿಸಿದ ಸೈನಾ

ಜಕರ್ತಾ: ಇಲ್ಲಿ ನಡೆದ ಪ್ರತಿಷ್ಠಿತ ಇಂಡೋನೇಷ್ಯಾ ಮಾಸ್ಟರ್ಸ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಭಾರತದ ಸೈನಾ ಹಿರಿಯ ಅನುಭವಿ ಆಟಗಾರ್ತಿ ಹಾಗೂ ವಿಶ್ವ ನಂ.12 ರ‍್ಯಾಂಕ್‌ನ ಸೈನಾ ನೆಹ್ವಾಲ್ ರನ್ನರ್ ಅಪ್ ಪ್ರಶಸ್ತಿಗೆ ತೃಪ್ತಿಪಟ್ಟುಕೊಂಡಿದ್ದಾರೆ.

ಭಾನುವಾರ ಮಹಿಳಾ ಸಿಂಗಲ್ಸ್ ವಿಭಾಗದಲ್ಲಿ ನಡೆದ ಫೈನಲ್ ಹಣಾಹಣಿಯಲ್ಲಿ ಸೈನಾ ಅವರು ವಿಶ್ವದ ನಂ.1 ಆಟಗಾರ್ತಿ ತೈವಾನ್‌ನ ಥೈ ಟ್ಜು ಯಿಂಗ್‌ ವಿರುದ್ಧ 9- 21 13-21ರ ಅಂತರದಲ್ಲಿ ಪರಾಭವಗೊಂಡರು.

3.5 ಲಕ್ಷ ಅಮೆರಿಕನ್ ಡಾಲರ್ ಪ್ರಶಸ್ತಿ ಮೊತ್ತದ ಟೂರ್ನಿಯಲ್ಲಿ ಸೈನಾ ಪ್ರಶಸ್ತಿ ಗೆಲುವಿನ ಸನಿಹ ತಲುಪಿ ಎಡವಿ ಬಿದ್ದಿದ್ದರು. ಈ ಮೂಲಕ ವಿಶ್ವದ ಅಗ್ರ ಕ್ರಮಾಂಕದ ಥೈ ಟ್ಜು ಯಿಂಗ್‌ ವಿರುದ್ಧ ಸತತ ಏಳನೇ ಸೋಲಿಗೊಳಗಾದರು. ಒಟ್ಟಿನಲ್ಲಿ ಕೊನೆಯ 10 ಮುಖಾಮುಖಿಯಲ್ಲಿ ಒಂಬತ್ತು ಬಾರಿ ಸೋಲು ಅನುಭವಿಸಿದ್ದಾರೆ.

ಸೈನಾ ಹೋರಾಟ ಕೇವಲ 27 ನಿಮಿಷಗಳಲ್ಲಿ ಕೊನೆಗೊಂಡಿತ್ತು. ಈ ಮೂಲಕ ಟೂರ್ನಿಯಲ್ಲಿ ಮೊದಲ ಬಾರಿಗೆ ನಿರಾಸೆ ಅನುಭವಿಸಿದರು.

ಈ ಮೊದಲು ಕ್ವಾರ್ಟರ್ ಹಣಾಹಣಿಯಲ್ಲಿ ಭಾರತದವರೇ ಆಗಿರುವ ತಮ್ಮ ಸಹ ಆಟಗಾರ್ತಿ ಪಿವಿ ಸಿಂಧೂ ವಿರುದ್ಧ ಸೈನಾ ಗೆಲುವು ದಾಖಲಿಸಿದ್ದರು.