ಮನಪ್ರೀತ್‌ ‘ವರ್ಷದ ಆಟಗಾರ’

ಹೊಸದಿಲ್ಲಿ : ಭಾರತ ಪುರುಷರ ಹಾಕಿ ತಂಡದ ನಾಯಕ ಮನ್‌ಪ್ರೀತ್‌ ಸಿಂಗ್‌ ಹಾಗೂ ಭಾರತ ಮಹಿಳಾ ತಂಡದ ಸ್ಟ್ರೈಕರ್‌ ಲಾಲ್ರೆಮ್‌ ಸಿಯಾಮಿ ಏಷ್ಯಾ ಹಾಕಿ ಒಕ್ಕೂಟದಿಂದ ಅನುಕ್ರಮವಾಗಿ 2018ನೇ ಸಾಲಿನ ವರ್ಷದ ಆಟಗಾರ ಹಾಗೂ ವರ್ಷದ ಉದಯೋನ್ಮುಖ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಇವರಿಬ್ಬರಿಗೆ ಹಾಕಿ ಇಂಡಿಯಾ ಅಭಿನಂದನೆ ಸಲ್ಲಿಸಿದೆ.

2016ರಲ್ಲಿ ನೀಡಿದ ಅತ್ಯುನ್ನತ ಪ್ರದರ್ಶನಕ್ಕಾಗಿ 2017ರಲ್ಲಿ ಎಸ್‌.ವಿ.ಸುನಿಲ್‌ ವರ್ಷದ ಆಟಗಾರ ಪ್ರಶಸ್ತಿ ಸ್ವೀಕರಿಸಿದ್ದರು. ಒಮಾನ್‌ನ ಮಸ್ಕಟ್‌ನಲ್ಲಿ ನಡೆದ ಏಷ್ಯನ್‌ ಚಾಂಪಿಯನ್ಸ್‌ ಟ್ರೋಫಿಯಲ್ಲಿ ಮನ್‌ಪ್ರೀತ್‌ ಸಿಂಗ್‌ ಭಾರತ ತಂಡವನ್ನು ಯಶಸ್ವಿಯಾಗಿ ಮುನ್ನಡೆಸಿದ್ದರು. ಟೂರ್ನಿಯಲ್ಲಿ ಭಾರತ ಮತ್ತು ಪಾಕಿಸ್ತಾನ ಜಂಟಿ ವಿಜೇತರೆಂದು ಘೋಷಿಸಲಾಗಿತ್ತು. ಬ್ರೆಡಾದಲ್ಲಿ ನಡೆದ ಎಫ್‌ಐಎಚ್‌ ಚಾಂಪಿಯನ್ಸ್‌ ಟ್ರೋಫಿಯಲ್ಲಿ ಭಾರತ ಬೆಳ್ಳಿ ಪದಕ ಗೆಲ್ಲುವಲ್ಲಿ ಮನ್‌ಪ್ರೀತ್‌ ಪ್ರಮುಖ ಪಾತ್ರ ವಹಿಸಿದ್ದರು.

ಇನ್ನೊಂದೆಡೆ 18ರ ಹರೆಯದ ಲಾಲ್ರೆಮ್‌ಸಿಯಾಮಿ ಮಹಿಳಾ ವಿಶ್ವಕಪ್‌, 18ನೇ ಏಷ್ಯನ್‌ ಗೇಮ್ಸ್‌ ಸೇರಿದಂತೆ ಕಳೆದ ಹಲವು ಟೂರ್ನಿಗಳಲ್ಲಿ ಶ್ರೇಷ್ಠ ಪ್ರದರ್ಶನ ತೋರಿದ್ದಾರೆ. ಹೀಗಾಗಿ ಉದಯೋನ್ಮುಖ ಗೌರವಕ್ಕೆ ಪಾತ್ರರಾಗಿದ್ದಾರೆ. ಈ ಮಧ್ಯೆ ಭಾರತದ ಪುರುಷ ಹಾಕಿ ತಂಡ 2018ರಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ ತಂಡ ಪ್ರಶಸ್ತಿಗೆ ಆಯ್ಕೆಯಾಗಿದೆ.