ರೊನಾಲ್ಡೊಗೆ ಸಡ್ಡು ಹೊಡೆದ ಹ್ಯಾಟ್ರಿಕ್‌ ಹೀರೊ ಮೆಸ್ಸಿ!

ಬಾರ್ಸಿಲೋನಾ: ಇತ್ತೀಚೆಗಷ್ಟೇ ವಿಶ್ವದ ದಾಖಲೆಯ 6ನೇ ಫಿಫಾ ಬ್ಯಾಲನ್‌ ಡಿ'ಓರ್‌ ಪ್ರಶಸ್ತಿಗೆ ಭಾಜನರಾದ ಅರ್ಜೆಂಟೀನಾದ ಫುಟ್ಬಾಲ್‌ ತಾರೆ ಲಿಯೋನೆಲ್‌ ಮೆಸ್ಸಿ, ಇದೀಗ ಸ್ಪ್ಯಾನಿಷ್‌ ಲಾ ಲೀಗ ಟೂರ್ನಿಯಲ್ಲಿ ವಿಶೇಷ ದಾಖಲೆಯೊಂದನ್ನು ತಮ್ಮದಾಗಿಸಿಕೊಂಡಿದ್ದಾರೆ.

ಸಾರ್ವಕಾಲಿಕ ಶ್ರೇಷ್ಠ ಫುಟ್ಬಾಲ್‌ ಆಟಗಾರರ ಪೈಕಿ ಅಗ್ರಸ್ಥಾನದಲ್ಲಿ ಗುರುತಿಸಿಕೊಳ್ಳುವ ಎಫ್‌ಸಿ ಬಾರ್ಸಿಲೋನಾ ತಂಡದ ಫಾರ್ವರ್ಡ್‌ ಆಟಗಾರ ಮೆಸ್ಸಿ, ಲಾ ಲೀಗ ಟೂರ್ನಿಯಲ್ಲಿ ಅತಿ ಹೆಚ್ಚು ಹ್ಯಾಟ್ರಿಕ್‌ ಗೋಲ್‌ಗಳನ್ನು ಗಳಿಸಿದ ದಾಖಲೆಯನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಈ ಮೂಲಕ ತಮ್ಮ ಬದ್ಧ ಎದುರಾಳಿ ರಿಯಲ್‌ ಮ್ಯಾಡ್ರಿಡ್‌ ತಂಡದ ಮಾಜಿ ಸ್ಟ್ರೀಕರ್‌ ಕ್ರಿಸ್ಟಿಯಾನೊ ರೊನಾಲ್ಡೊಗೆ ಸಡ್ಡು ಹೊಡೆದಿದ್ದಾರೆ.

ಶನಿವಾರ ತಡರಾತ್ರಿ ನಡೆದ ಲಾ ಲೀಗ ಪಂದ್ಯದಲ್ಲಿ ಮೆಸ್ಸಿ ಈ ದಾಖಲೆ ಬರೆದಿದ್ದಾರೆ. ಆರ್‌ಸಿಡಿ ಮಲೋರ್ಕಾ ವಿರುದ್ಧ ಮಿಂಚಿನ ಆಟವಾಡಿದ ಮೆಸ್ಸಿ ಲಾ ಲೀಗಾ ಟೂರ್ನಿಯಲ್ಲಿ ತಮ್ಮ ವೃತ್ತಿ ಬದುಕಿನ 35ನೇ ಹ್ಯಾಟ್ರಿಕ್‌ ಗೋಲ್‌ ಗಳಿಸಿದರು. ಈಗ ಇಟಲಿಯ ಯುವೆಂಟಸ್‌ ಪರ ಆಡುತ್ತಿರುವ ಕ್ರಿಸ್ಟಿಯಾನೊ ರೊನಾಲ್ಡೊ, ಲಾ ಲೀಗದಲ್ಲಿ ಒಟ್ಟು 34 ಬಾರಿ ಹ್ಯಾಟ್ರಿಕ್‌ ಸಾಧನೆ ಮೆರೆದಿದ್ದರು.

