ಮುಂದುವರಿದ ಡೆಲ್ಲಿ ಪಾರಮ್ಯ

ಪಟನಾ : ಜೈಪುರ ಪಿಂಕ್‌ ಪ್ಯಾಂಥರ್ಸ್‌ಗೆ 35-24 ಅಂಕಗಳ ಅಂತರದಿಂದ ಸೋಲುಣಿಸಿದ ದಬಾಂಗ್‌ ಡೆಲ್ಲಿ 7ನೇ ಆವೃತ್ತಿಯ ಪಿಕೆಎಲ್‌ ಟೂರ್ನಿಯಲ್ಲಿ ತನ್ನ ಪಾರಮ್ಯ ಮುಂದುವರಿಸಿದೆ.

ಇಲ್ಲಿನ ಪಾಟಲೀಪುತ್ರ ಒಳಾಂಗಣ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಟೂರ್ನಿಯ 27ನೇ ಹಣಾಹಣಿಯುದ್ದಕ್ಕೂ ಅತ್ಯುತ್ತಮ ಪ್ರದರ್ಶನ ತೋರಿದ ಡೆಲ್ಲಿ , ಗೆಲುವಿನ ಸಿಹಿಯುಂಡಿತು. ಜತೆಗೆ ಕಳೆದ ಪಂದ್ಯದಲ್ಲಿ ಗುಜರಾತ್‌ ಫಾರ್ಚೂನ್‌ಜಯಂಟ್ಸ್‌ ವಿರುದ್ಧದ ಸೋಲಿನ ಕಹಿಯನ್ನು ಮರೆಯಿತು. ಇದುವರೆಗೆ ಆಡಿದ 5 ಪಂದ್ಯಗಳಲ್ಲಿ ನಾಲ್ಕು ಗೆಲುವು ಕಂಡಿರುವ ಡೆಲ್ಲಿ ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನ ಕಾಪಾಡಿಕೊಂಡಿದೆ. ಡೆಲ್ಲಿ ಪರ ನವೀನ್‌ ಕುಮಾರ್‌ 12 ಹಾಗೂ ಚಂದ್ರನ್‌ ರಂಜಿತ್‌ 10 ಅಂಕ ಗಳಿಸಿದರು. ಜೈಪುರ ಪರ ದೀಪಕ್‌ ಹೂಡಾ 11 ಅಂಕ ಗಳಿಸಿದರು. ಆದರೆ, ತಂಡಕ್ಕೆ ಗೆಲುವು ಕೊಡಿಸುವಲ್ಲಿ ವಿಫಲರಾದರು.
ಗೆದ್ದ ಪುಣೇರಿ:
ದಿನದ ಎರಡನೇ ಪಂದ್ಯ ಅತ್ಯಂತ ರೋಚಕವಾಗಿ ನಡೆಯಿತು. 7ನೇ ಆವೃತ್ತಿಯಲ್ಲಿ ಇದುವರೆಗೆ ಸಪ್ಪೆ ಪ್ರದರ್ಶನ ನೀಡುತ್ತಾ ಬಂದಿದ್ದ ಪುಣೇರಿ ಪಲ್ಟನ್‌ 33-31 ಅಂಕಗಳ ಅಂತರದಿಂದ ಗುಜರಾತ್‌ ಸೂಪರ್‌ಜಯಂಟ್ಸ್‌ಗೆ ಸೋಲುಣಿಸಿತು. ಪ್ರಬಲ ತಂಡ ಜಯಂಟ್ಸ್‌ಗೆ ಆರಂಭದಿಂದಲೇ ಸಡ್ಡು ಹೊಡೆಯುತ್ತಲೇ ಬಂದ ಪಲ್ಟನ್‌, ಟೂರ್ನಿಯಲ್ಲಿ ಎರಡನೇ ಜಯ ದಾಖಲಿಸಿತು. ಪುಣೇರಿ ಪರ ಪವನ್‌, ಅಮಿತ್‌ ಹಾಗೂ ಗಿರೀಶ್‌ ತಲಾ ಆರು ಅಂಕಗಳನ್ನು ಗಳಿಸಿದರು.