World Boxing Championships; ಫೈನಲ್‌ಗೆ ಲಗ್ಗೆಯಿಟ್ಟ ಮೆಗ್ನಿಫಿಸೆಂಟ್‌ ಮೇರಿ

ಹೊಸದಿಲ್ಲಿ: ಐದು ಬಾರಿಯ ವಿಶ್ವ ಚಾಂಪಿಯನ್‌ ಬಾಕ್ಸರ್‌ ಭಾರತದ ಎಂ.ಸಿ ಮೇರಿ ಕೋಮ್‌, ಇಲ್ಲಿ ನಡೆಯುತ್ತಿರುವ ಐಬಾ ಮಹಿಳಾ ಬಾಕ್ಸಿಂಗ್‌ ವಿಶ್ವ ಚಾಂಪಿಯನ್‌ಷಿಪ್‌ನ 48ಕೆಜಿ ವಿಭಾಗದಲ್ಲಿ ಫೈನಲ್‌ ಪ್ರವೇಶಿಸುವ ಮೂಲಕ ಕನಿಷ್ಠ ಬೆಳ್ಳಿ ಪದಕವನ್ನು ಖಾತ್ರಿ ಪಡಿಸಿದ್ದಾರೆ.

ಗುರುವಾರ ನಡೆದ ಸೆಮಿಫೈನಲ್ ಮುಖಾಮುಖಿಯಲ್ಲಿ ಉತ್ತರ ಕೊರಿಯಾದ ಕಿಮ್‌ ಹೆಯಾಂಗ್‌ ಮಿ ಅವರನ್ನು ಮಣಿಸಿದ 35 ವರ್ಷದ ಅನುಭವಿ ಬಾಕ್ಸರ್ ಮೇರಿ ಕೋಮ್, ಫೈನಲ್‌ಗೆ ಲಗ್ಗೆಯಿಟ್ಟರು.

ಈ ಮೂಲಕ ಮೆಗ್ನಿಫಿಸೆಂಟ್‌ ಮೇರಿ ದಾಖಲೆಯ ಆರನೇಯ ಚಿನ್ನದ ಪ್ರಶಸ್ತಿ ಗುರಿಯಿರಿಸಿದ್ದಾರೆ. ಮೇರಿ ಇದೀಗ ಪ್ರಶಸ್ತಿಗಾಗಿನ ಹೋರಾಟದಲ್ಲಿ ಉಕ್ರೇನ್‌ನ ಹನ್ನಾ ಓಖೋಟಾ ಸವಾಲನ್ನು ಎದುರಿಸಲಿದ್ದಾರೆ.


ಈಗಾಗಲೇ ಕೂಟದಲ್ಲಿ ತಮ್ಮ 7ನೇ ಪದಕವನ್ನು ಖಾತ್ರಿ ಪಡಿಸಿಕೊಂಡ ಮೇರಿ, ಮಹಿಳಾ ಬಾಕ್ಸಿಂಗ್‌ ವಿಶ್ವ ಚಾಂಪಿಯನ್‌ಷಿಪ್‌ ಇತಿಹಾಸದ ಅತ್ಯಂತ ಯಶಸ್ವಿ ಬಾಕ್ಸರ್‌ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಿದ್ದಾರೆ. ಕೂಟದ ಆರಂಭಕ್ಕೂ ಮುನ್ನ ಭಾರತೀಯ ಬಾಕ್ಸರ್‌ ಒಟ್ಟು ಆರು ಪದಕಗಳೊಂದಿಗೆ ಐರ್ಲೆಂಡ್‌ನ ಬಾಕ್ಸಿಂಗ್‌ ತಾರೆ ಕೇಟಿ ಟೇಲರ್‌ ಅವರೊಟ್ಟಿಗೆ ದಾಖಲೆ ಹಂಚಿಕೊಂಡಿದ್ದರು.

ಅಂದ ಹಾಗೆ ಮೇರಿ ಕೊನೆಯದಾಗಿ 2010ರಲ್ಲಿ 48 ಕೆ.ಜಿ ವಿಭಾಗದಲ್ಲಿ ಚಿನ್ನ ಪದಕ ಗೆದ್ದಿದ್ದರು. ಮೇರಿ ಇದುವರೆಗೆ ಗೆದ್ದಿರುವ ಆರು ಪದಕಗಳ ಪೈಕಿ ಐದು ಚಿನ್ನ ಹಾಗೂ ಒಂದು ಬೆಳ್ಳಿ ಪದಕವೂ ಸೇರಿದೆ.