ಖೇಲೋ ಇಂಡಿಯಾ 2022: ಈಜಿನಲ್ಲಿ 'ನವ' ತಾರೆ ಶಿವ ಶ್ರೀಧರ್‌ಗೆ 'ಸಪ್ತ' ಸ್ವರ್ಣ!

ಬೆಂಗಳೂರು: ನಿರೀಕ್ಷೆಯಂತೆ ಈಜುಕೊಳದಲ್ಲಿ ಪ್ರಭುತ್ವ ಸಾಧಿಸಿದ ಜೈನ್ ವಿಶ್ವವಿದ್ಯಾನಿಲಯ ಬರೋಬ್ಬರಿ 14 ಚಿನ್ನದ ಪದಕಗಳನ್ನು ಗೆದ್ದುಕೊಂಡಿದೆ. 7 ಚಿನ್ನ ಮತ್ತು 2 ಬೆಳ್ಳಿ ಪದಕಗಳನ್ನು ಗೆದ್ದಿರುವ ಜೈನ್ ಕಾಲೇಜಿನ ಶಿವ ಶ್ರೀಧರ್ ಭಾರತದ ಹೊಸ ಸ್ಟಾರ್‌ ಈಜುಪಟುವಾಗಿ ಹೊರಹೊಮ್ಮಿದ್ದಾರೆ. ಹಿಂದಿನ ಕ್ರೀಡಾಕೂಟದಲ್ಲಿ ಸಿದ್ಧಾಂತ್ ಸೆಜ್ವಾಲ್ ಮತ್ತು ಸಾಧ್ವಿ ಧುರಿ ತಲಾ 5 ಚಿನ್ನದ ಪದಕಗಳನ್ನು ಗೆದ್ದು ದಾಖಲೆ ನಿರ್ಮಿಸಿದ್ದರು. ಈ ಬಾರಿ ಶಿವ ಶ್ರೀಧರ್‌ ಎಲ್ಲ ದಾಖಲೆಗಳನ್ನು ಧೂಳಿಪಟ ಮಾಡಿದ್ದಾರೆ. ವನಿತೆಯರ 200 ಮೀ. ವೈಯಕ್ತಿಕ ಮೆಡ್ಲೆಯಲ್ಲಿ ಜೈನ್ ವಿಶ್ವವಿದ್ಯಾನಿಲಯದ ಶೃಂಗಿ ಬಾಂಡೇಕರ್ ನೂತನ ಕೂಟ ದಾಖಲೆಯೊಂದಿಗೆ ಚಿನ್ನದ ಪದಕ ಗೆದ್ದರು. 2 ನಿಮಿಷ 32.98 ಸೆಕೆಂಡುಗಳಲ್ಲಿ ಗುರಿ ತಲುಪುವ ಮೂಲಕ ಈ ದಾಖಲೆ ಬರೆದರು. 2020ರಲ್ಲಿ ಸಾಧ್ವಿ ಧುರಿ 2 ನಿಮಿಷ 34.50 ಸೆಕೆಂಡುಗಳಲ್ಲಿ ಗುರಿ ತಲುಪಿ ಈ ದಾಖಲೆ ನಿರ್ಮಿಸಿದ್ದರು. ವೀರ್ ನರ್ಮದ್ ಗುಜರಾತ್ ವಿಶ್ವವಿದ್ಯಾನಿಲಯದ ಕಲ್ಯಾಣಿ ಸಕ್ಸೇನಾ 2 ನಿಮಿಷ, 36.06 ಸೆಕೆಂಡುಗಳಲ್ಲಿ ಗುರಿ ತಲುಪಿ ಬೆಳ್ಳಿ ಪದಕ ಗೆದ್ದರೆ, ಜಾದವ್‌ಪುರ ವಿಶ್ವವಿದ್ಯಾನಿಲಯದ ಶೃತಿ ಉಪಾಧ್ಯಾಯ 2 ನಿಮಿಷ 37.33 ಸೆಕೆಂಡುಗಳಲ್ಲಿ ಗುರಿ ತಲುಪಿ ಕಂಚಿನ ಪದಕ ತಮ್ಮದಾಗಿಸಿಕೊಂಡರು.