ಕ್ರಿಸ್ಟಿಯಾನೋ ರೊನಾಲ್ಡೊ ಹಿಂದಿಕ್ಕಿ ದಾಖಲೆಯ 6ನೇ ಬಾರಿಗೆ 'ಬ್ಯಾಲನ್ ಡಿ ಓರ್' ಕಿರೀಟ ಗೆದ್ದ ಲಿಯೋನೆಲ್ ಮೆಸ್ಸಿ

ಮರ್ಲೋಕಾ ಡಿಫೆನ್ಸ್‌ ವಿಭಾಗಕ್ಕೆ ಚಳ್ಳೆ ಹಣ್ಣು ತಿನ್ನಿಸಿದ 32 ವರ್ಷದ ಅನುಭವಿ ಆಟಗಾರ ಮೆಸ್ಸಿ, ಪಂದ್ಯದ 17ನೇ, 21ನೇ ಹಾಗೂ 83ನೇ ನಿಮಿಷದಲ್ಲಿ ಗೋಲ್‌ ದಾಖಲಿಸಿ ಹ್ಯಾಟ್ರಿಕ್‌ ಪೂರೈಸಿದರು. ಅವರ ಈ ಭರ್ಜರಿ ಪ್ರದರ್ಶನದ ನೆರವಿನಿಂದ ಬಾರ್ಸಿಲೋನಾ ತಂಡ 5-2 ಗೋಲ್‌ಗಳಿಂದ ಭರ್ಜರಿ ಜಯದ ಸವಿಯುಂಡಿತು.

ಟೂರ್ನಿಯಲ್ಲಿ ತನ್ನ ಪ್ರಾಬಲ್ಯ ಮುಂದುವರಿಸಿರುವ ಎಫ್‌ಸಿ ಬಾರ್ಸಿಲೋನಾ ತಂಡ ಆಡಿದ 15 ಪಂದ್ಯಗಳಲ್ಲಿ 11 ಜಯ, 1 ಡ್ರಾ ಮತ್ತು 3 ಸೋಲಿನೊಂದಿಗೆ ಅಂಕಪಟ್ಟಿಯ ಅಗ್ರಸ್ಥಾನವನ್ನು ಕಾಯ್ದುಕೊಂಡಿದ್ದು, ಒಟ್ಟು 34 ಅಂಕಗಳನ್ನು ಗಳಿಸಿದೆ. ದ್ವಿತೀಯ ಸ್ಥಾನದಲ್ಲಿರುವ ರಿಯಲ್‌ ಮ್ಯಾಡ್ರಿಡ್‌ ಕೂಡ ಅಷ್ಟೇ ಪಂದ್ಯಗಳಿಂದ ಅಷ್ಟೇ ಅಂಕಗಳೊಂದಿಗೆ 2ನೇ ಸ್ಥಾನದಲ್ಲಿದೆ.

ಬ್ರೆಜಿಲ್‌ ಪರ ಪೀಲೆ ಅಡಿದ ಕೊನೇ ಪಂದ್ಯದಲ್ಲಿ ತೊಟ್ಟ ಜರ್ಸಿಗೆ ಹರಾಜಿನಲ್ಲಿ ಸಿಕ್ಕ ಬೆಲೆಯೆಷ್ಟು ಗೊತ್ತಾ?

ಮೆಸ್ಸಿ ಮುಡಿಗೆ ಮತ್ತೊಂದು ದಾಖಲೆ
ಅರ್ಜೆಂಟೀನಾ ತಂಡದ ನಾಯಕ ಲಿಯೋನೆಲ್‌ ಮೆಸ್ಸಿ, ಯುರೋಪ್‌ನ ಅಗ್ರ 5 ಲೀಗ್‌ಗಳಲ್ಲಿ ಕಳೆದ 14 ಆವೃತ್ತಿಗಳಲ್ಲಿ 10 ಮತ್ತು ಅದಕ್ಕಿಂತಲೂ ಹೆಚ್ಚು ಗೋಲ್‌ಗಳನ್ನು ಗಳಿಸಿದ ವಿಶ್ವದ ಏಕಮಾತ್ರ ಫುಟ್ಬಾಲ್‌ ಆಟಗಾರ ಎಂಬ ವಿಶೇಷ ದಾಖಲೆಯನ್ನೂ ಬರೆದಿದ್ದಾರೆ. ಕಳೆದ ಸೋಮವಾರ ನಡೆದ ಫಿಫಾ ಸಮಾರಂಭದಲ್ಲಿ ವಿಶ್ವ ಶ್ರೇಷ್ಠ ಫುಟ್ಬಾಲ್‌ ಆಟಗಾರನಿಗೆ ನೀಡಲಾಗುವ ಬ್ಯಾಲನ್‌ ಡಿ'ಓರ್‌ ಪ್ರಶಸ್ತಿಗೆ 6ನೇ ಬಾರಿ ಭಾಜನರಾದ ಮೆಸ್ಸಿ, ಈ ಮೂಲಕ ಕ್ರಿಸ್ಟಿಯಾನೊ ರೊನಾಲ್ಡೊ (5 ಬಾರಿ) ಅವರನ್ನು ಹಿಂದಿಕ್ಕಿದರು.