ಸೈನಾಗೆ ಸೋಲು, ಭಾರತ ಹೋರಾಟ ಅಂತ್ಯ

ಬರ್ಮಿಂಗ್‌ಹ್ಯಾಮ್: ಸ್ಟಾರ್ ಆಟಗಾರ್ತಿ ಸೈನಾ ನೆಹ್ವಾಲ್ ಮಹಿಳೆಯರ ಸಿಂಗಲ್ಸ್ ಕ್ವಾರ್ಟರ್ ಫೈನಲ್‌ನಲ್ಲಿ ಪರಾಭವಗೊಳ್ಳುವ ಮೂಲಕ ಆಲ್ ಇಂಗ್ಲೆಂಡ್ ಬ್ಯಾಡ್ಮಿಂಟನ್ ಓಪನ್ ಟೂರ್ನಿಯಲ್ಲಿ ಭಾರತದ ಹೋರಾಟ ಅಂತ್ಯಗೊಂಡಿದೆ.

ಶುಕ್ರವಾರ ತಡರಾತ್ರಿ ನಡೆದ ಕ್ವಾರ್ಟರ್‌ಫೈನಲ್ ಪಂದ್ಯದಲ್ಲಿ ವಿಶ್ವದ ಎರಡನೇ ಶ್ರೇಯಾಂಕಿತೆ ಸೈನಾ 15-21, 16-21 ನೇರ ಗೇಮ್‌ಗಳಿಂದ ಚೈನೀಸ್ ತೈಪೆಯ ಥಾಯ್ ಜು ಯಿಂಗ್ ವಿರುದ್ಧ ಸೋಲನುಭವಿಸಿದರು. ಇದರೊಂದಿಗೆ ಸೈನಾ ಪ್ರಶಸ್ತಿ ಕನಸು ಕ್ವಾರ್ಟರ್‌ಫೈನಲ್ ಹಂತದಲ್ಲೇ ಭಗ್ನಗೊಂಡಿತು. ದ್ವಿತೀಯ ಸುತ್ತಿನಲ್ಲಿ ಸಾಯಿ ಪ್ರಣೀತ್, ಕಿಡಂಬಿ ಶ್ರೀಕಾಂತ್ ಮತ್ತು ಸಮೀರ್ ವರ್ಮಾ ಪರಾಭವಗೊಂಡು ಟೂರ್ನಿಯಿಂದ ಹೊರಬಿದ್ದರೆ, ಸಿಂಧೂ, ಜ್ವಾಲಾಗುಟ್ಟಾ ಮತ್ತು ಅಶ್ವಿನಿ ಪೊನ್ನಪ್ಪ ಮೊದಲ ಸುತ್ತಿನಲ್ಲೇ ಸೋತು ನಿರ್ಗಮಿಸಿದ್ದರು.

ಪ್ರಶಸ್ತಿ ಗೆಲ್ಲುವ ನೆಚ್ಚಿನ ಆಟಗಾರ್ತಿಯರಲ್ಲಿ ಒಬ್ಬರಾಗಿದ್ದ ಸೈನಾ ನೆಹ್ವಾಲ್ ಎರಡೂ ಗೇಮ್‌ಗಳಲ್ಲೂ ಚೈನೀಸ್ ಆಟಗಾರ್ತಿ ಎದುರು ಶರಣಾದರು. ಮೊದಲ ಗೇಮ್‌ನಲ್ಲಿ ಹಲವು ಸ್ವಯಂಕೃತ ಪ್ರಮಾದ ಎಸಗಿದ ಸೈನಾ ಒತ್ತಡ ಮೆಟ್ಟಿ ನಿಲ್ಲುವಲ್ಲಿ ವಿಫಲಗೊಂಡರು. ದ್ವಿತೀಯ ಗೇಮ್‌ನಲ್ಲೂ ಒತ್ತಡ ನಿಭಾಯಿಸುವಲ್ಲಿ ಯಶಸ್ವಿಯಾಗದೆ 5 ಅಂಕಗಳ ಅಂತರದಿಂದ ಶರಣಾದರು.