50 ಮೀ. ಬ್ಯಾಕ್‌ಸ್ಟ್ರೋಕ್‌ನಲ್ಲಿ ಜೈನ್ ಕಾಲೇಜಿನ ಶೃಂಗೀ ಬಾಂಡೇಕರ್ 32:01 ಸೆಕೆಂಡುಗಳಲ್ಲಿ ಗುರಿ ತಲುಪಿ ಮತ್ತೊಂದು ಕೂಟ ದಾಖಲೆಯೊಂದಿಗೆ ಚಿನ್ನ ಗೆದ್ದರು. ಉತ್ಕಲ್ ವಿಶ್ವವಿದ್ಯಾನಿಲಯದ ಪ್ರತ್ಯಸಾ ರೇ 32:67 ಸೆಕೆಂಡುಗಳಲ್ಲಿ ಗುರಿ ತಲುಪಿ ಬೆಳ್ಳಿ ಗೆದ್ದರು. ಕಳೆದ ಬಾರಿ ದಾಖಲೆ ಬರೆದಿದ್ದ ರಾಜೀವ್ ಗಾಂಧೀ ಆರೋಗ್ಯ ವಿಜ್ಞಾನ ವಿಶ್ವವಿದ್ಯಾನಿಲಯವನ್ನು ಪ್ರತಿನಿಧಿಸಿದ್ದ ಕರ್ನಾಟಕದ ಧಾಮಿನಿ ಗೌಡ 33:01 ಸೆಕೆಂಡುಗಳಲ್ಲಿ ಗುರಿ ತಲುಪಿ ಕಂಚಿನ ಪದಕ ಸಂಪಾದಿಸಿದರು.

ಖೇಲೋ ಇಂಡಿಯಾ 2022: ಆರನೇ ಚಿನ್ನ ಗೆದ್ದ ಜೈನ್‌ ವಿ.ವಿಯ ಶಿವ ಶ್ರೀಧರ್‌!

ಶ್ರೀಹರಿ ನಟರಾಜ್ ರಾಷ್ಟ್ರೀಯ ದಾಖಲೆ
ಪುರುಷರ 50 ಮೀ ಬ್ಯಾಕ್‌ಸ್ಟ್ರೋಕ್‌ನಲ್ಲಿ ಜೈನ್ ಕಾಲೇಜಿನ ಶ್ರೀಹರಿ ನಟರಾಜ್, 26:10 ಸೆಕೆಂಡುಗಳಲ್ಲಿ ಗುರಿ ತಲುಪಿ ನೂತನ ರಾಷ್ಟ್ರೀಯ ದಾಖಲೆ ಬರೆದರು. 27:10 ಸೆಕೆಂಡುಗಳಲ್ಲಿ ಗುರಿ ತಲುಪಿದ ಶಿವ ಶ್ರೀಧರ್ ತಮ್ಮದೇ ದಾಖಲೆಯನ್ನು ಮುರಿದು ಬೆಳ್ಳಿ ಗೆದ್ದರು. 27:69 ಸೆಕೆಂಡುಗಳಲ್ಲಿ ಗುರಿ ತಲುಪಿದ ಪಂಜಾಬ್ ವಿಶ್ವವಿದ್ಯಾನಿಲಯದ ಸಂದೀಪ್ ಸೆಜ್ವಾಲ್ ಕಂಚಿನ ಪದಕ ಗೆದ್ದರು.


100 ಮೀ. ಫ್ರೀಸ್ಟೈಲ್‌ನಲ್ಲಿ ಜೈನ್ ಕಾಲೇಜಿನ ಶ್ರೀಹರಿ ನಟರಾಜ್, 50:98 ಸೆಕೆಂಡುಗಳಲ್ಲಿ ಗುರಿ ತಲುಪಿ ಚಿನ್ನದ ಪದಕದೊಂದಿಗೆ ಕೂಟ ದಾಖಲೆ ಬರೆದರು. ಮುಂಬೈ ವಿಶ್ವವಿದ್ಯಾನಿಲಯದ ಹೀರಾ ಶಾ 53:01 ಸೆಕೆಂಡುಗಳಲ್ಲಿ ಗುರಿ ತಲುಪಿ ಬೆಳ್ಳಿ ಗೆದ್ದರು. ಅಣ್ಣಾ ವಿಶ್ವವಿದ್ಯಾನಿಲಯದ ಆದಿತ್ಯ ದಿನೇಶ್ 52.79 ಸೆಕೆಂಡುಗಳಲ್ಲಿ ಗುರಿ ತಲುಪಿ ಕಂಚಿನ ಪದಕ ಗೆದ್ದರು.

ಖೇಲೋ ಇಂಡಿಯಾ 2022: ಜೈನ್ ವಿ.ವಿಯ ಶೃಂಗೀ ಬಾಂಡೇಕರ್‌ ಚಿನ್ನದ ಮೀನು!


ಹಾಕಿ: ಬೆಂಗಳೂರು, ಮೈಸೂರಿಗೆ ಜಯ
ಫೀಲ್ಡ್ ಮಾರ್ಷಲ್ ಕಾರಿಯಪ್ಪ ಹಾಕಿ ಅಂಗಣದಲ್ಲಿ ನಡೆದ ಖೇಲೋ ಇಂಡಿಯಾ ಹಾಕಿ ಪಂದ್ಯಾವಳಿಯಲ್ಲಿ ಬೆಂಗಳೂರು ವಿಶ್ವವಿದ್ಯಾನಿಲಯವು ಸಾವಿತ್ರಿ ಬಾಯಿ ಫುಲೆ ವಿಶ್ವವಿದ್ಯಾನಿಲಯವನ್ನು 1-0 ಗೋಲಿನಿಂದ ಮಣಿಸಿ ಮುನ್ನಡೆದಿದೆ. ಶಮಂತ್ ಸಿ.ಎಸ್ ಪೆನಾಲ್ಟಿ ಕಾರ್ನರ್ ಮೂಲಕ 28ನೇ ನಿಮಿಷದಲ್ಲಿ ಗಳಿಸಿದವ ಏಕೈಕ ಗೋಲಿನಿಂದ ಬೆಂಗಳೂರು ವಿವಿ ಜಯ ಸಾಧಿಸಿತು. ಮತ್ತೊಂದೆಡೆ ಬೆಂಗಳೂರು ಸಿಟಿ ವಿಶ್ವವಿದ್ಯಾನಿಲಯ ತಂಡವು ವಿಬಿಎಸ್ ಪೂರ್ವಾಂಚಲ್ ವಿಶ್ವವಿದ್ಯಾನಿಲಯದ ವಿರುದ್ಧ 3-1 ಗೋಲುಗಳ ಅಂತರದಲ್ಲಿ ಜಯ ಗಳಿಸಿದೆ.

ವನಿತೆಯರ ಹಾಕಿಯಲ್ಲಿ ಮೈಸೂರು ವಿಶ್ವವಿದ್ಯಾನಿಲಯವು ಸಾವಿತ್ರಿ ಬಾಯಿ ಫುಲೆ ವಿಶ್ವವಿದ್ಯಾನಿಲಯದ ವಿರುದ್ಧ 2-0 ಗೋಲುಗಳಿಂದ ಜಯ ಗಳಿಸಿತು. ಮೈಸೂರು ವಿಶ್ವವಿದ್ಯಾನಿಲಯದ ಪರ ಪೂಜಿತ ಮತ್ತು ಹೇಮಾ ಹಪ್ಪಳಿ ಗೋಲು ಗಳಿಸಿ ತಂಡದ ಜಯಕ್ಕೆ ನೆರವಾದರು.