ಬ್ಯಾಡ್ಮಿಂಟನ್‌ ರಾರ‍ಯಂಕಿಂಗ್‌: ಲಕ್ಷ್ಯ, ರಿಯಾಗೆ ಭಾರಿ ಬಡ್ತಿ

ಹೊಸದಿಲ್ಲಿ: ಭಾರತದ ಉದಯೋನ್ಮುಖ ಬ್ಯಾಡ್ಮಿಂಟನ್‌ ಆಟಗಾರರಾದ ಲಕ್ಷ್ಯ ಸೇನ್‌ ಮತ್ತು ರಿಯಾ ಮುಖರ್ಜಿ ಮಂಗಳವಾರ ಬಿಡುಗಡೆಗೊಂಡ ಬಿಡಬ್ಲ್ಯುಎಫ್‌ ಶ್ರೇಯಾಂಕದಲ್ಲಿ ಅನುಕ್ರಮವಾಗಿ 76 ಮತ್ತು 94ನೇ ಸ್ಥಾನ ಗಳಿಸಿದ್ದಾರೆ.

ಪುರುಷರ ಸಿಂಗಲ್ಸ್‌ನಲ್ಲಿ ಲಕ್ಷ್ಯ 28 ಸ್ಥಾನ ಹಾಗೂ ಮಹಿಳೆಯರ ಸಿಂಗಲ್ಸ್‌ನಲ್ಲಿ ರಿಯಾ 19 ಸ್ಥಾನ ಬಡ್ತಿ ಪಡೆದಿದ್ದಾರೆ. ಕಳೆದ ಭಾನುವಾರ, ಸ್ವಿಸ್‌ ಓಪನ್‌ ಚಾಂಪಿಯನ್‌ಷಿಪ್‌ನ ಸೆಮಿಫೈನಲ್‌ನಲ್ಲಿ ಒಲಿಂಪಿಕ್‌ ಚಾಂಪಿಯನ್‌ ಚೆನ್‌ ಲಾಂಗ್‌ ಅವರನ್ನು ಸೋಲಿಸಿ ಫೈನಲ್‌ನಲ್ಲಿ ಚೀನಾದ ಶಿ ಯೂಕಿ ಎದುರು ಸೋತಿದ್ದ ಬಿ.ಸಾಯ್‌ ಪ್ರಣೀತ್‌ ಕೂಡ 3 ಸ್ಥಾನ ಬಡ್ತಿಯೊಂದಿಗೆ 19ನೇ ಸ್ಥಾನ ಪಡೆದಿದ್ದಾರೆ. ಜಪಾನ್‌ನ ಕೆಂಟೊ ಮೊಮೊಟಾ ಪುರುಷರ ಸಿಂಗಲ್ಸ್‌ನಲ್ಲಿ ಅಗ್ರ ಸ್ಥಾನದಲ್ಲಿದ್ದಾರೆ.

ಇನ್ನು, ಭಾರತೀಯ ಆಟಗಾರರ ಪೈಕಿ ಪುರುಷರ ಸಿಂಗಲ್ಸ್‌ನಲ್ಲಿ ಕಿಡಂಬಿ ಶ್ರೀಕಾಂತ್‌ (7) ಹಾಗೂ ಮಹಿಳೆಯರ ಸಿಂಗಲ್ಸ್‌ನಲ್ಲಿ ಪಿ.ವಿ.ಸಿಂಧೂ (6) ಮತ್ತು ಸೈನಾ ನೆಹ್ವಾಲ್‌ (9) ಅವರ ರಾರ‍ಯಂಕಿಂಗ್‌ನಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ.