ಐತಿಚಂಡ ರಮೇಶ್ ಉತ್ತಪ್ಪ
ಮಡಿಕೇರಿ: ಬೆಳ್ಯಪ್ಪ ಬಾರಿಸಿದ ಹ್ಯಾಟ್ರಿಕ್ ಗೋಲಿನ ನೆರವಿನಿಂದ ಮೇವಡ ತಂಡ ಮಂಡಂಗಡ ಕುಟುಂಬವನ್ನು 4-0 ಗೋಲುಗಳಿಂದ ಸೋಲಿಸಿ 21ನೇ ವರ್ಷದ ಕೊಡವ ಹಾಕಿ ಹಬ್ಬ ಬಿದ್ದಾಟಂಡ ಕಪ್ನ ಮುಂದಿನ ಸುತ್ತಿಗೆ ಪ್ರವೇಶ ಪಡೆದಿವೆ.
ಪಂದ್ಯದಲ್ಲಿ ಸಂಪೂರ್ಣ ಮೇಲುಗೈ ಸಾಧಿಸಿದ ಮೇವಡ ತಂಡ ಆರಂಭದಿಂದ ಪೂರ್ಣಾವಧಿ ತನಕ ಚೆಂಡಿನ ಮೇಲೆ ಬಿಗಿ ನಿಯಂತ್ರಣ ಪಡೆಯಿತು. ಆಟಗಾರರು ಅತ್ಯುತ್ತಮ ಪಾಸ್ನಿಂದ ಮೇಲುಗೈ ಸಾಧಿಸಿದರು. ಬೆಳ್ಯಪ್ಪ ಮೂರು ಗೋಲು ಗಳಿಸಿದರೆ, ಇವರಿಗೆ ಉತ್ತಮ ಸಾಥ್ ನೀಡಿದ ಸುಬ್ರಮಣಿ ಮತ್ತೊಂದು ಗೋಲು ಬಾರಿಸಿದರು.
ಸಮಬಲದಿಂದ ಕೂಡಿದ ಪಂದ್ಯದಲ್ಲಿ ಕೋದಂಡ ತಂಡ ಟೈ ಬ್ರೇಕರ್ನಲ್ಲಿ ಕುಲ್ಲಚಂಡ ತಂಡವನ್ನು ಮಣಿಸಿತು. ನಿಗದಿತ ಅವಧಿಯಲ್ಲಿ ಕೋದಂಡ ತಿಮ್ಮಯ್ಯ ಹಾಗೂ ಕುಲ್ಲಚಂಡ ಕಾರ್ಯಪ್ಪ ಗೋಲು ಗಳಿಸಿದರು. ಫಲಿತಾಂಶ 1-1 ರಿಂದ ಸಮಬಲಗೊಂಡಾಗ ಟೈ ಬ್ರೇಕರ್ ಮೊರೆ ಹೋಗಲಾಯಿತು. ಇದರಲ್ಲಿ ಕೋದಂಡ 5-4ರಿಂದ ಗೆಲುವು ಸಾಧಿಸಿತು.
ಮೇರಿಯಂಡ, ಜಮ್ಮಡ ಜಯಭೇರಿ
ಮತ್ತೊಂದು ಪಂದ್ಯದಲ್ಲಿ ಮೇರಿಯಂಡ ಕುಟುಂಬ 3-0 ಗೋಲುಗಳ ಅಂತರದಿಂದ ಚೆನ್ನಪಂಡ ತಂಡವನ್ನು ಮಣಿಸಿತು. ತಿಮ್ಮಯ್ಯ, ಮಾದಪ್ಪ ಹಾಗೂ ನಿಖಿಲ್ ಬೋಪಯ್ಯ ತಲಾ ಒಂದೊಂದು ಗೋಲು ಬಾರಿಸಿ ತಂಡವನ್ನು ವಿಜಯದ ದಡಕ್ಕೆ ಸೇರಿಸಿದರು. ಜಮ್ಮಡ ತಂಡ 1-0 ಗೋಲಿನಿಂದ ಬುಟ್ಟಿಯಂಡ ತಂಡವನ್ನು ಮಣಿಸಿತು. ಸಲಬಲದಿಂದ ಕೂಡಿದ ಪಂದ್ಯದಲ್ಲಿ ಬುಟ್ಟಿಯಂಡ ತಂಡ ದೊರೆತ ಅವಕಾಶವನ್ನು ಕೈಚೆಲ್ಲಿದ ಪರಿಣಾಮ ಸೋಲು ಅನುಭವಿಸಬೇಕಾಯಿತು. ನುಚ್ಚಿಮಣಿಯಂಡ ಕುಟುಂಬ 2-0 ಗೋಲುಗಳಿಂದ ಮಾಪಣಮಾಡ ತಂಡವನ್ನು ಮಣಿಸಿತು. ಪೂವಣ್ಣ ಹಾಗೂ ರಶ್ವಿನ್ ಪೊನ್ನಪ್ಪ ಗೋಲು ಗಳಿಸಿದರು. ಬಾದುಮಂಡ ತಂಡ ಟೈ ಬ್ರೇಕರ್ನಲ್ಲಿ 3-2 ರಿಂದ ಬಾರಿಯಂಡ ತಂಡವನ್ನು ಹಿಂದಿಕ್ಕಿ ಮುಂದಿನ ಸುತ್ತಿಗೆ ಪ್ರವೇಶ ಪಡೆಯಿತು. ನಿಗದಿತ ಅವಧಿಯಲ್ಲಿ ಕಿಶನ್ ಪೂವಯ್ಯ ಹಾಗೂ ಬಾದುಮಂಡ ಗಪ್ಪು ಗಣಪತಿ ಚೆಂಡನ್ನು ಗೋಲು ಪೆಟ್ಟಿಗೆಯೊಳಗೆ ಸೇರಿಸಿದರು.
