ಆಸ್ಪ್ರೇಲಿಯನ್‌ ಓಪನ್‌ ಸೂಪರ್‌ ಸೀರೀಸ್‌ ಬ್ಯಾಡ್ಮಿಂಟನ್‌ ಟೂರ್ನಿ | ಕ್ವಾರ್ಟರ್‌ ಫೈನಲ್‌ನಲ್ಲಿ ಮುಗ್ಗರಿಸಿದ ಸೈನಾ, ಸಿಂಧೂ
ಸಿಡ್ನಿ: ಅಮೋಘ ಫಾರ್ಮ್‌ ಮುಂದುವರಿಸಿರುವ ಭಾರತದ ಅಗ್ರಮಾನ್ಯ ಸಿಂಗಲ್ಸ್‌ ಆಟಗಾರ ಕಿಡಂಬಿ ಶ್ರೀಕಾಂತ್‌, ಇಲ್ಲಿ ನಡೆಯುತ್ತಿರುವ ಆಸ್ಪ್ರೇಲಿಯನ್‌ ಓಪನ್‌ ಸೂಪರ್‌ ಸೀರೀಸ್‌ ಬ್ಯಾಡ್ಮಿಂಟನ್‌ ಟೂರ್ನಿಯಲ್ಲಿ ಸೆಮಿಫೈನಲ್‌ಗೆ ಲಗ್ಗೆಯಿಟ್ಟಿದ್ದಾರೆ. ಆದರೆ ಮಹಿಳಾ ಸಿಂಗಲ್ಸ್‌ನಲ್ಲಿ ಸೈನಾ ನೆಹ್ವಾಲ್‌ ಮತ್ತು ಪಿ.ವಿ ಸಿಂಧೂ ಸೋಲು ಕಂಡಿದ್ದಾರೆ.
ಶುಕ್ರವಾರ ನಡೆದ ಪುರುಷರ ಸಿಂಗಲ್ಸ್‌ ಕ್ವಾರ್ಟರ್‌ ಫೈನಲ್‌ ಹಣಾಹಣಿಯಲ್ಲಿ ವಿಶ್ವದ 11ನೇ ರ‍್ಯಾಂಕ್‌ನ ಶ್ರೀಕಾಂತ್‌, ಭಾರತದವರೇ ಆದ ಬಿ.ಸಾಯಿ ಪ್ರಣೀತ್‌ ಅವರ ಕಠಿಣ ಸವಾಲನ್ನು 25-23, 21-17ರಿಂದ ಹಿಮ್ಮೆಟ್ಟಿಸಿ 4ರ ಘಟ್ಟಕ್ಕೆ ಅರ್ಹತೆ ಪಡೆದರು. ಇದರೊಂದಿಗೆ ಇದೇ ವರ್ಷ ನಡೆದ ಸಿಂಗಾಪುರ ಓಪನ್‌ ಚಾಂಪಿಯನ್‌ಷಿಪ್‌ನ ಫೈನಲ್‌ನಲ್ಲಿ ಸಾಯಿ ಪ್ರಣೀತ್‌ ವಿರುದ್ಧ ಎದುರಾದ ಪರಾಭವಕ್ಕೆ ಶ್ರೀಕಾಂತ್‌ ಸೇಡು ತೀರಿಸಿಕೊಂಡರು. ಕಳೆದ ವಾರವಷ್ಟೇ ಶ್ರೀಕಾಂತ್‌ ಇಂಡೊನೇಷ್ಯಾ ಓಪನ್‌ ಕಿರೀಟವನ್ನು ಮುಡಿಗೇರಿಸಿಕೊಂಡಿದ್ದರು.
ಹೈದರಾಬಾದ್‌ನ ಪುಲ್ಲೇಲ ಗೋಪಿಚಂದ್‌ ಅಕಾಡೆಮಿಯಲ್ಲಿ ಜತೆಯಾಗಿ ಅಭ್ಯಾಸ ನಡೆಸುವ ಶ್ರೀಕಾಂತ್‌ ಮತ್ತು ಸಾಯಿ ಪ್ರಣೀತ್‌ ಕದನ ರೋಚಕತೆಯಿಂದ ಕೂಡಿತ್ತು. 24 ವರ್ಷದ ಆಟಗಾರರಾದ ಇಬ್ಬರೂ ಪ್ರತಿ ಅಂಕಕ್ಕೂ ಕಠಿಣ ಪರಿಶ್ರಮ ಪಡಬೇಕಾಯಿತು. ತೀವ್ರ ಪೈಪೋಟಿಯಿಂದ ಕೂಡಿದ್ದ ಮೊದಲ ಗೇಮ್‌ನಲ್ಲಿ ಅಂತಿಮ ಕ್ಷ ಣದವರೆಗೂ ಜಿದ್ದಾಜಿದ್ದಿನ ಹೋರಾಟ ಕಂಡು ಬಂತು. ಆದರೆ ಕೊನೆಯ ಕ್ಷ ಣದ ಒತ್ತಡ ನಿಭಾಯಿಸಿದ ಶ್ರೀಕಾಂತ್‌ 25-23ರಲ್ಲಿ ಗೇಮ್‌ ಗೆದ್ದು ಸೆಮಿಫೈನಲ್‌ ಹಾದಿಯನ್ನು ಸುಗಮವಾಗಿಸಿಕೊಂಡರು.
