ನಾನು ಯಾರಿಗೂ ಏನನ್ನು ಸಾಬೀತುಮಾಡಬೇಕಿಲ್ಲ: ಪೇಸ್

ಕೋಲ್ಕತ್ತಾ: ಡೇವಿಸ್ ಕಪ್‌ಗಾಗಿನ ಭಾರತ ತಂಡದಿಂದ ಹಿರಿಯ ಅನುಭವಿ ಡಬಲ್ಸ್ ಟೆನಿಸ್ ಪಟು ಲಿಯಾಂಡರ್ ಪೇಸ್ ಅವರನ್ನು ಕಡೆಗಣಿಸಿರಬಹುದು. ಆದರೆ ಪೇಸ್ ಮಾತ್ರ ಹಿಂಜರಿಯುವ ಯಾವುದೇ ಯೋಚನೆಯಲ್ಲಿಲ್ಲ. ಬದಲಾಗಿ ತನ್ನ ವೃತ್ತಿಜೀವನದ ಈ ಹಂತದಲ್ಲಿ ಯಾರಿಗೂ ಸಾಬೀತುಪಡಿಸಲು ಏನೂ ಇಲ್ಲ ಎಂದು ಕೆಚ್ಚೆದೆಯ ಮಾತುಗಳನ್ನಾಡಿದ್ದಾರೆ.

1990ನೇ ಇಸವಿಯಲ್ಲಿ ತಮ್ಮ 16ನೇ ಹರೆಯದಲ್ಲೇ ಪೇಸ್ ಚೊಚ್ಚಲ ಬಾರಿಗೆ ಡೇವಿಸ್‌ ಕಪ್‌ನಲ್ಲಿ ಭಾರತ ತಂಡವನ್ನು ಪ್ರತಿನಿಧಿಸಿದ್ದರು. ಅಷ್ಟೇ ಅಲ್ಲದೆ ಡೇವಿಸ್ ಕಪ್ ಡಬಲ್ಸ್‌ನಲ್ಲಿ ದಾಖಲೆಯ 42 ಬಾರಿ ಗೆಲುವು ದಾಖಲಿಸಿದ ದಾಖಲೆಯೂ ಅವರ ಹೆಸರಲ್ಲಿದೆ.

ಪೇಸ್ ಅವರನ್ನು ಭಾರತ ತಂಡದ ಆಡದ ನಾಯಕನಾಗಿರುವ ಮಹೇಶ್ ಭೂಪತಿ ಹೊರದಬ್ಬಿದ್ದರು. ಆದರೂ ಇಲ್ಲಿಗೆ ಟೆನಿಸ್ ವೃತಿ ಜೀವನ ಕೊನೆಗೊಳಿಸಲು 44ರ ಹರೆಯದ ಪೇಸ್ ಬಯಸುತ್ತಿಲ್ಲ.

ನಾನೇನು ಸಾಬೀತುಮಾಡಬೇಕಾಗಿರುವುದು ಏನು ಇಲ್ಲ. ನನ್ನ ವೃತ್ತಿ ಜೀವನವೇ ಎಲ್ಲವನ್ನು ಹೇಳುತ್ತದೆ. ಈ ಹಂತದಲ್ಲೂ ಟೆನಿಸ್ ಆಡುತ್ತಿದ್ದೇನೆ ಯಾಕೆಂದರೆ ಟೆನಿಸ್ ಕ್ರೀಡೆಯನ್ನು ನಾನು ಪ್ರೀತಿಸುತ್ತಿದ್ದೇನೆ ಎಂದರು.

ದೇಶಕ್ಕಾಗಿ ಆಡಿದಾಗ ನನ್ನ ಶ್ರೇಷ್ಠ ಪ್ರದರ್ಶನವನ್ನೇ ನೀಡಿದ್ದೇನೆ. ದೇಶಕ್ಕಾಗಿ ಆಡುವಾಗ ಬಹಳ ಸಂತೋಷ ಹಾಗೂ ಹೆಮ್ಮೆಯನ್ನು ನೀಡಿದೆ. ಗ್ರ್ಯಾನ್‌ಸ್ಲಾಮ್‌ನಲ್ಲೂ ವೈಯಕ್ತಿಕವಾಗಿ ಆಡುವಾಗಲೂ ಕೂಡಾ ನನ್ನ ಧ್ವಜಕ್ಕಾಗಿ ಆಡುವ ಭಾವನೆಯುಂಟಾಗಿದೆ ಎಂದರು.

ಅಂತಿಮವಾಗಿ ಜಾಗತಿಕ ಮಟ್ಟದಲ್ಲಿ ನಮ್ಮ ದೇಶದ ಬಾವುಟ ಎತ್ತರದಲ್ಲಿ ಹಾರಬೇಕೆಂಬ ಭಾವನೆ ನನ್ನದಾಗಿದೆ ಎಂದರು.