ಮೇರಿ ಕೋಮ್‌ ಫೈನಲ್‌ಗೆ ಲಗ್ಗೆ

ಗುವಾಹಟಿ : ಆರು ಬಾರಿಯ ವಿಶ್ವ ಚಾಂಪಿಯನ್‌ ಮೇರಿ ಕೋಮ್‌ ಎರಡನೇ ಆವೃತ್ತಿಯ ಇಂಡಿಯಾ ಓಪನ್‌ ಬಾಕ್ಸಿಂಗ್‌ ಚಾಂಪಿಯನ್‌ಷಿಪ್‌ನಲ್ಲಿ ಫೈನಲ್‌ ಪ್ರವೇಶಿಸಿದ್ದಾರೆ.

ಗುರುವಾರ ನಡೆದ ಮಹಿಳೆಯರ 51 ಕೆಜಿ ವಿಭಾಗದ ಸೆಮಿಫೈನಲ್‌ ಪಂದ್ಯದಲ್ಲಿ ಮಿಂಚಿದ ಸ್ಟಾರ್‌ ಬಾಕ್ಸರ್‌ ಮೇರಿ ಕೋಮ್‌ ಪ್ರತಿಸ್ಪರ್ಧಿ ನಿಖತ್‌ ಝರೀನ್‌ ಅವರನ್ನು ಸೋಲಿಸಿ ಪ್ರಶಸ್ತಿ ಸುತ್ತಿಗೆ ಹೆಜ್ಜೆ ಹಾಕಿದರು.

ಈ ಮಧ್ಯೆ, ಭಾರತದ ಪುರುಷ ಸ್ಪರ್ಧಿಗಳು ಏಳೂ ವಿಭಾಗಗಳಲ್ಲಿ ಪ್ರಾಬಲ್ಯ ಸಾಧಿಸಿ ಫೈನಲ್‌ಗೆ ದಾಪುಗಾಲಿಟ್ಟಿದ್ದಾರೆ.

22 ವರ್ಷದ ಮಾಜಿ ವಿಶ್ವ ಜೂನಿಯರ್‌ ಚಾಂಪಿಯನ್‌ ತೆಲಂಗಾಣದ ನಿಖತ್‌ ಮತ್ತು ಮೇರಿ ಕೋಮ್‌ ನಡುವಿನ ಹಣಾಹಣಿ ಆಕರ್ಷಣೆಯ ಕೇಂದ್ರಬಿಂದುವಾಗಿತ್ತು. 51 ಕೆಜಿ ವಿಭಾಗದಲ್ಲಿ ಚೊಚ್ಚಲ ಬಾರಿ ಸ್ಪರ್ಧೆಗಿಳಿದ 36 ವರ್ಷದ ಮೇರಿ, ಆರಂಭದಲ್ಲಿ ಅಲ್ಪ ಹಿನ್ನಡೆ ಅನುಭವಿಸಿದರೂ ಬಳಿಕ ಚೇತೋಹಾರಿ ಪ್ರದರ್ಶನ ನೀಡಿ 4-1 ಅಂಕಗಳ ಅಂತರದಲ್ಲಿ ಗೆದ್ದು ಸಂಭ್ರಮಿಸಿದರು. ಮೇರಿ, ಫೈನಲ್‌ನಲ್ಲಿ ಮಿಜೋರಾಂ ವನ್ಲಾಲ್‌ ದುವಾಟಿ ಅವರನ್ನು ಎದುರಿಸಲಿದ್ದಾರೆ.

ಪುರುಷರ ವಿಭಾಗದಲ್ಲಿ ಮಾಜಿ ವಿಶ್ವ ಯೂತ್‌ ಚಾಂಪಿಯನ್‌ ಸಚಿನ್‌ ಸಿವಾಚ್‌ 51 ಕೆಜಿ ವಿಭಾಗದ ಉಪಾಂತ್ಯದಲ್ಲಿ ಏಷ್ಯನ್‌ ಗೇಮ್ಸ್‌ ಸ್ವರ್ಣ ಪದಕ ವಿಜೇತ ಅಮಿತ್‌ ಪಂಘಾಲ್‌ಗೆ ಆಘಾತ ನೀಡಿ ಪ್ರಶಸ್ತಿ ಸುತ್ತಿಗೆ ಮುನ್ನಡೆದರು.