2ನೇ ಗೇಮ್‌ನಲ್ಲೂ ವಿಶ್ವ ರಾರ‍ಯಂಕಿಂಗ್‌ನಲ್ಲಿ 15ನೇ ಸ್ಥಾನದಲ್ಲಿರುವ ಸಾಯಿ ಪ್ರಣೀತ್‌, ತಮ್ಮ ಸ್ನೇಹಿತನಿಗೆ ಬೆವರಿಳಿಸುವಲ್ಲಿ ಯಶಸ್ವಿಯಾದರು. ಆದರೆ ತಮ್ಮ ಇತ್ತೀಚಿನ ಶ್ರೇಷ್ಠ ಫಾರ್ಮ್‌ನಿಂದ ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿರುವ ಶ್ರೀಕಾಂತ್‌ 21-17ರಲ್ಲಿ ಗೇಮ್‌ ಗೆದ್ದು ಸೆಮೀಸ್‌ಗೆ ಲಗ್ಗೆಯಿಟ್ಟರು. ಸೆಮಿಫೈನಲ್‌ನಲ್ಲಿ ಶ್ರೀಕಾಂತ್‌ ಚೈನೀಸ್‌ ತೈಪೆಯ ಆಟಗಾರ, 4ನೇ ಶ್ರೇಯಾಂಕದ ಯುಗಿ ಶಿ ಅವರ ಸವಾಲು ಪಡೆದಿದ್ದಾರೆ.
ಸೈನಾಗೆ ವೀರೋಚಿತ ಸೋಲು
ಮಹಿಳಾ ಸಿಂಗಲ್ಸ್‌ನಲ್ಲಿ ಭಾರತದ ಅನುಭವಿ ಆಟಗಾರ್ತಿ ಸೈನಾ ನೆಹ್ವಾಲ್‌ ಅವರ ಅಭಿಯಾನ ಅಂತ್ಯಗೊಂಡಿದೆ. ಹಾಲಿ ಚಾಂಪಿಯನ್‌ ಸೈನಾ ಕ್ವಾರ್ಟರ್‌ ಫೈನಲ್‌ ಪಂದ್ಯದಲ್ಲಿ ಚೀನಾದ ಸುನ್‌ ಯು ವಿರುದ್ಧ 17-21, 21-10, 17-21ರ ಕಠಿಣ ಹೋರಾಟದಲ್ಲಿ ಸೋತರು. 6ನೇ ಶ್ರೇಯಾಂಕದ ಸುನ್‌ ವಿರುದ್ಧ ಮೊದಲ ಗೇಮ್‌ನ ಆರಂಭದಲ್ಲೇ 1-7ರ ಹಿನ್ನಡೆ ಅನುಭವಿಸಿದ ಸೈನಾ ನೆಹ್ವಾಲ್‌, ಅದ್ಭುತ ರೀತಿಯಲ್ಲಿ ಪುಟಿದೆದ್ದು ನಿಂತು 17-15ರಲ್ಲಿ ಮುನ್ನಡೆ ಸಾಧಿಸಿ ಗೇಮ್‌ ಗೆಲ್ಲುವತ್ತ ಹೆಜ್ಜೆ ಹಾಕಿದ್ದರು. ಆದರೆ ಈ ವೇಳೆ ತಿರುಗೇಟು ನೀಡಿದ ಚೀನಾ ತಾರೆ ಸತತ 6 ಅಂಕ ಗಳಿಸಿ ಗೇಮ್‌ ವಶಪಡಿಸಿಕೊಂಡರು.