ಅಜ್ಜಿಕುಟ್ಟಿರ ತಂಡಕ್ಕೆ ಭರ್ಜರಿ ಜಯ
ಏಕಪಕ್ಷೀಯವಾಗಿದ್ದ ಪಂದ್ಯದಲ್ಲಿ ಅಜ್ಜಿಕುಟ್ಟಿರ 5- 0 ಗೋಲುಗಳ ಅಂತರದಿಂದ ನೆಲ್ಲಚ್ಚಂಡ ತಂಡವನ್ನು ನಿರಾಯಾಸವಾಗಿ ಮಣಿಸಿತು. ನಿರ್ಮಲ್ ಚಿಣ್ಣಪ್ಪ ಹಾಗೂ ವಿನಿಲ್ ತಲಾ 2 ಗೋಲು ಬಾರಿಸಿದರೆ ಮತ್ತೊಂದು ಗೋಲನ್ನು ಗಣಪತಿ ಹೊಡೆದರು. ಮಾಪಂಗಡ ತಂಡ 2-0 ಗೋಲಿನಿಂದ ನಾಮೆರ ಕುಟುಂಬವನ್ನು ಸೋಲಿಸಿತು. ಬೋಪಯ್ಯ ಹಾಗೂ ಸೋಮಯ್ಯ ಫಲಿತಾಂಶ ತಂದುಕೊಟ್ಟರು.
ಕಂಡಂಗಾಲ ಮುಕ್ಕಾಟಿರ ತಂಡ 2-0 ಗೋಲಿನಿಂದ ನಿಡುಮಂಡ ಕುಟುಂಬಕ್ಕೆ ಸೋಲಿನ ರುಚಿ ತೋರಿಸಿತು. ಚರ್ಮಣ ಹಾಗೂ ನಾಣಯ್ಯ ಗೋಲು ಬಾರಿಸಿದರು. ಕಾಯಪಂಡ ತಂಡ ಏಕೈಕ ಗೋಲಿನಿಂದ ತಾಪಂಡ ಕುಟುಂಬವನ್ನು, ಕಳ್ಳಿಚಂಡ 3-0 ಗೋಲುಗಳಿಂದ ಬೊಪ್ಪಂಡ ತಂಡವನ್ನು, ಕುಂದಿರ ತಂಡ 4-0 ಗೋಲುಗಳಿಂದ ಪತ್ರಂಗಡ ತಂಡವನ್ನು, ಕೋಳೆರ 3-0 ಗೋಲುಗಳಿಂದ ಮೋರ್ಕಂಡ ತಂಡವನ್ನು, ಅಮ್ಮಂಡ 2-0 ಗೋಲುಗಳಿಂದ ಕರ್ತಮಾಡ ಕುಟುಂಬವನ್ನು, ಬಟ್ಟಿರ ತಂಡ 3-0 ಗೋಲುಗಳಿಂದ ಬೇತ್ರಿ ಮುಕ್ಕಾಟಿರ ತಂಡವನ್ನು, ಚೋಳಂಡ ತಂಡ 2-1 ರಿಂದ ಕಾಳಿಮಾಡ ತಂಡವನ್ನು, ತೀತಮಾಡ ತಂಡ 2-1 ರಿಂದ ಮಾಚಿಮಾಡ ತಂಡವನ್ನು, ಕಡೇಮಾಡ ತಂಡ 3-0 ಗೋಲುಗಳಿಂದ ಚೊಟ್ಟೆಕಾಳಪಂಡ ತಂಡವನ್ನು, ಬಾಳೆಯಡ ತಂಡ 3-1 ಗೋಲುಗಳಿಂದ ಮುಂಡಂಡ ತಂಡವನ್ನು, ಕಾಟುಮಣಿಯಂಡ 2-1 ರಿಂದ ಚಂಗೇಟಿರ ಕುಟುಂಬವನ್ನುಪುಟ್ಟಿಚಂಡ 4-1 ರಿಂದ ಪಟ್ಟಮಾಡ ತಂಡವನ್ನು ಮಣಿಸಿ ಮುಂದಿನ ಸುತ್ತಿಗೆ ಮುನ್ನಡೆಯಿತು.