2ನೇ ಗೇಮ್‌ನ ಆರಂಭÜದಲ್ಲಿ 1-3ರ ಹಿನ್ನಡೆಯಲ್ಲಿದ್ದ ಸೈನಾ, ಅಬ್ಬರದ ಆಟದ ಮೂಲಕ ಸತತ 8 ಅಂಕಗಳನ್ನು ಕಲೆ ಹಾಕಿ ವಿಶ್ವದ 6ನೇ ರಾರ‍ಯಂಕ್‌ನ ಆಟಗಾರ್ತಿಯ ಮೇಲೆ ಒತ್ತಡ ಹೇರಿದರು. ಅಲ್ಲದೆ ಅಧಿಕಾರಯುತ ಆಟವನ್ನು ಮುಂದುವರಿಸಿ 21-10ರಲ್ಲಿ ಗೇಮ್‌ ಗೆದ್ದು ಪಂದ್ಯವನ್ನು ನಿರ್ಣಾಯಕ 3ನೇ ಗೇಮ್‌ಗೆ ಕೊಂಡೊಯ್ದರು. ವಿಶ್ವ ರಾರ‍ಯಂಕಿಂಗ್‌ನಲ್ಲಿ 11ನೇ ಸ್ಥಾನದಲ್ಲಿರುವ 27 ವರ್ಷದ ಸೈನಾ 3ನೇ ಅಂತಿಮ ಗೇಮ್‌ನಲ್ಲಿ 15-13ರ ಮುನ್ನಡೆಯೊಂದಿಗೆ ಗೆಲುವಿನತ್ತ ದಾಪುಗಾಲಿರಿಸಿದ್ದರು. ಆದರೆ ಕೊನೆಯ ಕ್ಷ ಣದಲ್ಲಿ ಸುದೀರ್ಘ ರಾರ‍ಯಲಿಗಳಿಗೆ ಸಾಕ್ಷಿಯಾದ ಗೇಮ್‌ನಲ್ಲಿ ಪಾರಮ್ಯ ಮೆರೆದ ಚೀನಾ ಆಟಗಾರ್ತಿ 21-17ರಲ್ಲಿ ಸೈನಾ ಸವಾಲನ್ನು ಹಿಮ್ಮೆಟ್ಟಿಸಿ ಸೆಮಿಫೈನಲ್‌ಗೆ ಅರ್ಹತೆ ಸಂಪಾದಿಸಿದರು.
ಸಿಂಧೂ ಹೋರಾಟ ಅಂತ್ಯ
ರಿಯೊ ಒಲಿಂಪಿಕ್ಸ್‌ ಬೆಳ್ಳಿ ಪದಕ ವಿಜೇತೆ ಹಾಗೂ ವಿಶ್ವದ 3ನೇ ರಾರ‍ಯಂಕ್‌ನ ಪಿ.ವಿ ಸಿಂಧೂ ಅವರ ಹೋರಾಟವೂ ಕ್ವಾರ್ಟರ್‌ ಫೈನಲ್‌ನಲ್ಲಿ ಅಂತ್ಯಗೊಂಡಿದೆ. ಮಹಿಳಾ ಸಿಂಗಲ್ಸ್‌ನ 8ರ ಘಟ್ಟದ ಪಂದ್ಯದಲ್ಲಿ ಸಿಂಧೂ, ವಿಶ್ವದ ನಂ.1 ಆಟಗಾರ್ತಿ ಚೈನೀಸ್‌ ತೈಪೆಯ ತಾಯ್‌ ಜು ಯಿಂಗ್‌ ವಿರುದ್ಧ 21-10, 20-22, 16-21ರಲ್ಲಿ ಸೋಲು ಕಂಡರು. ಮೊದಲ ಗೇಮ್‌ನಲ್ಲಿ ದೊಡ್ಡ ಅಂತರ ಸೋಲು ಕಂಡ ಸಿಂಧೂ 2ನೇ ಗೇಮ್‌ನಲ್ಲಿ ತಿರುಗೇಟು ನೀಡಿದರಾದರೂ, ನಿರ್ಣಾಯಕ 3ನೇ ಗೇಮ್‌ನಲ್ಲಿ ಒತ್ತಡಕ್ಕೊಳಗಾದ ಸಿಂಧೂ ಪಂದ್ಯ ಸೋತು ಟೂರ್ನಿಯಿಂದ ನಿರ್ಗಮಿಸಿದರು. ಸಿಂಧೂ ವಿರುದ್ಧ ವೃತ್ತಿಜೀವನದಲ್ಲಿ 7ನೇ ಗೆಲುವು ದಾಖಲಿಸಿದ ಈ ಮೂಲಕ ಜು ಯಿಂಗ್‌ 4ರ ಘಟ್ಟಕ್ಕೆ ಮುನ್ನಡೆದರು.